AMOSI 8 - Biblia Ilagho Jiboie Kwa Wandu Wose

Mawono gha kikapu cha matunda

¹ Bwana MLUNGU ukaniwonyera mawono ghamu: ngawona andenyi yaro kikapu cha matunda ghiwurue.

² Nao ukaghamba, “Kwawuyawona kii Amosi?” Nani ngatumbulia, “Naawuyawona kikapu cha matunda ghiwurue.” Niko BWANA ukanizera, “Kutua kwa wandu wapo Israeli kwameria kuvika; sichaawilekia sena anduangi.

³ Ituku jija chumbo ra ngomenyi richawuya kililo; gharia ra wandu richakaia nyingi, naro richadeghwa cha shighadi kima kula andu.”

Mashaka gha Israeli

⁴ Sikirenyi agha inyo muwifashagha wandu wisena kindo chingi, na kukunda kuwitotesha wakiwa wa isangenyi.

⁵ Mwaghamba, “Ituku ibaa ja Mori lukombe jisiali, diwoneuza viro? Sabato isiali, diwonefunya ngano diuze; dighaluse vipimo na kukalia wandu kwa kutumia vipimo va tee.

⁶ Dichamghua mkiwa kwa feza, na uo usena kindo chingi kwa vadu va sapata, na kuuza masemu gha ngano.”

⁷ BWANA, uo Mlungu wa Israeli waghemie, “Kwa loli jingi nidua niseliwie mabonyo ghawo ghizamie.

⁸ Kwa huwo ndoe ichasughusika, na kula mundu isangenyi uchakaia na wasi. Isanga jose jichasughusika; jikichua na kumichwa-michwa sa ugho moda ghwa Naili ghuko Misri.

⁹ Ngelo ichacha, nani nichabonya iruwa jineng'ene dime ghadi, na kubonya ndoe isere kira nadime.

¹⁰ Nicharighalua ndima renyu riwue kililo chefuilwa, na chumbo renyu riwue ra wasi; nicham'bonya muro nguwo ra magunia, na kuara vongo venyu. Ituku ijo nichajibonya jikaie sa ifwa jelilia mwana wa womi wa ititi, na kutua kwa ituku jaro kuchakaia kwa wasi m'baa.

¹¹ “Olenyi matuku ghichacha, nichaareda njala isangenyi; si njala esowa vindo, angu kau esowa machi, ela ichakaia njala esowa kughisikira malagho gha BWANA. Ini BWANA naghamba.

¹² Wandu wichamara-mara kufuma kutua uku kwa bahari, hata kutua kuja kwa bahari na kufuma kaskazinyi hata mashariki; wichakimbia ii chia na i chia wikilola ilagho ja BWANA, na ndewichaajiwona anduangi.

¹³ Ngelo iyo, wai wighokie na wadawana wichadumbuka kwa wundu ghwa kau.

¹⁴ Awo wandu wighemagha kwa milimu ya Samaria, wikighamba, ‘Kwa mlungu ghwa Dani’ angu ‘Kwa mlungu ghwa Beer-sheba’ wandu awo wichaghwa hata ndewiichaawuka sena.”