2 WAZURI 21 - Biblia Ilagho Jiboie Kwa Wandu Wose

Mzuri Manase wa Juda

¹ Manase orekoghe mundu wa irika ja miaka ikumi na iwi ngelo orezoyagha kubonya nguma; ukabonya nguma Jerusalemu kwa miaka mirongo misanu na isanu. Irina ja mae orewangwagha Hefizba.

² Ukabonya maza rizamie imbiri ya BWANA, sa iro mbari ra wandu rerewingiloghe ni BWANA imbiri ya Israeli.

³ Kwa kukaia oreaghieghe sena andu kotasira milimu mighondinyi korenoneloghe ni ndee Hezekia, ukaagha madhabahu kwa wundu ghwa Baali, na kubonya fwana ra ghuja mlungu ghwa waka Ashera wori, sa iji Ahabu mzuri wa Israeli orebonyereghe, ukatasa nyerinyeri na kuridumikia.

⁴ Ukaagha madhabahu ya milimu andenyi ya Hekalu aho Jerusalemu, aeni BWANA oreghorieghe niko uchaajiwika Irina jake utasoghe;

⁵ sena ukaagha madhabahu kwa wundu ghwa nyerinyeri awazenyi iwi ra Hekalu.

⁶ Ukamfunya mwana wake ukaie kizongona chekora, ukakufundisha kulaghua na kurighita na kulomba njama kwa wandu wa pepo na wasawi; ukam'bonyera BWANA kaung'a na kum'bonya ujoko ni machu.

⁷ Ukawika ghuja mlungu ghwa waka Ashera andenyi ya Hekalu icheni BWANA oremzerieghe Daudi na mwana wake Solomoni, “Nichajiwika Irina japo andenyi ya Hekalu ihi na andenyi ya Jerusalemu iyo nereisaghueghe aghadi ya mbari ra Israeli kwa kala na kala.

⁸ Hata sichaawisigha Israeli wilunguwe-lunguwe kwa kufuma iji isanga nerewinekieghe weke ndee; bora tu wikulindie kubonya sa iji koni nawilaghira, na kara kara na sharia iro neremnekieghe Musa mdumiki wapo.”

⁹ Ela ndeweresikireghe; na Manase ukawilongoza kubonya wuwiwi kuchumba iro mbari ra wandu BWANA oreritoteshereghe imbiri ya wandu wa Israeli.

¹⁰ Nao BWANA ukawizera wadumi wake walodi,

¹¹ “Kwa kukaia Manase mzuri wa Juda wabonya malagho ghizamie kuchumba, na kubonya maza mbiwi kuchumba ghose gherebonyeroghe ni Waamori werekoghe imbiri kwake hata washekeria Juda kubonya kaung'a etasa milimu wokoni,

¹² ini BWANA, Mlungu wa Israeli naghamba kukaia, nichareda wuwiwi ghuchumbie aighu ya Jerusalemu na Juda, ugho hata mundu ukaghusikira uchaaturukia.

¹³ Nichaikaba Jerusalemu sa iji koni nereikabieghe Samaria, na kivalwa cha Ahabu; nani nichainja wandu wa Jerusalemu seji mundu upangusagha sahani, na kuipurughusa.

¹⁴ Nani nichawikumba masighariko gha wandu wapo noko, na kuwingira mikonunyi kwa wamaiza wawo, nawo wichawuya wandu wedwalwa wunyika ni wamaiza wawo wose;

¹⁵ kwa kukaia wabonyere wuwiwi imbiri kwapo na kunibonya nijoko ni machu ghapo kufuma ituku weke ndee werefumieghe Misri hata linu.”

¹⁶ Aighu ya agho, Manase orebwaghieghe wandu wengi wisewadie makosa ghangi, hata chia ra Jerusalemu rikachulwa ni bagha ii chia na ii chia; kula na iro kaung'a, orewishekerieghe wandu wa Juda kungia kaung'enyi na kubonya mawiwi imbiri yapo.

¹⁷ Idana Mabonyo ghose gha Manase oreghibonyereghe na iro kaung'a oreribonyereghe raandikilo andenyi ya Chuo cha Malagho gha Ngelo cha Wazuri wa Juda.

¹⁸ Manase ukafwa sa weke ndee, ukarikwa ngomenyi kwake, iyo mbuwa ya Uza; na mwana wake Amoni ukabonya nguma wulalo ghwake.

Mzuri Amoni wa Juda

¹⁹ Amoni orekoghe mundu wa irika ja miaka mirongo iwi na iwi iji orezoyagha kubonya nguma. Ukabonya nguma Jerusalemu kwa miaka iwi. Mae orewangwagha Meshulemethi mwai wa Haruzi wa isanga ja Jotba.

²⁰ Ukabonya mawiwi imbiri ya BWANA sa iji koni ndee Manase orebonyereghe.

²¹ Ukanugha ija chia cheni ndee orenughieghe, na kutasa milimu sa ndee na kuidumikia.

²² Ukamsigha Mlungu wa weke ndee, hata nderebonyereghe seji BWANA ukunde anduangi.

²³ Wabaa wa Amoni wikabonya sheshe aighu yake, na kum'bwagha andenyi ngomenyi kwake.

²⁴ Ela waisanga wikabwagha awo wandu wose werebonyereghe sheshe aighu ya Mzuri Amoni, nawo wikammbika mwana wake Josia ukaie mzuri wulalo ghwake.

²⁵ Mabonyo ghose gha Amoni oreghibonyereghe, ghaandikilo andenyi ya Chuo cha Malagho gha Ngelo cha Wazuri wa Juda.

²⁶ Ukarikwa kaburinyi kwake, andenyi ya mbuwa ya Uza, na mwana wake Josia ukabonya nguma wulalo ghwake.