AMOSI 1 - Biblia Ilagho Jiboie Kwa Wandu Wose

¹ Agha ni malagho gha Amosi, uo orekoghe umu wa walisha wa Tekoa. Miaka iwi imbiri ya msughusiko ghwa ndoe, Mlungu oremfunukueghe Amosi maza aighu ya Israeli iji Uzia orekoghe mzuri wa Juda, na Jeroboamu mwana wa Joashi orekoghe mzuri wa Israeli.

² Amosi ukaghamba, “BWANA waruruma kufuma Mghondi ghwa Sinai; wadeda kufuma Jerusalemu. Milamba elisha yaoma, na nyasi aighu ya Mghondi ghwa Karmeli rawuya manjano.”

Kutanya kwa Mlungu kwa Israeli wambao Siria

³ BWANA waghamba, “Wandu wa Dameshki wabonyere kaung'a sena na sena; kwa wundu ugho nichawikaba. Wakorongie wandu wa Gileadi kwa lung'eto lubaa.

⁴ Kwa huwo nichaduma modo ghukore ngome rereaghiloghe ni Mzuri Hazaeli, nagho ghuchakora ngome ra muzi ghwa Mzuri Ben-hadadi.

⁵ Nichachikanya mbenge ra Dameshki, na kuwibwagha wandu wikaiagha andenyi ya Vololo ya Aveni, na m'bonyi nguma ufumagha Beth-aveni. Wandu wa Siria wichadwalwa wunyika cha Kiri.”

Filistia

⁶ BWANA waghamba, “Wandu wa Gaza wabonyere kaung'a sena na sena; kwa wundu ugho nichawikaba. Wadwae mbari yose wunyika, na kuwiuza kwa wandu wa Edomu wikaie wazumba.

⁷ Kwa huwo nichaduma modo aighu ya wurigha ghwa muzi ghwa Gaza, na kurikora ngome rake.

⁸ Nichawiinja wabonyi nguma wa mizi ya Ashdodi na Ashkeloni. Nichawikaba wandu wa Ekroni, na masighariko gha Wafilisti wose wichafwa.”

Tiro

⁹ BWANA waghamba, “Wandu wa Tiro wabonyere kaung'a sena na sena; kwa wundu ugho nichawikaba. Wadwae mbari yose wunyika cha isanga ja Edomu, hata ndeweretalieghe ighemi werejibonyereghe ja kiwughenyi.

¹⁰ Kwa huwo nichaduma modo aighu ya wurigha ghwa Tiro, nagho ghuchakora ngome rake.”

Edomu

¹¹ BWANA waghamba, “Wandu wa Edomu wabonyere kaung'a sena na sena; kwa wundu ugho nichawikaba. Werewiwingieghe waruna Waisraeli, hata ndewerewiwonieghe wughoma. Machu ghawo ndegherekoghe na kipimo, ghisesiagha.

¹² Kwa huwo nichaduma modo aighu ya muzi ghwa Temani, na kurikora ngome ra Bosra.”

Amoni

¹³ BWANA waghamba, “Wandu wa Amoni wabonyere kaung'a sena na sena; kwa wundu ugho nichawikaba. Wuda ghwawo ghokunda kuchuria isanga warashue waka wa Gileadi wiko na vifu.

¹⁴ Kwa huwo nichaduma modo aighu ya wurigha ghwa muzi ghwa Raba, nagho ghuchakora ngome rake. Kuchakaia na ngemi ituku ja wuda, nagho ghuchabia sa kiremba.

¹⁵ Mzuri wawo uchabarishwa chiaimweri na wabaa wake wa kazi.”