2 WAZURI 18 - Biblia Ilagho Jiboie Kwa Wandu Wose

Mzuri Hezekia wa Juda

¹ Mwaka ghwa kadadu ghwa kubonya nguma kwa Hoshea mwana wa Ela, mzuri wa Israeli, niko Hezekia mwana wa Ahazi mzuri wa Juda orezoeghe kubonya nguma.

² Orekoghe mundu wa irika ja miaka mirongo iwi na misanu ngelo orezoyagha kubonya nguma. Ukabonya nguma Jerusalemu kwa miaka mirongo iwi na ikenda. Mae orewangwagha Abi mwai wa mfwa Zekaria.

³ Ukabonya mecha imbiri ya BWANA karakara na ndee Daudi.

⁴ Ukainja andu kose kotasira mighondinyi, na kuchikanya nguro retasira milimu na fwana ra mlungu ghwa waka Ashera. Hata ija choka ya shaba erebonyeroghe ni Musa ukaibara vipande-vipande; kwa kukaia hata matuku ghaja, wandu wa Israeli werekoghe wikiifukiria ija fwana ya choka marumba, na kuiwanga Nehushtani.

⁵ Orekoghe wamrumiria BWANA Mlungu wa Israeli, hata ndekuwadie mzuri ungi wa wazuri wa Juda orefwananeghe nao kufuma wa kuzoya hata awo wicheenugha nyuma.

⁶ Angu oremazirianeghe na BWANA; hata nderetaneghe nao jingi, ela oreiwadieghe memu iyo BWANA oremlaghirieghe Musa.

⁷ Na BWANA ukakaia nao andu kose oreghendieghe ukawona nicha; ukamlegha mzuri wa Ashuru, hata nderekuwikieghe aisi yake anduangi.

⁸ Ukawikaba Wafilisti hata isanga jose ja Gaza; kufuma mnara gholindia hata ngomenyi ra muzi.

⁹ Mwaka ghwa kana ghwa kubonya nguma kwa mzuri Hezekia, nagho ni mwaka ghwa mfungade ghwa Hoshea mwana wa Ela, Mzuri wa Israeli, niko Shalmaneseri mwana wa Ela, mzuri wa Ashuru orejokieghe kulwa na Samaria; ukaghurughaia ugho muzi,

¹⁰ na kutua kwa miaka idadu, ukaghuwada ugho muzi. Mwaka ghwa karandadu ghwa Hezekia, nagho ni mwaka ghwa ikenda ghwa Hoshea mzuri wa Israeli, muzi ghwa Samaria ghukawadwa.

¹¹ Mzuri wa Ashuru ukawidwa Waisraeli wunyika cha Ashuru, na kuwiwika Hala, kaavui na Moda ghwa Habori, isanga ja Gozani na andenyi ya mizi ya Wamedi.

¹² Maza iri rerebonyekieghe angu Waisraeli wereleghieghe kumsikira BWANA Mlungu wawo, wikabonya makosa ghesigha malaghano ghake, hata sharia rose rerenekeloghe Musa mdumiki wa BWANA; wikalegha putu kurisikira na kuribonya.

Waashuru kuturusa Jerusalemu

¹³ Mwaka ghwa ikumi na inya ghwa kubonya nguma kwa Mzuri Hezekia, Senakeribu mzuri wa Ashuru orejokieghe kuikaba mizi ya ngome ya Juda, ukaiwada.

¹⁴ Hezekia ukaduma momu kwa Senakeribu uko Lakishi ukighamba, “Nabonya makosa, nakulomba kusighe kudikaba, nani nichabonya agho ghose kuchaaghamba.” Nao mzuri wa Ashuru ukamtumbulia Hezekia kwa kumkunda ulipe kilo elfu ikumi ra feza, na kilo elfu imweri ra dhahabu.

¹⁵ Hezekia ukamneka feza yose erewonekieghe Hekalunyi kwa BWANA, na mali yose erekoghe ngomenyi kwa mzuri.

¹⁶ Ngelo iyo Hezekia ukalemua dhahabu yose erekandiloghe minyangonyi ya Hekalu ya BWANA, na iyo orekandieghe moni vizingitinyi varo, ukamneka mzuri wa Ashuru.

¹⁷ Nao mzuri wa Ashuru ukaduma wabaa wa ighu wadadu kufuma Lakishi chiaimweri na ijeshi ibaa, wiche kwa Hezekia aja Jerusalemu. Wiendajoka na kuvika Jerusalemu, wikakaia kimusi aja mkuonyi ghufumagha ndiwenyi ya nalughu, aho chienyi mbaa ya dobi.

¹⁸ Wikammbanga Mzuri Hezekia na wabaa wadadu wa mzuri wikacha; Eliakimu mwana wa Hilkia uo orekoghe mzighaniri wa nyumba ya mzuri, na Shebna uo orekoghe karani, na Joa mwana wa Asafu muandiki.

¹⁹ Nao m'baa wa majeshi ukaghamba, “Ola mzuri m'baa wa Ashuru wamzera Hezekia welee, ‘Keni kwawuyakusaghika naki?

²⁰ Kwadaghesha malagho maduu ghadima kukuneka ndighi relwa wuda? Kwawuyakusaghika nani hata kunileghe ini?

²¹ Zighana kwaawuyakusaghika na Misri mrangi ghufashikie tu, nagho ghwadima kudunga mundu vala uo ughuwadagha; huwo niko Mzuri wa Misri uko kwa kula umu ukusaghikagha nao.

²² Nako mkanizera, “Daawuyakusaghika kwa BWANA Mlungu odu,” welee, suo moni Hezekia uvuchue andu kwake kotasira mghondinyi na ukizera wandu wa Juda na Jerusalemu, “Mchatasa BWANA imbiri ya madhabahu ihi Jerusalemu?”

²³ Idana choo kubonye mapatano na bwana wapo mzuri wa Ashuru; nichakuneka farasi elfu iwi, ikakaia kudimagha kupata wandu werijoka.

²⁴ Kudima wada kusima m'baa wa ijeshi jimweri ja bwana wapo ikakaia kwakusaghika na Misri kwa wundu ghwa magare na wajoki farasi?

²⁵ Na aighu ya agho, kuamanya kujoka kwapo aha naajoka duu kuseko na BWANA? Nechi ni BWANA wanizera, Joka kuwade jija isanga kujitoteshe.’”

²⁶ Nao Eliakimu mwana wa Hilkia, na Shebna, na Joa wikamzera uja m'baa wa majeshi gha Ashuru, “Dakulomba kudedanye nesi wadumiki wako kwa kiteto cha Kiarami, angu dachiichi; kusededanye nesi kwa Kiebrania dikisikirwa ni awandu wiko wurighenyi.”

²⁷ Uja m'baa wa majeshi ukawizera, “Kwani bwana wapo odeniduma nighore agha malagho kwa bwana wako na konyu? Nechi odeniduma nighore na awo wandu wiko wurighenyi wapatwa ni malagho gheja mavi ghawo na kunywa maghocho ghawo.”

²⁸ Nao uja m'baa wa majeshi ukakaia kimusi ukawoka kudeda na lwaka lubaa kwa kiteto cha Kiebrania, “Sikirenyi seji mzuri m'baa wa Ashuru waghamba,

²⁹ ‘Msekalilo ni Hezekia, kwa kukaia ndechaadima kumkira nani.

³⁰ Hezekia usemkalie mkusaghike na BWANA ukimzera loli BWANA uchadikira, hata ughu muzi ndeghuwuswagha ni mzuri wa Ashuru kungi.’

³¹ Msemsikire Hezekia; kwa kukaia mzuri wa Ashuru wamzera huwu, ‘Bonyenyi sere nani mkufunye, niko kula umu onyu uchaaja mzabibu ghwake na mtini ghwake, na kunywa machi kufuma mtunginyi ghwake;

³² hata nacha na kumghenja isanga jifwanane na jenyu, isanga ja viro na divei, isanga ja mikate na mizabibu, isanga ja mizeituni na wuki; mpate kukaia moyo msefo. Msemsikire Hezekia putu ingelo umzeragha wei BWANA uchamkira.

³³ Mwawonie jingi mlungu ghungi ghwa mbari ingi ghuvuvue isanga jake nisejikabe ini mzuri wa Ashuru?

³⁴ Eko hao milungu ya Hamathi na Arpadi? Eko hao milungu ya Sefavaimu na Hena, na Iva? Jingi yakirie Samaria niseikabe?

³⁵ Ni masanga ghiao ghikirilo ni milungu yawo, niseghikabe, nao ikaie wei BWANA uchadima kukira muzi ghwa Jerusalemu niseghukabe?’”

³⁶ Ela awo wandu wikanyama kima; kwa kukaia Mzuri Hezekia orewizerieghe wisemtumbulie hata ilagho.

³⁷ Niko Eliakimu mwana wa Hilkia, uo orekoghe mzighaniri wa ngome ya mzuri, na Shebna, uo orekoghe karani, na Joa mwana wa Asafu muandiki, wikaghenda na nguwo rawo wameria kurirashua kwa wasi, wikamghoria Hezekia malagho ghose ghighorelo ni uja m'baa wa majeshi.