2 WAZURI 4 - Biblia Ilagho Jiboie Kwa Wandu Wose

Elisha kumtesia muka mkiwa usewadie kindo chingi

¹ Muka umu wa kipughi cha walodi ukacha kwa Elisha ukamzera, “Mdumiki wako mumi wapo wafue; na oho kwaichi kukaia uo orekoghe muoboi Mlungu. Ela idana, mndumu oremlawiagha wacha, nao ookunda kuwusa wana wapo wawi wa womi wiwuye wazumba wake.”

² Elisha ukatumbulia, “Da nikubonyeraki? Nighorie koko naki nyumbenyi kwako?” Ukatumbulia, “Siwadie kilambo chingi, ela mavuda matinieri nigho niko nagho chupenyi.”

³ Elisha ukamzera, “Ghenda kulombe vilambo viduu kufuma kwa wambenyu; kulombe vilazi.

⁴ Nao kukurughie nyumbenyi chiaimweri na wana wako; niko kudungirie ivo vilambo agho mavuda, na icho chachua, kuchiwikie mbai.”

⁵ Uja muka ukafuma kwa Elisha; ukaghenda na kukurughia nyumbenyi chiaimweri na wana wake; wana wake wikakaia wikimredia iro chupa ngelo oredungiriagha mavuda.

⁶ Nyuma ya chupa rose kuchua, ukazera mwana wake, “Niredie chupa imu.” Ukatumbulia, “Raasia.” Nao agho mavuda ghikasia.

⁷ Uja muka ukawuya kwa mlodi Elisha ukamghoria; nao ukamzera, “Ghenda kuuze agho mavuda, kulipe ija sile, na agho ghasigharika, kutumie na wana wako.”

Elisha na muka mzuri wa mali wa Shunemu

⁸ Ituku jimu Elisha oreghendieghe Shunemu, andu muka umu mzuri wa mali orekoghe; uja muka ukamkaribisha uche uje vindo. Kufuma ngelo iyo, Elisha ukakaia ukingia aho uje vindo.

⁹ Uja muka ukamzera mumi wake, “Nachawona umundu uidagha aha ni mweli wa Mlungu.

¹⁰ Nndoko dimuaghie chumba naighu, dimmbikie wuli aho, na meza, na kifumbi, na taa; eri ngelo wacha kodu ukaieghe aho.”

¹¹ Nao ituku jimu, Elisha ukacha Shunemu, ukajoka aighu chumbenyi kwake kuhoresha.

¹² Ukamzera mdumiki wake Gehazi uendemmbanga uja Mshunami. Uendammbanga, uja muka ukacha ukakaia kimusi imbiri kwake;

¹³ na Elisha ukamzera Gehazi, “Mkotie ngera wakunde ubonyero ilaghoki kwa wundu ghwa wucha ghose udibonyere kwa kuditesia huwu. Kewada wakunde dimlombie ilagho jimu kwa mzuri angu kwa m'baa wa majeshi.” Ukatumbulia, “Neko nicha putu aghadi ya wandu wapo.”

¹⁴ Elisha ukamkotia Gehazi, “Da ubonyerwa ilaghoki?” Ukatumbulia, “Ndewadie mwana ungi, na mumi nao hoyu waghosia.”

¹⁵ Elisha ukamzera, “Mzere uche aha.” Nao uja muka ukacha na kukaia kimusi amnyangonyi.

¹⁶ Nao Elisha ukamzera, “Kimu sa ichi mwaka ghuchagha, kuchammbwadia mwana wa womi.” Uja muka ukaghamba, “Ii hata bwana wapo, mundu wa Mlungu kuseningire isuwirio ja tee ini mdumiki wako.”

¹⁷ Ela uja muka ukapata kifu; na kimu chija cheni chereghoreloghe ni Elisha mwaka ghunughie, ukava mwana wa womi.

¹⁸ Uja mwana uendazoghua, ituku jimu ngelo ya makuwido, ukamnugha ndee cha mbuwenyi ukwanye na wandu wekuwida.

¹⁹ Ukamzera ndee, “Aba, chongo chapo! Chongo chapo!” Ndee ukamzera umu wa wadumiki wake, “Mghenje kwa mae.”

²⁰ Uendamghenja kwa mae, mae ukammbwadia andambinyi; hata dime ghadi, uja mwana ukafwa.

²¹ Mae ukamduka hata chija chumba cha ighu cha Elisha, ukamrarisha aighu ya wuli, ukafuma na kurugha mnyango.

²² Niko ukammbanga mumi wake ukamzera, “Niredie mdumiki umu na punda, nighende shwa shwa kwa uja mundu wa Mlungu ima niwuye.”

²³ Mumi ukamzera, “Kwaki kughendagha kwake idime, na si ituku jingi ibaa ja Ndima ya Mori Lukombe, hata si ituku jingi ja Sabato?” Ukatumbulia, “Si ilagho jingi.”

²⁴ Nao ukaala punda ukamjoka; ukamzera uja mdumiki wake, “Kumghenje punda shwa-shwa seji idimikagha, kusepunguze mwendo hata nakuzera.”

²⁵ Niko ukazoya charo, ukacha kwa Elisha aja mghondi ghwa Karmeli. Elisha ukammbona ukicha ngelo uko kula; ukamzera mdumiki wake Gehazi, “Zighana Mshunami hoja kimonu;

²⁶ kimbia shwa-shwa kukwane nao, kumkotie, ngera uo na mumi na mwana weko mana.” Ukatumbulia Gehazi kukaia weko mana to.

²⁷ Hata iji wavika mghondinyi andu Elisha orekoghe, ukaghoghoma andonyi na kuwada maghu ghake Elisha. Ela Gehazi ukacha umuinje noko. Elisha ukaghamba, “Msighe! Oko na kuwawa kubaa, na BWANA wanivisa nisemanye sababu yaro.”

²⁸ Uja muka ukaghamba, “Wele neremlombieghe mwana wa womi kwako bwana wapo? Serekuzerieghe kuseningire isuwirio ja tee?”

²⁹ Elisha ukamzera Gehazi, “Rwaa kukumazire, kuwade mzata ghwapo kughende, kukakwana na mndungi kusemroghuo; na mndungi ukakuroghua, kusemdike; nao kukavika, kuwikirie mzata ghwapo wushunyi kwa mwana.”

³⁰ Uja mae mwana ukamzera Elisha, “Naghema kwa Mlungu uko moyo, na kwa oho, kukaia, sichaakusigha anduangi.” Nao Elisha ukawuka ukamnugha.

³¹ Gehazi ukakiria naiseghe; ukaghenda na kuwikiria ghuja mzata wushunyi kwa mwana, ela lwaka lungi ndeloresikirikieghe, hata alama ingi ewonyera mwana kukaia moyo. Kwa huwo ukawuya kukwana na Elisha, ukamzera, “Mwana ndewukie anduangi.”

³² Nao iji Elisha wavika nyumbenyi, ukammbona mwana wararishwa wulinyi kwake ufue.

³³ Ukangia na kukurughia mnyango chiaimweri na uja mwana; ukamlomba BWANA.

³⁴ Ukaghenda na kulala aighu ya uja mwana, ukikwanya momu ghwake na ghwa uja mwana, meso ghake na gha uja mwana, na mikonu yake na ya uja mwana. Hata iji orekughorueghe aighu ya uja mwana, mumbi ghwa mwana ghukazoya kupata iruke.

³⁵ Nao ukawuka, ukasela-sela; ukajoka sena na kukughorua aighu ya uja mwana. Nao mwana ukatinya mando mfungade, ukalavua meso.

³⁶ Elisha ukammbanga Gehazi ukamzera, “Wanga uja Mshunami.” Ukammbanga; nao uja muka uendacha, Elisha ukamzera, “Wada mwana wako.”

³⁷ Nao ukaghwa maghunyi kwake, ukaghoghoma hata andonyi, ukawada mwana wake ukafuma ukaghenda.

Vindo va sumu

³⁸ Elisha ukawuya sena Gilgali, na ngelo iyo korekoghe na njala isangenyi. Hata iji kipughi cha walodi wereserieghe kidombo imbiri kwake, ukamzera mdumiki wake, “Wikiria nyungu mbaa modonyi kudekie kipughi cha walodi supu.”

³⁹ Umu wawo ukafuma; ukaghenda cha mbuwenyi kuwaya mbogha. Ukawona lungu lwa isakenyi, ukawaya vishere varo kwa wungi seji udimie; ukacha na kuvitemeria nyungunyi usevimanyire.

⁴⁰ Nao wikawibeghia wandu ivo vishere wipate kuja. Hata iji werekoghe wikija, wikakema wikighamba, “Ee mundu wa Mlungu, veeka na sumu.” Nawo ndeweredimieghe kuvija.

⁴¹ Elisha ukaghamba, “Redenyi mufu.” Ukaghudunga ugho mufu nyungunyi, ukaghamba, “Wibeghienyi wije.” Nawo wikaja hata ndevicheekaia na ilagho jingi anduangi.

Kuzegha kwa mikate

⁴² Ngelo imu, mndumu ukacha kufuma Baal-shalisha; ukamredia Elisha mikate mirongo iwi ya shairi kufuma kwa mavalo ghake gha imbiri, andwamweri na vanga viwishi va viro mfukonyi kwake. Elisha ukaghamba, “Neka wandu wije.”

⁴³ Ela mdumiki wake ukaghamba, “Nidima wada kuwineka wandu ighana vindo ivi viwikate?” Elisha ukawuria kughora, “Neka wandu vindo wije; angu BWANA waghamba, Wichaja hata wisighare.”

⁴⁴ Nao ukawineka. Wikaja hata wikasighara kara kara na ilagho ja BWANA.