AMOSI 2 - Biblia Ilagho Jiboie Kwa Wandu Wose

Moabu

¹ BWANA waghamba, “Wandu wa Moabu wabonyere kaung'a sena na sena; kwa wundu ugho nichawikaba. Weremsowieghe mzuri wa Edomu ishima kwa kukora maindi ghake ghikawuya ivu.

² Kwa huwo nichaduma modo aighu ya isanga ja Moabu, nagho ghuchakora ngome ra Keriothi. Wandu wa Moabu wichafwa wikidoghoda na kukema awudenyi na tarumbeta rikikabwa.

³ Nicham'bwagha m'bonyi nguma wa Moabu na wabaa wa isanga wose.”

Juda

⁴ BWANA waghamba, “Wandu wa Juda wabonya kaung'a sena na sena; kwa wundu ugho nichawikaba. Wamenyere mafundisho ghapo na kuleghawadia memu yapo. Walaghashiro ni iyo milimu cheni ya tee eretaswagha ni weke ndee.

⁵ Kwa huwo nichaduma modo aighu ya Juda, nagho ghuchakora ngome ra Jerusalemu.”

Kutanya kwa Mlungu aighu ya Israeli

⁶ BWANA waghamba, “Wandu wa Israeli wabonyere kaung'a sena na sena; kwa wundu ugho nichawikaba. Wadauza wandu wa hachi wuzumbenyi awo wisedimagha kuwilipa sile rawo, wakiwa wisedimagha kulipa hata sapata.

⁷ Wawadia chongo cha mkiwa aterinyi na kumuima mundu ukorongelo hachi yake. Mundu na ndee wasela na muka umweri, na huwo wajilusha irina japo.

⁸ Wadalalia nguwo riwikilo wufunga ghwa sile rawo mbai na mbai ya kula madhahabu, na kunywa divei ya wandu wilipishiro faini andenyi ya Hekalu ya Mlungu wawo.

⁹ “Elaima sena inyo wandu wapo, nerewitoteshereghe Waamori kwa wundu ghonyu, wandu werekoghe walacha seji ni midi ya sida, wiko na ndighi sa mialoni, ela ngawitotesha kufuma wa ighu hata wa ndonyi.

¹⁰ Sena neremfunyireghe isanga ja Misri, ngamlongoza kireti miaka mirongo ina, na kumneka isanga ja Waamori.

¹¹ Ngawiwusira wana wamu wenyu wikaie walodi, na wamu wa irika wikaie Wanaziri. Wele, huwo siko erekoghe konyu ee inyo wandu wa Israeli?

¹² Ela morewibonyereghe awo Wanaziri winyo divei, mkawilaghira walodi wisefunye wulodi.

¹³ Olenyi nichamfasha aeni muko, seji igare jifashagha ndoe ingelo jadukishirwa viro.

¹⁴ Mundu ukimbiagha na iseghe, ndechaakirwa ni iseghe jake; na uo uko na ndighi, uchateweleka; hata uo uko na kudima ndechaakukira moni anduangi.

¹⁵ Mundu uwadie ndana uchasimwa, na uo uko na iseghe, ndechaakukira moni hata uo ujokagha farasi wori ndechaakira irangi jake anduangi.

¹⁶ Na hata asikari umango ni ngolo aghadi ya mang'oni, uchadagha maswagha ghake na kukimbia ituku ijo.” Waghamba Bwana.