AYUBU 2 - Biblia Ilagho Jiboie Kwa Wandu Wose

Shetani kumtima Ayubu sena

¹ Ituku jimu weke malaika wikacha sena kukuwonyera weni imbiri ya BWANA, na Shetani wori ukachanya nawo.

² Na BWANA ukamkotia Shetani, “Welee, oho kwafuma hao?” Shetani ukamtumbulia BWANA, “Nedeeka ngimara-mara na kusela iichia na iichia ndoenyi.”

³ BWANA ukamkotia Shetani, “Welee, kwammbonie mdumiki wapo Ayubu? Ndekuwadie mndungi ndoenyi uko mloli na mucha sa uo. Wadanitasa na kukulindia usebonye ilagho jingi iwiwi. Kwanishingirie nikusighe kumkabe duu, ela Ayubu waduagha mloli.”

⁴ Niko Shetani ukamtumbulia BWANA, “Mrongo kwa mrongo. Mundu wadima kufunya icho chose uko nacho kwa wundu ghwa irangi jake.

⁵ Ela kaba mumbi ghwake idana, kuwone seji ukuewiagha kukiwona woruwu.”

⁶ Niko BWANA ukamzera Shetani, “Haya, kwadima kum'bonya ijo jose; ela kumsighie irangi jake jeni.”

⁷ Nao Shetani ukafuma imbiri ya BWANA, ukaghenda ukam'busa Ayubu vonda vizamie mumbi ghose.

⁸ Ayubu ukawada luwigha lokusuwa, ukasea kidombo a ivunyi.

⁹ Niko mkake ukamzera, “Kuduagha mloli? Muewie Mlungu kufo.”

¹⁰ Ela Ayubu ukamzera, “Kwaawuyadeda sa muka mkelu. Welee, dadapatagha mecha kufuma kwa Mlungu disepatagha mawiwi?” Kwa agho ghose, Ayubu nderebonyereghe kaung'a kwa Mlungu anduangi.

Kucha kwa waghenyi wa Ayubu

¹¹ Waghenyi wadadu wa Ayubu, Elifazi Mtemani, Bildadi Mshuhi, na Sofari Mnaama, weresikireghe seji Ayubu upatiro ni agho mawiwi. Wikabonya njama eghenda kumzighana chiaimweri, kummbonia wughoma na kumhoresha ngolo.

¹² Iji wammbona wiko kakula, ndeweremmanyireghe. Wiendammanya, wikazoya kukema na kulila; wikarashua majoho ghawo kwa wasi, wikamicha teri nokoighu na kukudunga vongonyi kwawo.

¹³ Niko wikaseanya kidombo andonyi kwa matuku mfungade kio na dime. Ndeweredimieghe kudedanya nao angu werewonieghe wasi ghwake kukaia m'baa.