2 WAZURI 16 - Biblia Ilagho Jiboie Kwa Wandu Wose

Mzuri Ahazi wa Juda

¹ Mwaka ghwa ikumi na mfungade ghwa kubonya nguma kwa Peka mwana wa Remalia, mzuri wa Israeli, niko Ahazi mwana wa Jothamu orewurieghe mzuri wa Juda.

² Ahazi orekoghe mundu wa irika ja miaka mirongo iwi ingelo orezoyagha kubonya nguma. Ukabonya nguma Jerusalemu kwa miaka ikumi na irandadu. Nao nderebonyereghe agho ghiko gha hachi imbiri ya BWANA seji ndee Daudi orebonyereghe anduangi;

³ ela ukanugha mabonyo gha wazuri wa Israeli. Na kuchumba oremfunyireghe mwana wake ukaie kizongona chekora kwa milimu karakara na mizango izamie ya iro mbari ra wandu BWANA orewiwingieghe imbiri ya wandu wa Israeli.

⁴ Ukafunya vizongona na kufukira marumba aighu ya andu kotasira milimu mighondinyi, na aisi ya kiju cha kula mudi mmbishi.

⁵ Niko Rezini mzuri wa Siria, na Peka mwana wa Remalia mzuri wa Israeli, wikajoka kubonya wuda Jerusalemu; wikamrughaia Ahazi, ela ndeweredimieghe kumsima anduangi.

⁶ Ngelo iyo, mzuri wa Edomu ukawada muzi ghwa Elathi, ukawiwunjira Waedomu, ukawifunya wandu wa Juda aho, na Waedomu wikakaia andenyi ya ugho muzi hata idime.

⁷ Niko Ahazia ukaduma wadumi kwa Tiglathi-pileseri mzuri wa Ashuru ukighamba, “Ini ne mdumiki na mwana wako; joka kunitesie nifume mikonunyi kwa mzuri wa Siria na mzuri wa Israeli wawuyalwa nani.”

⁸ Ahazi ukawada feza na dhahabu rerekoghe andenyi ya Hekalu ya BWANA, na iro rerekoghe andenyi ya nyumba ya mzuri, ukamdumia mzuri wa Ashuru zawadi.

⁹ Mzuri wa Ashuru ukamsikira, ukaghujokia muzi ghwa Dameshki ukaghuwada; na kudwa wandu waro wunyika hata Kiri; ukam'bwagha Rezini.

¹⁰ Nao iji Mzuri Ahazi waghenda Dameshki kukwana na Tiglathi-pileseri mzuri wa Ashuru, ukawona madhabahu iyo erekoghe Dameshki. Niko Mzuri Ahazi ukamdumiria mkohani Uria mfwano ghwa iyo madhabahu sa iji koni iko chia rose.

¹¹ Na mkohani Uria, ukaagha madhabahu mfwano ghuja ghoni oredumiloghe ni Mzuri Ahazi kufuma Dameshki, imbiri Mzuri Ahazi usechee kufuma Dameshki.

¹² Nao iji mzuri wavika kufuma Dameshki, ukaizighana madhabahu; ukasughuda kaavui nayo, na kujoka aighu yaro.

¹³ Ukafunya kizongona chekora na kizongona cha viro; ukadunga kizongona chake chenywa, ukamichira bagha ya kizongona chake cha mapatano aighu ya iyo madhabahu.

¹⁴ Ukainja ija madhabahu ya shaba erewikiloghe imbiri ya BWANA kufuma aja naimbiri ya nyumba, aja ghadi na ghadi ya ija madhabahu yake na nyumba ya BWANA, ukaiwika cha kaskazinyi ya ija madhabahu mbishi.

¹⁵ Nao Mzuri Ahazia ukamlaghira mkohani Uria ukighamba, “Aighu ya iyo madhabahu mbaa, kufunyeghe vizongona vekora va nakesho, na vizongona va nakenyi, na kizongona cha mzuri chekora na icho cha viro, chiaimweri na kizongona chekora cha wandu wose wa isangenyi, na kizongona chawo cha viro, na icho chenywa; sena kudunge aighu ya iyo madhabahu bagha yose ya kizongona chekora, bagha yose ya kizongona. Ela iyo madhabahu ya shaba ichakaia tu kwa wundu ghwapo nikotieghe malagho aho.”

¹⁶ Nao mkohani Uria ukabonya wokoni sa iji koni ulaghirilo ni Mzuri Ahazi.

¹⁷ Mzuri Ahazi ukadumbua maghu gha ija beseni edungiria machi, na rija njau ra shaba rerekoghe nandonyi yaro kuiwadia, ukaiwika aighu ya igho.

¹⁸ Na chija kiwayo cha Sabato chiko andenyi ya Hekalu, na mnyango ghwa cha shighadi kwa wundu ghwa mzuri, ukaghuinja kufuma Hekalunyi kwa BWANA kwa wundu ghwa kumngola-ngola mzuri wa Ashuru.

¹⁹ Mabonyo ghose gha Ahazi oreghibonyereghe ghaandikilo andenyi ya Chuo cha Malagho gha Ngelo cha Wazuri wa Juda.

²⁰ Ahazi ukafwa sa weke ndee, ukarikwa chiaimweri na weke ndee aja mzinyi ghwa Daudi; na mwana wake Hezekia ukabonya nguma wulalo ghwake.