2 WAZURI 19 - Biblia Ilagho Jiboie Kwa Wandu Wose

Mzuri kulomba njama ya Isaya

¹ Hezekia uendasikira agho malagho, ukarashua nguwo rake kwa wasi, ukarwa nguwo ra magunia na kughenda Hekalunyi kwa BWANA.

² Ukawiduma Eliakimu, uo orekoghe mzighaniri wa ngome ya mzuri, na Shebna uo orekoghe karani, na wakohani wa kala wighende kwa Isaya mwana wa Amozi;

³ wimzere, “Hezekia waghora, idime ni ituku ja wasi na ja masholio, sena jefusha waya. Deeka sa muka ukumbagha lufu, usewadie ndighi reva.

⁴ Kewada BWANA Mlungu wako wasikira agho malagho ghose ghaghorwa ni m'baa wa majeshi gha Ashuru, uo wadumwa ni mzuri wa Ashuru kumsholia Mlungu uko moyo, nao ughikemie agho malagho; kwa huwo lomba Mlungu kwa wundu ghwa agho masighariko gha wandu wedu.”

⁵ Nao iji wadumiki wa Mzuri Hezekia wacha kwa Isaya,

⁶ Isaya ukawizera, “Mzerenyi bwana onyu huwu: ‘BWANA waghamba huwu, Kusakeobua agha malagho kwaghisikira wadumiki wa mzuri wa Ashuru wikinisholia nagho.

⁷ Ola nichamngiria roho esikira malagho gha ighu-ighu, hata ghim'bonye ukimbie na kuwuya cha isangenyi jake; nao uchabwaghwa kwa lufu ahoeni isangenyi jake.’”

Waashuru kuturusa sena

⁸ Nao uja m'baa wa majeshi gha Ashuru ukawuya, ukamkua mzuri wa Ashuru ukilwa na muzi ghwa Libna; kwa kukaia orekoghe waghorelwa angu mzuri wafumie Lakishi, niko ukamnugha Libna.

⁹ Hata iji mzuri wa Ashuru wasikira malagho gha Tirhaka mzuri wa Ethiopia kukaia wakufunya kulwa nao, ukaduma momu kwa Hezekia ukighamba,

¹⁰ “Kumghorie Hezekia mzuri wa Juda kukaia usakekalilwa ni Mlungu wake uo wawuyakusaghika nao ukimkalia wei Jerusalemu ndeiwadwagha ni mzuri wa Ashuru kungi.

¹¹ Wasikire seji wazuri wa Ashuru wibonyere masanga ghose, wikighitotesha putu. Da uo ukia?

¹² Iyo milungu ya iro mbari yawikirie? Mbari ritoteshero ni aba ni Gozani, Harani, Resefu, na wandu wa Edeni wikaiagha Telasari.

¹³ Oko hao mzuri wa Hamathi na mzuri wa Arpadi, na mzuri wa mizi ya Sefavaimu, na mzuri wa Hena, na mzuri wa Iva?”

¹⁴ Mzuri Hezekia ukawusa iyo barua mikonunyi kwa awo wadumwa, ukaishoma; ukajoka cha Hekalunyi ya BWANA na kuikuchua imbiri ya BWANA.

¹⁵ Hezekia ukamlomba BWANA ukighamba, “Ee BWANA Mlungu wa Israeli, oho kifumbi chako cha nguma chiko aighu ya makerubi, oho kuekeri kuko Mlungu, aighu ya mawuzuri gha ndoenyi kose, kuumbie mlungunyi na ndoenyi;

¹⁶ degha kudu kwako ee BWANA, kusikire malagho gha Senakeribu, agho ukusholiagha nagho oho Mlungu kuko moyo.

¹⁷ Kwa loli ee BWANA, mzuri wa Ashuru wawitoteshere mbari ra wandu na masanga ghawo;

¹⁸ na kukumba milimu yawo modonyi, angu iserekoghe milungu ingi, ela kazi ra mikonu ya wadamu tu, midi na magho; kwa huwo ikanoneka.

¹⁹ Kwa huwo ee BWANA Mlungu odu, nakuvoya kudikire nao, eri mawuzuri ghose gha ndoenyi ghipate kumanya angu oho ko Mlungu kuekeri ee BWANA.”

Malagho gha Isaya kwa mzuri

²⁰ Niko Isaya mwana wa Amozi ukaduma malagho kwa Mzuri Hezekia seji BWANA Mlungu wa Israeli ughambie kukaia malombi ghake kwamlomba kwa wundu ghwa Senakeribu mzuri wa Ashuru waghisikira;

²¹ nao waghamba huwu aighu yake: “Muzi ghwa Sioni Jerusalemu ghwakumenya na kukuseka; wandu wa Jerusalemu wasughusa vongo vawo kukukimbia oho Senakeribu.

²² “Nani kwamsekagha na kumdukana? Nani kwamdediagha na kumzighana kwa lumenyo? Nechi ni ini Mlungu, Mweli wa Israeli.

²³ Kwanisekie ini BWANA kukitumia wadumwa wako kukaghamba, ‘Kwa magare ghako mengi, kwamerie kujoka koighu mighondinyi, hata mdonyi ghwa Lebanoni; kukaighusha misida yake milacha, na misumbesu yake ighokie kuchumba; kwangirie nokondenyi kula, kwa msidu ghwake ghukambie.

²⁴ Kwakotere visima, na kunywa machi gha kighenyi kukaghiomera na lwau lwa kughu kwako, machi gha meda yose ya Misri.’

²⁵ “Jingi ndekusikire kukaia nereibonyereghe mipango kokala uko? Ngabonya mipango iyo nawuyaikatisha idana, kupate kughalua mizi ya ngome iwue maghacho;

²⁶ ingelo wandu waro weresiriloghe ni ndighi wasilwa putu na kufwa ngolo, wakaia sa miwalwa iko mbuwenyi, sa mghina na sa nyasi ribukie aighu nyumbenyi, na kuomerwa imbiri risezoghue?

²⁷ “Ela nakuichi seji kukaiagha, seji kufumagha na seji kungiagha; na seji kuzamilwagha ni ini.

²⁸ Na kwa kukaia kwazamilwagha ni ini, nani nasikire uko kukuduka kwako, nichakungira koleo mbuonyi kwako, na mkowa momunyi kwako nipate kukuwunja kwa ija chia cheni korechieghe nayo.”

²⁹ Niko Isaya ukamzera Hezekia, “Ihi niyo alama yako ee Hezekia, ughu mwaka kuchaja viro vibukagha na kuzoghua veni, na mwaka ghuchagha kuchaja ivo vibaragha ahoeni; niko mwaka ghwa kadadu kuchawa viro na kukuwida; kuchawa mizabibu na kuja matunda gharo.

³⁰ Na masighariko gha wandu wa Juda, wichawona nicha sa midi idungagha miri na kuva matunda;

³¹ angu agho masighariko gha wandu wichafuma Jerusalemu, na awo wivuvukagha, wichafuma Mghondi ghwa Sioni. Wudimi ghwa BWANA ghuchakatisha ilagho ijo.

³² “Kwa huwo BWANA waghora huwu aighu ya mzuri wa Ashuru, ‘Ndechaangia andenyi ya ughu muzi hata kukumba iwanu aho; ndechaaghucha uko na ngao, hata kughurughaia wurigha naighu yaro anduangi.

³³ Angu uchawuya kwa iyo chia cheni orechieghe nayo, hata na jingi ndechaangia ughu muzi, ini BWANA naghamba.

³⁴ Kwa kukaia nichaghulindia ughu muzi nipate kughukira kwa wundu ghwapo, na kwa wundu ghwa mdumiki wapo Daudi.’”

³⁵ Kio chija, malaika wa BWANA ukaida na kubwagha Waashuru elfu ighana na mirongo wunyanya na isanu werekoghe kambinyi. Hata iji wandu wawuka nakesho kio, wikawona wandu wose wafue.

³⁶ Niko Senakeribu mzuri wa Ashuru ukafuma ukaghala, na kukaia Nineve.

³⁷ Nao iji orekoghe ukitasa andenyi ya hekalu ya mlungu ghwake Nisroki, wana wake Adrameleki na Shareza wikam'bwagha na lufu, wikakimbiria isanga ja Ararati. Na mwana wake Esarhadoni ukabonya nguma wulalo ghwake.