2 WAZURI 5 - Biblia Ilagho Jiboie Kwa Wandu Wose

Kuboiswa kwa Naamani

¹ M'baa wa majeshi gha mzuri wa Siria, uwangwaghwa Naamani, orekoghe m'baa unekelo ishima na kukundwa ni mzuri, angu nuo oretumiloghe ni BWANA kuwiredia Wasiria wusimi; orekoghe mundu m'baa uwadie ndighi, ela orekoghe na sima.

² Ngelo Wasiria weredwaeghe wandu wunyika andenyi ya wuda ghumu, weremdwaeghe mwai umu mtini kufuma isanga ja Israeli; ukakaia ukimdumikia mka Naamani.

³ Ituku jimu, uja mwai ukamzera bibi wake, “Wei bwana wapo odekanya na uja mlodi uko Samaria, kumangu wam'boisa wukongo ghwake ghwa sima.”

⁴ Naamani uendasikira malagho agho, ukaghenda na kumghoria bwana wake mzuri wa Siria, seji uja mwai ufumie Israeli waghora.

⁵ Mzuri wa Siria ukaghamba, “Leka nikuandikie barua, kughende nayo kwa mzuri wa Israeli.” Nao Naamani ukafuma ukaghenda ukadwa vibelele elfu mirongo idadu va feza, na vibelele va dhahabu elfu irandadu, na marwao ikumi.

⁶ Ukareda ija barua ifumie kwa mzuri wa Siria ighambagha, “Kukapata barua ihi kumanye angu naamduma mdumiki wapo Naamani kwako, kupate kum'boisa wukongo ghwake ghwa sima.”

⁷ Mzuri wa Israeli uendashoma iyo barua, ukarashua nguwo rake ukikambwa ni chongo na kughamba, “Kwani ini neeka Mlungu nidimagha kubwagha na kukaisha moyo, hata umundu unidumie mundu wake wei nim'boise wukongo ghwake ghwa sima? Zighanenyi mmbone kukaia umundu waawuyanilola zua.”

⁸ Nao iji mlodi Elisha wasikira kukaia mzuri wa Israeli warashua nguwo rake, ukikambwa ni chongo, ukamdumia momu ukighamba, “Kwaki kwakambwa ni chongo? Mleke uche kwapo idana, nao uchamanya kukaia oko mlodi Israeli.”

⁹ Naamani ukaghenda na farasi rake, na magare ghake ukakaia kimusi mnyangonyi ghwa nyumba ya Elisha.

¹⁰ Elisha ukamdumia mundu umzere, “Ghenda kukuoghoshe andenyi ya moda ghwa Jordani mando mfungade, na oho kuchaboa putu.”

¹¹ Ela Naamani ukajokwa ni machu, ukaghenda noko ukighamba, “Zighanenyi! Nedeghesha wei wachagha na kukaia kimusi kaavui na ini, nao ulombe kwa BWANA Mlungu wake, na kuisa mkonu ghwake andu sima iko, na kuniboisa.

¹² Kwani meda ya mzedu Abana na Farpari, iyo iko Dameshki, ndeiboie kuchumba machi ghiko Israeli? Huwo sadimagha kukuoghosha aho na kueleshwa?” Ukaghaluka na kughenda kwa machu.

¹³ Ela wadumiki wake wikamsoghodera na kumzera, “Wele mghosi, ngera uhu mlodi odekuzera kubonye ilagho ibaa ndakwajibonyagha? Da si baa kukuoghosha na kueleshwa?”

¹⁴ Nao ukaghenda na kukungira Jordani mando mfungade, karakara na ilagho ja mundu wa Mlungu, na mumbi ghwake ghukawuya ghudendere sa ghwa mwana mtini; ukaeleshwa.

¹⁵ Niko Naamani ukawuya kwa Elisha chiaimweri na wandu wake wose; ukacha na kukaia kimusi imbiri yake, ukaghamba, “Ola namanya angu ndeuko Mlungu ungi mzima wurumwengunyi kose, ela kwa Israeli; kwa huwo idana nakulomba kuwuse manosi kufuma kwapo ini mdumiki wako.”

¹⁶ Ela Elisha ukaghamba, “Naghema kwa Mlungu uko moyo, uo nimdumikiagha, sichaawusa kindo chingi anduangi.” Ukamshingira uwuse, ela ukalegha putu.

¹⁷ Nao Naamani ukaghamba, “Ngera kwalegha putu, nakulomba kunirumirie ini mdumiki wako nineko misigo iwi ya ndoe, edukwa ni nyumbu, niido cha mzedu; kwa kukaia kufuma idime sichaafunya vizongona vingi angu vizongona vekora kwa mlungu ghungi mzima, ela BWANA uekeri.

¹⁸ Nalomba BWANA unifuye wughoma ini mdumiki wako, ingelo bwana wapo mzuri wa Siria wakaghoghoma kutasa andenyi ya nyumba ya Rimoni, mlungu ghwa Siria, nani ngakaghoghoma ngimlindia andenyi ya iyo nyumba; nalomba BWANA unifuye wughoma kwa ilagho iji.”

¹⁹ Elisha ukamzera, “Ghenda na sere.” Ela iji Naamani wafuma kwake, na kughenda mwendo mtini eri,

²⁰ Gehazi, uja mdumiki wa mlodi Elisha ukaghamba, “Zighana bwana wapo wamlekeria uhu Naamani, Msiria ughende; hata vilambo wamredia wavilegha! Naghema kwa Mlungu uko moyo, nichamnugha nipate kilambo chimu kwake.”

²¹ Nao ukazoya kumnugha. Naamani uendawona mndumu ukimnugha naiseghe ukasea igarenyi kwake ukammara ukighamba, “Welee, ni sere?”

²² Gehazi ukaghamba, “Ee ni sere. Bwana wapo waniduma nikughorie kukaia wachelwa ni wandu wa irika wawi wa kipughi cha walodi wafuma isanga ja mighondinyi ja Efraimu, nao wakulomba kumpatire vibelele elfu idadu va feza na mwarwao awi.”

²³ Naamani ukamzera, “Nakuvoya kuwuse vibelele elfu irandadu.” Ukamvoya na kumfungia magunia awi gha feza elfu irandadu, na marwao awi; ukawidukishira wadumiki wake wawi, nawo wikakiria, Gehazi ukanugha nyuma.

²⁴ Wiendavika mghondinyi andu Elisha orekoghe, ukawidua ija misigo, na kuingira cha nyumbenyi; ukawisigha waja wandu wiwuye, nawo wikawuya.

²⁵ Ukangia nyumbenyi kwa bwana wake Elisha na kukaia kimusi imbiri kwake. Elisha ukamkotia, “Kwafuma hao Gehazi?” Ukatumbulia, “Sighendieghe andu kungi ini mdumiki wako.”

²⁶ Elisha ukamzera, “Kwani roho yapo ndeighendanyeghe na oho ingelo uja mundu userieghe kufuma igarenyi kwake kukumara? Huwo ni ngelo ewada pesa na nguwo, mbuwa ra mizeituni na mizabibu, ng'ondi na ng'ombe, wadumiki wa womi na wa waka?

²⁷ Ola sima ya Naamani ichakuwada oho na kivalwa chako kwa kala na kala.” Nao Gehazi ukafuma imbiri ya Elisha wameria kuwadwa ni sima ielie sa thaluji.