AYUBU 1 - Biblia Ilagho Jiboie Kwa Wandu Wose

Shetani kumtima Ayubu

¹ Korekoghe na mndumu isanga ja Usi, uwangwagha Ayubu. Orekoghe mundu mucha, usewadie wuwiwi ghungi; muoboi Mlungu uleghie mawiwi.

² Orevaeghe wana wa womi mfungade na wa waka wadadu.

³ Orekoghe na ng'ondi elfu mfungade, ngamila elfu idadu, ng'ombe elfu imweri, weke punda wa waka maghana masanu, na wadumiki wengi nandighi; huwo uo mundu orekoghe mzuri wa mali kuchumba wandu wose wa mashariki.

⁴ Wana wa Ayubu wa womi werekoghe wikibonya karamu kwa mazughe, nawo werekoghe wikiwikaribisha waruna wa waka wadadu wiche kuja na kunywa chiaimweri nawo.

⁵ Matuku gha karamu rawo ghikakatia, Ayubu orekoghe ukiwiwanga na kuwielesha. Orekoghe ukiwuka kokio, na kufunya vizongona vekora kwa wundu ghwa kula mwana wake; oreririkanyireghe kewada wana wake wabonyere kaung'a kwa kumdukana Mlungu wisemanyire. Huwo niko Ayubu orekoghe ukibonya tulituli.

⁶ Nao ituku jimu, weke malaika wikacha kukuwonyera weni imbiri ya BWANA, na Shetani wori ukacha aghadi kwawo.

⁷ BWANA ukamkotia Shetani, “Welee oho kwafuma hao?” Shetani ukamtumbulia BWANA, “Naafuma kumara-mara na kusela iichia na iichia ndoenyi.”

⁸ BWANA ukamkotia Shetani, “Welee, kwammbonie uo mdumiki wapo Ayubu? Ndekuwadie mndungi uko sa uo ndoenyi; mundu ukatie, usewadie wuwiwi ghungi, muoboi Mlungu, uleghie mawiwi.”

⁹ Niko Shetani ukamtumbulia BWANA, “Kwani Ayubu waawuyamuobua Mlungu duu?

¹⁰ Si iji kumlindirie na nyumba yake na vose uko navo? Oho kwarasimie kazi rake, na mali rake rachurikie isangenyi.

¹¹ Ela idana inja ivi uko navo, kuwone seji uchaakuewia kukiwona woruwu.”

¹² BWANA ukamzera Shetani, “Kwadima kubonya ilagho kwa vilambo vose uko navo, ela uo moni kusem'bonye ilagho jingi.” Nao Shetani ukamsigha BWANA.

Wana wa Ayubu kubwaghwa na mali rake kunonwa

¹³ Ituku jimu, wana wa Ayubu wa womi na wa waka werekoghe wikija karamu nyumbenyi kwa mruna m'baa.

¹⁴ Mdumwa umu ukacha kwa Ayubu ukamzera, “Dekoghe dikilima na ng'ombe, na weke punda wikija mbai mbai yawo.

¹⁵ Waseba wikacha na kudingiria; wikarikaba ng'ombe na punda wikaenda naro; wikabwagha wadumiki kwa lufu; naafufunuka ini moni niekeri nichekughoria.”

¹⁶ Nao ukighora woruwu, mdumwa umu ukacha ukighamba, “Lukuwa lwasea lukakora ng'ondi na wadumiki, lukawimeria putu; nani naafufunuka ini moni niekeri nichekughoria.”

¹⁷ Ukighora woruwu, mdumwa umu ukacha ukighamba, “Mafungu adadu gha Wababuloni wacha na kukaba ngamila wikaghenda naro, wikabwagha wadumiki kwa lufu, nani naafufunuka ini moni niekeri nichekughoria.”

¹⁸ Ukighora woruwu, mdumwa umu ukacha ukighamba, “Wana wako wa womi na wa waka wekoghe wikija karamu nyumbenyi kwa mruna m'baa;

¹⁹ kiremba chikacha kufuma cha kireti chikaikaba nyumba, ikawighuya wikafwa, nani naafufunuka ini moni niekeri nichekughoria.”

²⁰ Ayubu ukawuka, ukarashua nguwo yake kwa wasi, ukaara iridia jake ukaghwa andonyi ukatasa.

²¹ Nao ukaghamba, “Neevalwa duu, nani nichafwa duu; BWANA oreninekieghe, nao wawusa; irina jake ndejikaso.”

²² Kwa agho ghose, Ayubu nderebonyereghe kaung'a ingi, hata kumfunya Mlungu makosa anduangi.