2 WAZURI 2 - Biblia Ilagho Jiboie Kwa Wandu Wose

Mlungu kumdwa Elija cha mlungunyi

¹ Ngelo Mlungu orekundieghe kumdwa Elija cha mlungunyi kwa kikulukulu, Elija na Elisha werekoghe wikighenda chienyi wafuma Gilgali.

² Elija ukamzera Elisha, “Kaia aha, kwa kukaia BWANA waniduma nighende Betheli.” Ela Elisha ukaghamba, “Naghema kwa Mlungu uko moyo, na kwa oho, kukaia, sichaakusigha anduangi.” Wikaseanya wose cha Betheli.

³ Nao kipughi cha walodi, awo werekoghe Betheli, wikacha kwa Elisha wikamzera, “Keni kwamanya angu idime iji BWANA uchamuinja bwana wako kwako?” Elisha ukaghamba, “Ee namanya, nyamenyi kima.”

⁴ Elija ukamzera Elisha, “Idana nakulomba kukaie aha, kwa kukaia BWANA waniduma nighende Jeriko.” Ela ukatumbulia, “Naghema kwa Mlungu uko moyo, na kwa oho, kukaia, sichaakusigha anduangi.” Niko wikasea cha Jeriko.

⁵ Kipughi cha walodi awo werekoghe Jeriko wikasoghoda kaavui na Elisha wikamzera, “Keni kwamanya angu idime iji BWANA uchamuinja bwana wako kwako?” Elisha ukaghamba, “Ee namanya, nyamenyi kima.”

⁶ Elija ukamzera, “Nakulomba kukaie aha kwa kukaia BWANA waniduma nighende Jordani.” Ela ukatumbulia, “Naghema kwa Mlungu uko moyo, na kwa oho, kukaia, sichaakusigha anduangi.” Wikachuria kughenda imbiri wose wawi.

⁷ Wikanughwa ni kipughi cha walodi mirongo misanu, wikakaia kimusi kakula kufuma kwawo ingelo werekaieghe kimusi aho Jordani.

⁸ Elija ukawada shuka yake, ukaiwirira na kughikaba machi; machi ghikadumbuka mafungu awi, hata wose wawi wikameria kuida andu kuomie.

⁹ Nyuma ya kuruwuka, Elija ukamzera Elisha, “Lomba icho kukunde nikubonyere imbiri niseinjiro kwako.” Elisha ukaghamba, “Nakulomba kunineke ifwa jekaia na mafungu awi gha roho yako.”

¹⁰ Elija ukaghamba, “Kwalomba ilagho jikurie, ela kukaniwona ingelo nakainjwa kwako, kuchapata; ela ikakaia ndekuniwonagha, ndekuchaapata.”

¹¹ Hata iji werekoghe wikidedanya, igare ja modo jikurudulwagha ni farasi ra modo jikacha na kuwitanya; Elija ukadwalwa cha mlungunyi kwa mbeo ya kikulukulu.

¹² Elisha ukawona na kukema, “O aba ee, o aba ee! Mtesia na mlindiri wa Israeli!” Nao nderemmbonieghe sena anduangi. Elisha ukarashua nguwo rake kwa wasi.

¹³ Nao ukashoa ija shuka ya Elija erempotokieghe ukawuya na kukaia kimusi modenyi ghwa Jordani.

¹⁴ Niko ukawada ija shuka ya Elija erempotokieghe, ukaghikaba ghaja machi ukighamba, “Uo BWANA, Mlungu wa Elija oko hao?” Umeria kughikaba ghaja machi, ghikadumbuka ghadi na ghadi; Elisha ukaruwuka.

¹⁵ Kipughi cha walodi awo werekoghe Jeriko wiendammbona ukiruwuka cha kwawo, wikaghamba, “Roho wa Elija wamkaria Elisha.” Wikacha kummara; wikaghoghoma imbiri kwake hata andonyi,

¹⁶ wikamzera, “Ola isi wadumiki wako deko aha wandu wa irika mirongo misanu wiko na ndighi; dakulomba kudineke rusa diendemlola bwana wako, kewada roho wa BWANA wamduka na kummbika aighu ya mghondi ghumu angu vololo imu.” Ukawizera, “Msewidume,”

¹⁷ Ela wikamshingira hata ukarumiria, ukawileka wighende. Wikaghenda wandu mirongo misanu, wikamlola Elija kwa matuku adadu, ela ndeweremmbonieghe anduangi.

¹⁸ Wikawuya kwa Elisha, uo orekoghe ukiwiweseria Jeriko; nao moni ukawizera, “Nechi nemzerieghe mseghende.”

Weke mwakilimbiti wa Elisha

¹⁹ Wandu wamu wa muzi ghwa Jeriko wikamzera Elisha, “Zighana bwana muzi ughu seji ghuboie, sa iji koni kwawuyaghuwona; ela machi gharo ndeghiboie, na isanga ndejine mavalo ghangi.”

²⁰ Elisha ukaghamba, “Niredienyi bakuli mbishi mwaidunga chumbi andenyi.” Wikamredia.

²¹ Niko Elisha ukaghenda andu ndoria yaro iko ukadunga icho chumbi ukighamba, “BWANA waghamba huwu, ‘Nameria kughiboisa machi agha, nagho ndeghichaareda kifwa, hata kuibonya ndoe isowe mavalo.’”

²² Kufuma ituku ijo, agho machi ghikaboa hata idime, sa iji koni Elisha oreghorieghe.

²³ Nao Elisha ukafuma Jeriko ukaghenda Betheli; hata iji orekoghe ukighenda chienyi wana wamu watini wa womi wifumie mzinyi wikamsarighia na kumdema sare wikighamba, “Ghenda noko mwakangalu ungi! Ghenda noko mwakangalu ungi!”

²⁴ Elisha ukaghaluka nanyuma ukawiwona; ukawiwasira njowe kwa irina ja BWANA, na vibarabara va waka viwi vikafuma kilembenyi na kuwirashua-rashua wana wa womi mirongo ina na wawi.

²⁵ Uendafuma aho, ukajoka Mghondi ghwa Karmeli, na kuwuya Samaria.