AYUBU 20 - Biblia Ilagho Jiboie Kwa Wandu Wose

¹ Niko Sofari Mnaamathi ukatumbulia:

² “Kwanivavira na madedo ghako Ayubu, sidimagha kurumaghia nisekutumbulie.

³ Nasikira malagho gha madukano, nani nichatumbulia seji nawuyaelelwa.

⁴ Kwa loli kwaichi kufuma kala, iji mdamu oreumbiloghe seji nawuyaelelwa.

⁵ Kukaia mundu mmbiwi wadaboilwa kwa ngelo vui; kuboilwa kwa mundu usene kuobua kwa Mlungu ni kwa ngelo vui.

⁶ Ukeduakujosa uvike mawingunyi, na chongo chake chiadadeghe marundu,

⁷ uchasoweka sa teri yadukwa ni mbeo, na awo weremanyireghe wichakotia waghendie hao.

⁸ Uchaida sa ndodo hata ndewuyaawoneka; uchalaghaya sa mawono gha kio.

⁹ Uchasoweka, hata ndewuyaawoneka sena; ndewuyaawoneka andu orekoghe ukikaia sena.

¹⁰ Wana wake wichalola kuboisa malagho na wakiwa, na kuwiwunjira mali rereiwiloghe ni ndee.

¹¹ Mumbi ghwake ghorekoghe na ndighi ra wudawana, ghwararishwa andonyi terinyi.

¹² “Hata ngera waboilwagha ni kudeda mawiwi, hata ngera wavisagha ghamu useghidede,

¹³ hata ngera ndedimagha kurumaghia useghidede, na kuchuria kughinyamia kima.

¹⁴ Elaima ghichakaia andenyi kwake sa vindo vimghalukagha; ghichakaia sa wusungu ghwa choka.

¹⁵ Mundu mmbiwi uchadaika mali uriiwie; Mlungu ucham'bonya uridaike.

¹⁶ Vindo ujagha veeka sa sumu; vicham'bwagha seji waalumwa ni choka ibirie.

¹⁷ Ndechaakaia moyo uwone meda, iyo meda idikagha wuki na mariwa.

¹⁸ Uchasigha vindo vose uvibonyere kazi; ndechaakaia na wulalo ghoja mali rake.

¹⁹ Kwa kukaia wawikorongie wakiwa kwa kuleghawitala; ukawusa nyumba usereriaghieghe.

²⁰ “Kwa kukaia orekoghe mundu wa bea nyingi, ndedimagha kukira kilambo chingi cha ivo verem'boiagha anduangi.

²¹ Ukaja ndesigharagha kindo chingi, kwa huwo ndechaakaia na kilambo chingi.

²² Ukeduachura mali, wasi ghuachurikia; uchakaia na wasi m'baa.

²³ Iji waja na kughuda, Mlungu uchamkaba nandighi kwa machu ghake ghibirie.

²⁴ Hata ngera wakimbie usepato ni iswagha ja chuma, uchalaswa na iwanu ja shaba.

²⁵ Jicharudwa jikulo mumbinyi kwake. Kirau ching'ala-ng'ala chichafunywa ngochonyi kwake, nao uchangilwa ni wowa m'baa.

²⁶ Kula kilambo ufughie chatoteshwa; modo ghusekorelo ni mndungi ghuchamlungura, na vose visighilo nyumbenyi vichasagha.

²⁷ Mlungunyi kuchafunukua mawiwi ghake, na ndoenyi kuchashuhudia wuwiwi ghwake.

²⁸ Vilambo va nyumbenyi kwake vichadukwa noko; vichakurudulwa noko ituku ja machu gha Mlungu.

²⁹ Iji nijo iwaghio ja mundu mmbiwi kufuma kwa Mlungu; ijo ifwa jake jilaghirilo ni Mlungu.”