AYUBU 15 - Biblia Ilagho Jiboie Kwa Wandu Wose

¹ Niko Elifazi Mtemani ukatumbulia:

² “Kwani mundu uko na hikima wadima kudeda malagho gha duu, na kukuchura malagho maduu sa mbeo enona ya mashariki?

³ Mndungi wa hikima ndedimagha kudeda seji kwawuyadeda, angu kukudederia na malagho gha ighu ighu.

⁴ Ela oho kwaawuyasigha kuja kuobua kwa Mlungu, na kutangala wutasi ghwa Mlungu.

⁵ Kaung'a rako niro rawuyakushekeria kudeda huwo, na oho kwasaghua kudeda kwa mikalo.

⁶ Siwuekutanya, ela kwaawuyatanywa ni madedo ghako gheni; madedo ghako gheni ghakushuhudia.

⁷ “Kuaghesha ni oho wa imbiri kuvalwa? Angu, korekoghe imbiri mighondi isebonyero?

⁸ Kodesikiria njama ya Mlungu? Ni oho kuekeri kuko na hikima ya mdamu?

⁹ Niki kuichi diseichi? Ni sukuki kuko naro diserina?

¹⁰ Isi deekufundisha hikima kwa waghosi wibukie imbu, wandu wighosere kuchumba ndeyo.

¹¹ Welee, kwaawuyaghumenya wuhoreshi ghwa Mlungu, angu agho malagho dawuyakuja kwa wumboa?

¹² Kwaki kwabia huwu, hata kodezighanagha kiwiing'iwi?

¹³ Nao kodekaiagha na machu na Mlungu hata kufunyeghe malagho ghizamie huwo momunyi kwako!

¹⁴ Mdamu wadima kukaia uelie? Mundu uvalo ni muka ukaia wada mhachi?

¹⁵ Mlungu ndewirumiriagha weke malaika wake; hata ndewielie imbiri kwake anduangi.

¹⁶ Mdamu uzamie na kunoneka, ubonyagha wuwiwi sa kunywa machi urumirikia wada?

¹⁷ “Sikira nikughorie; leka nikughorie agho nighiwonie.

¹⁸ (Wandu wa hikima wanifundishire loli, wikufundishire kwa weke ndee, hata ndewivisire ilagho jingi.

¹⁹ Niwo weni wiekeri werenekeloghe isanga, ingelo mghenyi ungi usereidieghe aghadi kwawo.)

²⁰ Mundu mmbiwi ukorongagha wambao, uchatirirwa matuku ghose gha irangi jake.

²¹ Wadasikiragha chwaka reobosha, na ngelo ugheshagha oko nicha, uchachelwa ni viting'a.

²² Ndena irumirio wei uchafuma kirenyi, ela wadaweseragha kubwaghwa kwa lufu.

²³ Wamara-mara ukighesha uo ni vindo va nderi. Waichi wori ituku jake ja kira jalighisa.

²⁴ Wangilwa ni kiture cha wasi na matiriro; viasimana nao sa mzuri ukuboisire kwa wuda.

²⁵ Kwa kukaia ookunda kulwa na Mlungu, na kumlegha Uo-Uwadie-Ndighi-Rose,

²⁶ warama-rama ii chia na ii chia na ngao yake mbaa, ukikunda kulwa na Mlungu.

²⁷ Hata ngera wabandie na kusisina wushu, na viwonu vake kuchura nyama,

²⁸ uchakaia andenyi ya mizi isighilo, na nyumba risefwane kukailwa ni mndungi, iro rerekoghe rikiwuya maghacho.

²⁹ Ndechaadua mzuri wa mali, na mali rake nderichaakaia luma; mali rake ringi nderichaaera isangenyi anduangi.

³⁰ Ndechaafufunuka kufuma kirenyi; uchakaia sa mudi mbashu raro riomerelo ni modo, na miruke ifumagha momunyi kwa Mlungu ichamuinja noko.

³¹ Usakekukalia moni ukirumiria maza ra duu, kwa kukaia ndechaapata kindo chingi.

³² Uchanyaya imbiri ngelo yake isevisikie; uchakaia sa mudi mbashu raro risechaadeghedeka jingi.

³³ Uchakaia sa mzabibu ghupotuagha zabibu rake ngoo, na sa mzeituni ghughughuduagha mboi rake.

³⁴ Wandu wisewadie kuobua kwa Mlungu, ndewichaakaia na kivalwa chingi, na modo ghucharikora nyumba riaghilo kwa kuhongwa.

³⁵ Wandu awo wadabonya mipango ereda wasi, na kubonya mawiwi; ngolo rawo rachulwa ni mikalo.”