2 WAZURI 23 - Biblia Ilagho Jiboie Kwa Wandu Wose

Josia kukutanya na wutasi ghwa kisezi

¹ Nao Mzuri Josia ukawiwanga wandu wose wa Juda na Jerusalemu.

² Mzuri ukajoka Hekalunyi andwamweri na wandu wose wa Juda na wa Jerusalemu na wakohani, na walodi, na wandu wose wa ighu na wa ndonyi, ukashoma chija chuo cherewonekieghe andenyi ya Hekalu wikisikira.

³ Mzuri ukakaia kimusi kaavui na nguro, ukabonya ilaghano kwa BWANA, jemnugha na kuwadia memu yake, na wushuhuda ghwa memu yake kwa ngolo yake yose, na kwa roho yake yose; na kuwadia malaghano ghake sa iji ghiandikilo sharienyi andenyi ya icho chuo; na wandu wose wikarumiriana kwa agho malaghano.

⁴ Niko Mzuri Josia ukamlaghira Mkohani M'baa Hilkia, na wakohani watini wake, na walindiri wa mbenge ya Hekalu, wifunye vilambo vose vingirilo Hekalunyi kwa wundu ghotasa Baali, na ghuja mlungu ghwa waka Ashera, na nyerinyeri; ukavikora shighadi ya Jerusalemu vololonyi ya Kidroni, na kudwa ivu jaro cha Betheli.

⁵ Ukawiinja waja wakohani wetasa milimu werewikiloghe ni wazuri wa Juda kwa wundu ghofukira marumba andu kotasira milimu mighondinyi, mizinyi ya Juda, na mbai mbai ya Jerusalemu. Na wakohani awo weremfukirieghe Baali marumba, na iruwa, na mori na nyerinyeri mbaa na ndini na majeshi ghose gha mlungunyi ukawiinja.

⁶ Ukainja fwana ya ghuja mlungu ghwa waka Ashera erewikiloghe andenyi ya Hekalu, ukaifunya cha shighadi ya Jerusalemu, vololo ya Kidroni. Ukaikora na kuichana-chana hata ikawuya teri; na teri yaro ukaidia aho makaburinyi gha wandu wose.

⁷ Ukarinona nyumba ra malaya gha womi rereaghiloghe andenyi ya Hekalu, andu waka werekoghe wikiluka mapazia gha Ashera.

⁸ Ukawireda wakohani wose Jerusalemu kufuma mizi ya Juda, ukakunona-nona andu kotasira milimu mighondinyi, aho wakohani werekoghe wikifukiria marumba kufuma Geba hata Beer-sheba; ukachikanya andu kotasira milimu aho mbengenyi ya Joshua, uo m'baa wa muzi, korekoghe luwaru lwa mkonu ghwa kiwaka ghwa iyo mbenge mbaa ya muzi iji mundu wakangia.

⁹ Elaima awo wakohani wa andu kotasira mighondinyi ndewererumiriloghe kudumika madhabahunyi gha BWANA aho Jerusalemu, ela werekoghe wikija mikate isewadie chachu kufuma kwa waruna.

¹⁰ Mzuri Josia ukalusha Tofethi wulalo ghotasira milimu, ghuko vololonyi ya wana wa Hinomu, eri mndungi usewuefunya mwana ungi wake kizongona chekora, kwa ghuja mlungu Moleki.

¹¹ Ukariinja rija farasi rerewikiloghe wakfu ni wazuri wa Juda kwa wundu ghotasa iruwa; aho mbengenyi ya Hekalu kaavui na chumba cha Nathani-meleki uo orekoghe m'baa; ukaghikora agho magare gherewikiloghe kwa wundu ghotasa iruwa.

¹² Na madhabahu ra Ahazi rerekoghe aighu ya chumba cha ighu, iro rerebonyeroghe ni wazuri wa Juda; na iro rerebonyeroghe ni Manase awazenyi iwi ra Hekalu, rerechikanyiroghe ni Mzuri Josia, ukarichana-chana na kudia teri yaro modenyi ghwa Kidroni.

¹³ Mzuri Josia ukakulusha aho andu kotasira milimu mighondinyi korebonyeroghe ni Solomoni, mzuri wa Israeli aho kusinyi ya Mghondi ghwa Kunoneka kwa wundu ghwa mlungu ghwa waka Ashtorethi ugho wuchafu ghwa Wasidoni na Kemoshi, ugho wuchafu ghwa Moabu, na Moleki, ugho wuchafu ghwa Waamoni.

¹⁴ Mzuri Josia ukarichikanya rija nguro ra magho vipande vipande, na kubara ghuja mlungu ghwa waka Ashera; ukachura wulalo ghwaro na maindi gha wandu.

¹⁵ Sena Mzuri Josia ukakunona aja andu kotasira milimu mighondinyi koreaghiloghe Betheli ni Jeroboamu mwana wa Nebati, uo orewishekerieghe Waisraeli kungia kaung'enyi; ukainona hata madhabahu yake wori, na kubara-bara magho gharo hata ghikawuya teri; ukakora fwana ya ghuja mlungu ghwa waka Ashera.

¹⁶ Niko Josia ukaghaluka na kuwona makaburi aighu mghondinyi. Ukaduma wandu wiendefunya maindi gha wandu aho, ukaghikora aighu madhabahunyi na kuilusha kunughana na ilagho ja BWANA jereghoreloghe ni mundu wa Mlungu uo orefunyireghe wulodi aighu ya maza iro.

¹⁷ Niko mzuri ukakotia, “Niki chija niwonagha akimonu aja?” Waja wandu wa muzi wikamtumbulia, “Ni kaburi ya uja mlodi orefumieghe Juda ukafunya wulodi aighu ya iri maza kwawuyabonya aha Betheli aighu ya madhabahu.”

¹⁸ Mzuri ukaghamba, “Uo mleke, mndungi usefunye maindi ghake.” Nao wikaghileka maindi ghake, chiaimweri na gha mlodi orefumieghe Samaria.

¹⁹ Hata na andu kotasira mighondinyi korewikiloghe ni mzuri wa Israeli andenyi ya mizi ya Samaria, wikimvavira na kummbusira BWANA machu, Josia ukakuinja karakara seji orebonyereghe Betheli.

²⁰ Ukawibwagha wakohani wose wa andu kotasira milimu mighondinyi aighu ya madhabahu, ukakora maindi gha wandu aighu yaro, na kuwuya Jerusalemu.

Josia kubonya Ndima ya Pasaka

²¹ Mzuri Josia ukawilaghira wandu wibonye Pasaka, kwa wundu ghwa BWANA Mlungu wawo; sa iji koni ilaghirilo andenyi ya icho chuo cha ilaghano.

²² Kwa kukaia ndekubonyekie Pasaka ingi sa iyo, kufuma matuku gha watanyi werekoghe wikiwitanya Israeli hata matuku gha Wazuri wa Israeli na Wazuri wa Juda;

²³ ela mwaka ghwa ikumi na wunyanya ghwa kubonya nguma kwa Josia, niko Pasaka iyo erebonyeroghe Jerusalemu.

Maghaluso mazima gherebonyeroghe ni Josia

²⁴ Sena Josia ukawiinja wandu welomba njama kwa roho ra wafu, na wasawi na fwana retaswa, na milimu, na maza ra wuchafu rose rerewonekieghe andenyi ya isanga ja Juda, na andenyi ya Jerusalemu; eri upate kughimangisha malagho gha chuo chereshomeloghe ni mkohani, icho cherewonekieghe andenyi ya Hekalu.

²⁵ Ndekorewonekieghe mzuri ungi ofwananishwa na Josia, uo oremghalukieghe BWANA kwa ngolo yake yose, na kwa roho yake yose, na kwa ndighi rake rose, kunughana na Sharia ya Musa; hata sena ndekorewonekieghe mzuri ungi nyuma yake ofwananishwa nao.

²⁶ Ela machu gha BWANA aighu ya Juda ndeghereghalukieghe anduangi kwa wundu ghwa kuvavirwa ni mabonyo ghizamie gha Manase.

²⁷ BWANA ukaghamba, “Nichamuinja Juda nisemmboneghe, sa iji koni neremuinjireghe Israeli, nani nichaghulegha ugho muzi ghwa Jerusalemu nereghusaghueghe ngighamba irina japo jichakaia aho.”

Kutua kwa kubonya nguma kwa Josia

²⁸ Mabonyo ghose Josia oreghibonyereghe ghaandikilo andenyi ya Chuo cha Malagho gha Ngelo cha Wazuri wa Juda.

²⁹ Ngelo rake, Mzuri Neko mzuri wa Misri, orejokieghe kwa mzuri wa Waashuru hata Moda ghwa Eufrate; na Mzuri Josia ukasea kulwa nao, Farao Neko uendammbona ukam'bwagha aho Megido.

³⁰ Wabaa wake wikadwa mumbi ghwake na igare kufuma Megido, na kughureda Jerusalemu; wikaghurika kinenyi chake cheni. Waisanga wikammbwada mwana wake Jehoahazi, wikamshinga mavuda na kum'bonya mzuri wulalo ghwa ndee.

Mzuri Jehoahazi wa Juda

³¹ Jehoahazi orekoghe mundu wa irika ja miaka mirongo iwi na idadu iji orezoyagha kubonya nguma. Ukabonya nguma Jerusalemu kwa meri idadu. Mae orewangwagha Hamutali mwai wa Jeremia wa muzi ghwa Libna.

³² Ukabonya mawiwi imbiri ya BWANA karakara na weke ndee.

³³ Farao Neko ukamfunga aja Ribla isanga ja Hamathi, eri usebonye nguma Jerusalemu; ukawilawia wandu wa isanga ja Juda kodi ya kilo elfu idadu na maghana ana ra feza, na kilo mirongo idadu na inya ra dhahabu.

³⁴ Mzuri Neko ukabonya Eliakimu mwana wa Josia ukaie mzuri wa Juda wulalo ghwa ndee Josia; ukajighalusa irina jake jiwuye Jehoiakimu; ukamwinja Jehoahazi na kumghenja Misri, ukafwa aho.

Mzuri Jehoiakimu wa Juda

³⁵ Niko Jehoiakimu ukafunya feza na dhahabu kwa Mzuri wa Misri, iro orerilawirieghe kwa waisanga kunughana na mtalo ghorekundiloghe kwa nguma ya mzuri. Ukawagha iyo feza na dhahabu kwa waisanga kufuma kwa kula mundu kunughana na kipimo unekelo chefunya kodi kwa Farao Neko.

³⁶ Jehoiakimu orekoghe mundu wa irika ja miaka mirongo iwi na misanu ingelo orezoyagha kubonya nguma. Ukabonya nguma Jerusalemu kwa miaka ikumi na ghumweri. Irina ja mae orewangwagha Zebida mwai wa Pedaia wa isanga ja Ruma.

³⁷ Ukabonya mawiwi imbiri ya BWANA karakara na ghose gherebonyeroghe ni weke ndee.