2 WAZURI 3 - Biblia Ilagho Jiboie Kwa Wandu Wose

Wuda aghadi ya Israeli na Moabu

¹ Mwaka ghwa ikumi na wunyanya ghwa kubonya nguma kwa Jehoshafati mzuri wa Juda, nigho Jehoramu mwana wa Ahabu uzoe nagho kubonyera Israeli nguma aho Samaria. Ukabonya nguma kwa miaka ikumi na iwi.

² Ukabonya mawiwi imbiri ya BWANA, ela si karakara na ndee na mae anduangi; kwa kukaia uo oreinjireghe rija nguro retasa Baali rerewikiloghe ni ndee.

³ Elaima sena orewadaneghe na kaung'a ra Jeroboamu mwana wa Nebati, kwa iro, orewishekerieghe Israeli kungia kaung'enyi, hata nderekutengieghe naro anduangi.

⁴ Mzuri Mesha wa Moabu orekoghe mundu ofugha ng'ondi; nao ukakaia ukilipa kwa mzuri wa Israeli wana wa ng'ondi elfu ighana jimweri, na mafuri gha bauru elfu ighana jimweri kula mwaka.

⁵ Ela nyuma ya kifwa cha Ahabu, mzuri wa Moabu ukamlegha mzuri wa Israeli.

⁶ Niko Mzuri Jehoramu ukafuma Samaria na kukwanya Israeli yose.

⁷ Ukaduma momu kwa Jehoshafati mzuri wa Juda ukighamba, “Mzuri wa Moabu wamerie kunilegha; da kucha dilo nao?” Jehoshafati ukatumbulia, “Nichacha. Ini ni sa oho kumoni, na wandu wapo ni wandu wako, na farasi rapo ni rako.”

⁸ Ukakotia, “Dimaria chia iao?” Jehoramu ukatumbulia, “Diamaria chia ya kireti cha Edomu.”

⁹ Niko mzuri wa Israeli ukafuma, chiaimweri na mzuri wa Juda na mzuri wa Edomu wikaghenda. Nyuma ya kumara mara kwa matuku mfungade, wikasirilwa ni machi, hata ghangi ndegheresigharikieghe kwa wundu ghwa wandu na kwa nyamandu wori.

¹⁰ Niko Jehoramu mzuri wa Israeli ukaghamba, “Ai! Huwu Mlungu waadikwanya isi awa wazuri wadadu upate kudingira mikonunyi kwa mzuri wa Moabu!”

¹¹ Mzuri Jehoshafati ukaghamba, “Welee, mlodi ungi wa BWANA ndeko aha dipate kukotia njama kwa BWANA?” M'baa umu wa mzuri wa Israeli ukatumbulia, “Elisha mwana wa Shafati oko aeni aha; nuo orekoghe mdumiki wa Elija.”

¹² Mzuri Jehoshafati ukaghamba, “Uo oko na ilagho ja BWANA.” Niko mzuri wa Israeli, na Mzuri Jehoshafati, na mzuri wa Edomu, wikasea cha kwa Elisha.

¹³ Elisha ukamzera mzuri wa Israeli, “Siwadie ilagho jingi jekubonyera. Ghenda kwa walodi wa ndeyo na mayo.” Mzuri wa Israeli ukamzera, “BWANA nuo wadiwanga wazuri wadadu, eri udingire mikonunyi kwa mzuri wa Moabu.”

¹⁴ Elisha ukaghamba, “Naghema kwa BWANA wa majeshi uko moyo, uo nimdumikiagha, ngera simtalieghe Jehoshafati mzuri wa Juda, kumangu sakuzighanagha hata kukuwona.

¹⁵ Ela idana niredie mkabi kinubi.” Nao iji m'bori wazoya kukaba kinubi chake, ndighi ra BWANA rikamchea Elisha,

¹⁶ ukaghamba, “BWANA waghamba huwu, ‘Nichajibonya iji ivongo jiomie jichulo ni viriwa.

¹⁷ Kwa kukaia ndemchaawona mbeo ingi ikiweta, hata vua ingi ndeichaanya, ela ijo ivongo jichachulwa ni machi munyo chiaimweri na mfugho renyu na nyamandu renyu.’”

¹⁸ Elisha ukachuria kughora, “Iji ni ilagho itini putu kwa BWANA, na huwo sena ucham'bonya muwisime Wamoabu.

¹⁹ Ngome rawo rose mchariwusa, na kula muzi ghuboie, kula mudi ghuboie mchaghudema, na kuriwa ndoria rose ra machi; na mbuwa rawo rose riboie mcharinona kwa kurikumba magho.”

²⁰ Nakesho yaro, ngelo efunya kizongona cha nakesho, wikawona machi ghikicha kufuma Edomu, hata isanga jose jikachulwa ni machi.

²¹ Hata iji Wamoabu wasikira kukaia wazuri wadadu wacha kulwa nawo, wikawangana wose awo widimagha kurwa maswagha, kufuma mtini wawo hata m'baa wawo; wose wikawangwa na kuwikwa mwanonyi.

²² Nao iji Wamoabu wawuka kokesho kio, na iruwa jabuka jiking'ala-ng'ala aighu ya machi, wikaghiwona agho machi naimbiri kwawo ghatinika sa bagha.

²³ Nawo wikaghamba, “Ija ni bagha; agha majeshi gha wazuri wadadu walwa wikabwaghana weni na weni; okenyi Wamoabu, nndokonyi diendewada vilambo.”

²⁴ Ela iji werevikieghe kambinyi, Waisraeli wikawuka na kuwikaba; wikawiwinga na kuwibwagha Wamoabu iji werekoghe wikikimbia.

²⁵ Wikaighusha mizi yawo, na kukumba magho andenyi ya kula mbuwa erekoghe inorie, hata magho ghikachua. Wikariwa ndoria rose ra machi, na kudema midi yose iboie; ghikaasigharika magho ghiekeri aho isanga ja Kir-haresethi. Wandu wekumba vikuza wikaghumara ugho muzi na kughuwada.

²⁶ Mzuri wa Moabu uendawona kukaia uasimwa ukawada wandu maghana mfungade welwa na chufu, ukawingiria wamaiza kwa kuidiria kwa mzuri wa Edomu, ela ndeweredimieghe anduangi.

²⁷ Niko ukammbwada mwana wake wa womi um'baa, nao nuo orewadagha wuzuri wulalo ghwake; ukamfunya ukaie kizongona chekora aighu wurighenyi ghwa muzi, kwa mlungu ghwa Moabu. Waisraeli wikajokwa ni machu loli loli, wikawuya nyuma na kughala kula mundu nyumbenyi kwake.