2 WAZURI 9 - Biblia Ilagho Jiboie Kwa Wandu Wose

Jehu kushingwa mavuda ukaie mzuri wa Israeli

¹ Niko mlodi Elisha ukammbanga umu wa kipughi cha walodi, ukamzera, “Kufunge nicha, kuwade ihi chupa ya mavuda, kughende Ramoth-gileadi.

² Iji kwavika, kumlole Jehu mwana wa Jehoshafati, wawae Nimshi; kumfunye kwa wambao, kughende nao chumba cha ndenyi.

³ Niko kuwade ichupa ya mavuda, kumdunge chongonyi kukighamba, ‘BWANA waghamba, Nakushinga mavuda kukaie mzuri aighu ya Israeli.’ Nao kurughuo mnyango, kufume kukimbie; kusemuke.”

⁴ Niko uja mlodi wa irika ukaghenda Ramoth-gileadi;

⁵ ukakua wabaa wa majeshi wiko mwandunyi, ukaghamba, “Neko na malagho kwako, ee m'baa wa ijeshi.” Jehu ukaghamba, “Ni uao aghadi kodu?” Ukatumbulia, “Ni kwako, ee m'baa wa ijeshi.”

⁶ Nao ukawuka ukangia nyumbenyi, na uja mlodi wa irika ukamdunga mavuda chongonyi kwake ukighamba, “BWANA waghamba, Nakushinga mavuda kupate kukaia mzuri aighu ya wandu wapo Israeli.

⁷ Na oho kuchaikaba nyumba ya Ahabu bwana wako, nipate kulipia kisasi aighu ya Jezebeli, kwa wundu ghwa kuidia bagha ya wadumiki wapo walodi, na bagha ya wadumiki wose wa BWANA.

⁸ Kwa kukaia nyumba yose ya Ahabu, ichatoteshwa; na kula mwana wa womi wa kivalwa cha Ahabu, nichamuinja andenyi ya Israeli, ukaiagha mzumba angu mkitina;

⁹ nani nichaibonya nyumba ya Ahabu ikaie karakara na nyumba ya Jeroboamu mwana wa Nebati, na kara kara na nyumba ya Baasha mwana wa Ahija.

¹⁰ Koshi richaja nyama ya Jezebeli a isangenyi ja Jezreeli, na mndungi ndechaamrika anduangi.” Nyuma ya kughora agho, uja mlodi wa irika ukarughua mnyango, ukafuma ukakimbia.

¹¹ Jehu uendawuya kwa wambao, wikamkotia, “Agho malagho ghaboie? Umundu wa isu wachabonyaki kwako?” Ukawizera, “Inyo mwamwichi mundu waro, na malagho ghake wori mwaghiichi putu.”

¹² Wikamzera, “Hata ndedighiichi; dighorie seji wakuzera.” Nao ukawizera, “Wanizera welee, BWANA waghamba, ‘Nakushinga mavuda kukaie mzuri wa Israeli.’”

¹³ Niko shwa wori waja wabaa wa majeshi kula umu wawo ukawada nguwo yake na kuiala aviluwatironyi, Jehu upate kukaia kimusi aighu yaro. Wikakaba tarumbeta wikaghamba, “Jehu nuo mzuri.”

Kubwaghwa kwa mzuri Joramu wa Israeli

¹⁴ Joramu chiaimweri na Israeli yose werekoghe wikighulindia muzi ghwa Ramoth-gileadi ghusewado ni Hazaeli mzuri wa Siria. Na Jehu mwana wa Jehoshafati, wawae Nimshi, ukabonya sheshe aighu ya mzuri wa Israeli.

¹⁵ Ela mzuri Joramu orekoghe wawuya cha Jezreeli kuhoresha vonda orevipatireghe wudenyi ukilwa na Hazaeli mzuri wa Siria. Niko Jehu ukawizera wabaa wambao, “Ikakaia nia yenyu eko chiaimweri nani, mndungi usefume Ramoth-gileadi kwendaghoria wandu malagho ghapo aja Jezreeli.”

¹⁶ Nao Jehu ukajoka igarenyi kwake, ukaghenda Jezreeli andu Joramu orekoghe ukikurwarisha; na Ahazia mzuri wa Juda orekoghe wacha kumzighana.

¹⁷ Mlindiri orekoghe kimusi aighu ya mnara aho Jezreeli. Ukazighana izungu ja wandu werekoghe wikichanya na Jehu, ukaghamba, “Nawona izungu ja wandu wichagha.” Joramu ukaghamba, “Wada mjoki farasi kumdume uwimare, nao ukotie, ‘Wele ni sere?’”

¹⁸ Niko uja mundu uendajoka farasi, ukaghenda kummara Jehu ukamzera, “Mzuri wakotia welee, ni sere?” Jehu ukaghamba, “Kwaikundiaki sere; oho wuya nyuma yapo kuninughe.” Uja mlindiri ukaduma malagho kwa mzuri ukighamba, “Uja mundu mumdumieghe wavika kwawo, ela ndewuyewuya.”

¹⁹ Niko ukaduma mundu wa kawi. Nao ukawighendia ukamzera Jehu, “Mzuri wakotia, welee, ni sere?” Jehu ukatumbulia, “Kwaikundiaki sere; oho wuya nyuma yapo kuninughe.”

²⁰ Uja mlindiri ukaghora sena, “Na uja mundu mumdumieghe wavika, ela ndewuyewuya. U mundu wawuyaghenja igare uajighenja sa mundu wa isu! Uajighenja sa Jehu mwana wa Nimshi.”

²¹ Nao Mzuri Joramu ukaghamba, “Niboisirenyi igare japo.” Wikajiwika tayari. Wikafuma wose na Ahazia mzuri wa Juda, kummara Jehu; wikakwania na Jehu aja mbuwenyi kwa Nabothi Mjezreeli.

²² Joramu uendammbona Jehu ukakotia, “Welee, ni sere Jehu?” Ukatumbulia, “Sere iwonekia hao na uko kutasa milimu na kulaghua kwa mayo Jezebeli kuduagha kwa wungi?”

²³ Joramu ukaghalua igare jake ukakimbia ukimzera Ahazia, “Ni sheshe Ahazia!”

²⁴ Nao Jehu ukaruda ndana yake kwa ndighi rake rose, ukamlasa Joramu na iwanu ghadi na ghadi ya maonge; iwanu jikangia hata jikadunga ngolo, ukawuduka andenyi igarenyi kwake.

²⁵ Jehu ukamzera Bidkari mlindiri wake, “Mduke kumkumbe mbuwenyi kwa Nabothi Mjezreeli. Kumbuka seji BWANA oreghorieghe aighu yake ingelo deremnughaa ndee Ahabu chiaimweri;

²⁶ ukighamba, ‘Kwa loli seji niwonie bagha ya Nabothi na ya wana wake ikidika ighuo, waghamba BWANA, nichalipia kisasi ahaeni mbuwenyi.’ Kwa huwo mkumbe ahoeni mbuwenyi kara kara na ilagho ja BWANA.”

Kubwaghwa kwa Mzuri Ahazia wa Juda

²⁷ Ahazia mzuri wa Juda uendawona agho, ukakimbia chia ya Beth-hagani. Jehu ukamnugha ukighamba, “Nao moni mlasenyi wokoni.” Wikamlasa uko igarenyi kwake, ingelo orekoghe ukighenda Guri, kaavui na muzi ghwa Ibleamu, wikamshoghonua. Ukakimbia hata Megido, nao ukafuya aho.

²⁸ Wabaa wake wikamduka igarenyi kwake hata Jerusalemu; wikamrika kaburinyi kwake mzinyi kwa Daudi kara kara na weke ndee.

²⁹ Ahazia orewurieghe mzuri wa Juda mwaka ghwa ikumi na imweri ghwa kubonya nguma kwake Joramu mwana wa Ahabu.

Kubwaghwa kwa Malkia Jezebeli

³⁰ Nao iji Jehu wavika Jezreeli, Jezebeli ukasikira; ukashinga meso ghake rangi, ukaboisa iridia jake, ukakaia kimusi gorofenyi ya ngome ya muzi ukizighanira a idirishenyi.

³¹ Jehu uendangia mbengenyi Jezebeli ukakotia, “Wele Zimri, ni sere oho m'bwaghi wa bwana wako?”

³² Jehu ukazighana cha idirishenyi, ukaghamba, “Nani uko cha kwapo? Nani?” Weke kolowi wadadu wikamzighana Jehu aidirishenyi.

³³ Jehu ukawizera, “Mpotuonyi uo muka.” Nao wikampotua, na bagha rimu rake rikatarikia wurigha, na aighu ya farasi. Nao wikaida wikimfasha-fasha.

³⁴ Jehu ukangia ngomenyi, ukaja ukanywa. Konyuma ukaghamba, “Oke mzighanenyi uo muka wa kisha mumrike, kwa kukaia uo ni mwai wa mzuri.”

³⁵ Ela iji werefumieghe kuzighana, ndewerewonieghe mumbi ghwake, ela chongo, na masafio ghake, na vikoto vake.

³⁶ Nao iji wawuya na kumghoria, Jehu ukaghamba, “Niko koni BWANA oreghorieghe kwa momu ghwa mdumiki wake Elija Mtishbi, ‘Koshi richaja mumbi ghwa Jezebeli amlambenyi ghwa Jezreeli.

³⁷ Na masighariko ghake ghichasasarwa sa mavi a mbuwenyi, mlambenyi ghwa Jezreeli, hata mndungi usedime kutambua wei uhu nuo Jezebeli.’”