2 WAZURI 8 - Biblia Ilagho Jiboie Kwa Wandu Wose

Kuwuya kwa uja muka Mshunami

¹ Idana Elisha oremzerieghe uja muka Mshunami, uo oremrukishirieghe mwana wake, ufume jija isanga, uhamie andu kuzima uko kose uchaakuwona. Kwa kukaia BWANA uchareda njala isangenyi jija kwa miaka mfungade.

² Niko uja muka ukasikira ukafuma ukahama cha isanga ja Filistia, chiaimweri na wandu wake, sa iji koni orezereloghe ni mlodi Elisha. Ukakaia kiwughenyi andenyi ya isanga ja Wafilisti kwa miaka mfungade.

³ Nyuma ya miaka mfungade, uja muka ukawuya Israeli, kufuma isanga ja Wafilisti. Nao ukaghenda kwa mzuri kulomba uwunjiro mbuwa yake na nyumba yake.

⁴ Ukamkua mzuri ukidedanya na Gehazi uja mdumiki wa Elisha; kwa kukaia orekundieghe kumanya iro maza mbaa ribonyero ni Elisha.

⁵ Nao iji Gehazi orekoghe ukimghoria mzuri seji Elisha oremrukishireghe mwana orefueghe, uja muka (uo mwana wake orerukishiroghe) ukacha kwa mzuri kwa wundu gholomba nyumba yake na mbuwa yake. Niko Gehazi ukaghamba, “Ola bwana wapo mzuri, uhu nuo uja muka mwana wake orerukishiroghe ni Elisha, na mwana moni hoyu.”

⁶ Hata iji wamkotia uja muka wuloli ghwa agho malagho, ukamghoria kukaia ni loli. Niko mzuri ukammbanga m'baa umu, ukamdumanya na uja muka ukighamba, “Wunjenyi kula kilambo cha uhu muka, chiaimweri na mavalo gha mbuwenyi kwake kufuma ituku jija ufumie aha hata linu.”

Elisha na Mzuri Ben-hadadi wa Siria

⁷ Elisha ukaghenda cha Dameshki; na Ben-hadadi mzuri wa Siria orekoghe mkongo. Mzuri Ben-hadadi ukaghorelwa kukaia mlodi Elisha wacha aho.

⁸ Nao mzuri ukamzera Hazaeli, “Ghenda kwa mlodi Elisha, kumdwaie iri zawadi; nao kumzere ukotie kwa BWANA maza ra ughu wukongo ngera niboa angu siboagha.”

⁹ Niko Hazaeli ukafuma ukidwa iro zawadi, vindo viboie va mbari rose vifumie Dameshki vadukwa ni ngamila mirongo ina. Ukaghenda naro kwa Elisha, ukakaia kimusi mnyangonyi kwake ukighamba, “Mwana wako Ben-hadadi, mzuri wa Siria, waniduma kwako ukikunda kumanya ngera ughu wukongo ghumkira.”

¹⁰ Nao Elisha ukatumbulia, “Ghenda kumzere angu uboa too; elaima BWANA wanifunukuya kukaia uchafwa.”

¹¹ Ukamkuya meso hata Hazaeli ukakambwa ni chongo; nao Elisha ukalila.

¹² Hazaeli ukamkotia, “Kuliliaki bwana wapo?” Ukatumbulia, “Ni angu namanya ugho wuwiwi kuchaawibonyera wandu wa Israeli; kwa kukaia kuchakora ngome rawo, na kubwagha wandu wa irika wa Israeli kwa lufu, sena kuchawifasha-fasha wana wawo, na kuwirashua-rashua waka wawo wiko na vifu.”

¹³ Hazaeli ukatumbulia, “Kwani ini mdumiki wako neko kii hata nibonye ijo ilagho ibaa, nani neeka tu sa koshi?” Elisha ukamtumbulia, “BWANA waniwonyera angu kuchawuya mzuri wa Siria.”

¹⁴ Nao ukafuma kwa Elisha, ukaghenda kwa bwana wake mzuri wa Siria. Mzuri ukamkotia, “Elisha waghamba wada?” Ukatumbulia, “Wanizera kukaia kuboa too.”

¹⁵ Nakesho yaro, Hazaeli ukawada brangeti, ukamkumba machinyi; ukamfinikira mzuri wushunyi, ukamriwa miruke hata ukafwa. Niko Hazaeli ukawada wuzuri wulalo ghwake.

Mzuri Jehoramu wa Juda

¹⁶ Mwaka ghwa kasanu ghwa kubonya nguma kwa Joramu mwana wa Ahabu mzuri wa Israeli, niko Jehoramu mwana wa Jehoshafati mzuri wa Juda orezoeghe kubonya nguma.

¹⁷ Orekoghe mundu wa irika ja miaka mirongo idadu na iwi ngelo orezoyagha kukaia mzuri; ukabonya nguma Jerusalemu kwa miaka wunyanya.

¹⁸ Ukalowua mwai wa Ahabu, na kwa wundu ugho ukabonya mawiwi imbiri ya BWANA kwa kunugha mighendo ya wazuri wa Israeli, karakara na Ahabu.

¹⁹ Elaima BWANA nderetoteshereghe Juda, kwa kukaia BWANA orekoghe wamlaghira Daudi kukaia ndechaasoweka mndungi obonya nguma Juda wa kivalwa chake kwa kala na kala.

²⁰ Matuku gha kubonya nguma kwa Jehoramu, Edomu ereleghieghe kubonyerwa nguma ni Juda; wikakubonyera wuzuri ghwawo ghoni.

²¹ Niko Jehoramu ukafuma na magare ghake ghose kughenda Sairi, andu ijeshi ja Waedomu jerekoghe. Waedomu wikawimaria chia rose, uo moni na magare ghake na wabaa wa magare ghake; ela wikawuka nakio wikafuma na ijeshi jake, wikakimbia na kughala.

²² Kwa huwo Edomu ikamlegha Juda hata ituku iji ja linu. Ngelo iyo, na muzi ghwa Libna wori ghukalegha Juda.

²³ Malagho ghose Jehoramu oreghibonyereghe ghaandikilo andenyi ya chuo cha Malagho gha Ngelo cha wazuri wa Juda.

²⁴ Jehoramu ukafwa karakara na weke ndee, ukarikwa andu weke ndee wererikiloghe mzinyi ghwa Daudi; na mwana wake Ahazia ukabonya nguma wulalo ghwake.

Mzuri Ahazia wa Juda

²⁵ Mwaka ghwa ikumi na iwi ghwa kubonya nguma kwake Joramu mwana wa Ahabu mzuri wa Israeli, niko Ahazia mwana wa Jehoramu orezoeghe kubonya nguma isanga ja Juda.

²⁶ Orekoghe mundu wa irika ja miaka mirongo iwi na iwi ngelo orezoyagha kubonya nguma. Ukabonya nguma Jerusalemu kwa mwaka ghumweri. Mae orewangwagha Athalia nao ni wawae Omri mzuri wa Israeli.

²⁷ Nao moni wori orebonyereghe mawiwi mesonyi kwa BWANA kara kara na Ahabu, angu orekoghe mlamu wa kinyumba cha Ahabu.

²⁸ Mzuri Ahazia ukaghendanya na Joramu mwana wa Ahabu, upate kulwa na Hazaeli mzuri wa Siria aja Ramoth-gileadi, na Wasiria wikamshoghonua Joramu aho wudenyi.

²⁹ Mzuri Joramu ukawuya Jezreeli upate kukurighita vonda orevipatireghe kufuma kwa Wasiria aho Rama, iji orelwagha na Hazaeli mzuri wa Siria; na Ahazia mwana wa Jehoramu, mzuri wa Juda, ukasea aho kummbona Joramu mwana wa Ahabu; angu orekoghe mkongo.