2 WAZURI 15 - Biblia Ilagho Jiboie Kwa Wandu Wose

Uzia mzuri wa Juda

¹ Mwaka ghwa mirongo iwi na mfungade ghwa kubonya nguma kwa Jeroboamu mzuri wa Israeli, niko Uzia mwana wa Amazia mzuri wa Juda orezoeghe kubonya nguma.

² Orekoghe mundu wa irika ja miaka ikumi na irandadu iji orezoyagha kubonya nguma. Ukabonya nguma Jerusalemu kwa miaka mirongo misanu na iwi. Mae orewangwagha Jekolia ufumie Jerusalemu.

³ Ukabonya mecha imbiri ya BWANA karakara na agho ghose ndee Amazia orebonyereghe.

⁴ Ela sena andu kotasira milimu mighondinyi na kufunya vizongona, na kufukiria marumba ndekoreinjiroghe anduangi.

⁵ Niko BWANA ukamkaba mzuri, ukawadwa ni sima hata ituku ja kufwa kwake; ukadua uekeri andenyi ya nyumba ya chiaro. Mwana wake Jothamu nuo orekoghe mzighaniri wa nyumba yose; ukawibonyera wandu nguma isangenyi.

⁶ Mabonyo ghose gha Uzia oreghibonyereghe ghaandikilo andenyi ya Chuo cha Malagho gha Ngelo cha Wazuri wa Juda.

⁷ Uzia ukafwa sa weke ndee, wikamrika ahoeni mzinyi ghwa Daudi; mwana wake Jothamu ukabonya nguma wulalo ghwake.

Zekaria mzuri wa Israeli

⁸ Mwaka ghwa mirongo idadu na wunyanya ghwa kubonya nguma kwa Uzia mzuri wa Juda, niko Zekaria mwana wa Jeroboamu orebonyereghe nguma aighu ya Israeli aja Samaria kwa meri irandadu.

⁹ Ukabonya mawiwi imbiri ya BWANA karakara na weke ndee; hata nderekutanyireghe na kaung'a ra Jeroboamu mwana wa Nebati, kwa iro orewishekerieghe Israeli kungia kaung'enyi.

¹⁰ Shalumu mwana wa Jabeshi ukaboya sheshe aighu ya Zekaria, ukam'bwagha aho Ibleamu, na kubonya nguma wulalo ghwake.

¹¹ Mabonyo ghose gha Zekaria, ola ghaandikilo andenyi ya Chuo cha Malagho gha Ngelo cha Wazuri wa Israeli.

¹² (Iji jerekoghe ni ilaghiro ja BWANA oremlaghirieghe Jehu ukighamba, “Wana wako wichaseria kifumbi cha nguma hata kivalwa cha kana.” Niko ikakaia wokoni.)

Shalumu mzuri wa Israeli

¹³ Mwaka ghwa mirongo idadu na ikenda ghwa kubonya nguma kwa Uzia mzuri wa Juda, niko Shalumu mwana wa Jabeshi orezoeghe kubonya nguma. Ukabonya nguma Samaria kwa mori ghumweri.

¹⁴ Niko Menahemu mwana wa Gadi ukajoka kufuma Tirza, ukacha Samaria. Ukamkaba Shalumu mwana wa Jabeshi aja Samaria, ukam'bwagha; nao ukabonya nguma wulalo ghwake.

¹⁵ Mabonyo ghose gha Shalumu oreghibonyereghe, na sheshe rake iro oreribonyereghe, raandikilo andenyi ya Chuo cha Malagho gha Ngelo cha Wazuri wa Israeli.

¹⁶ Ngelo iyo, Menahemu ukaikaba Tapua yose kufuma Tirza, angu wiserekufunyireghe kwake; niko orewikabieghe na kuwirashua waka wawo wiko na vifu.

Menahemu mzuri wa Israeli

¹⁷ Mwaka ghwa mirongo idadu na ikenda ghwa kubonya nguma kwa Uzia mzuri wa Juda, niko Menahemu mwana wa Gadi orezoeghe kuwibonyera nguma Israeli. Ukabonya nguma Samaria kwa miaka ikumi.

¹⁸ Ukabonya mawiwi imbiri ya BWANA, hata kwa irangi jake jose nderetaneghe na kaung'a ra Jeroboamu mwana wa Nebati, kwa iro, orewishekerieghe Israeli kungia kaung'enyi.

¹⁹ Niko Pulu mzuri wa Ashuru ukajikaba isanga ja Israeli, na Menahemu ukamneka Pulu talanto elfu imweri ra feza eri umtesie kumangisha wuzuri ghwake.

²⁰ Menahemu orepatireghe pesa iri rose kwa kuwishingira wandu wiko na mali isangenyi kwake, wifunye vibelele va feza mirongo misanu kula umu, wimneke mzuri wa Ashuru. Aho niko mzuri wa Ashuru ukaghaluka na kusigha kusumbua ijo isanga.

²¹ Mabonyo ghose Menahemu oreghibonyereghe ghaandikilo andenyi ya Chuo cha Malagho gha Ngelo cha Wazuri wa Israeli.

²² Menahemu ukafwa sa weke ndee; na Pekahia ukabonya nguma wulalo ghwake.

Pekahia mzuri wa Israeli

²³ Mwaka ghwa mirongo misanu ghwa kubonya nguma kwa Uzia mzuri wa Juda, niko Pekahia mwana wa Menahemu orezoeghe kubonya nguma Israeli; ukabonya nguma Samaria kwa miaka iwi.

²⁴ Ukabonya mawiwi imbiri ya BWANA, hata nderetaneghe na kaung'a ra Jeroboamu mwana wa Nebati, kwa iro, orewishekerieghe Israeli kungia kaung'enyi.

²⁵ M'baa wake wa majeshi Peka mwana wa Remalia ukam'bonyera sheshe na wandu mirongo misanu wa Gileadi; ukam'bwagha Pekahia aja Samaria ngomenyi kwa mzuri, ukabonya nguma wulalo ghwake.

²⁶ Mabonyo ghose gha Pekahia ubonyere ghaandikilo andenyi ya Chuo cha Malagho gha Ngelo cha Wazuri wa Israeli.

Peka mzuri wa Israeli

²⁷ Mwaka ghwa mirongo misanu na iwi ghwa kubonya nguma kwa Uzia mzuri wa Juda, niko Peka mwana wa Remalia orezoyagha kubonya nguma aighu ya Israeli aho Samaria. Ukabonya nguma kwa miaka mirongo iwi.

²⁸ Ukabonya mawiwi imbiri ya BWANA, hata nderetaneghe na kaung'a ra Jeroboamu mwana wa Nebati, kwa iro, orewishekerieghe Israeli kungia kaung'enyi.

²⁹ Matuku gha Peka mzuri wa Israeli, Tiglathi-pileseri mzuri wa Ashuru, ukacha na kuikaba mizi ya Ijoni, Abel-beth-maaka, Janoa, Kedeshi, Hazori, Gileadi, na Galilaya, isanga jose ja Naftali; ukadwa wandu wunyika hata Ashuru.

³⁰ Niko Hoshea mwana wa Ela ukabonya sheshe aighu ya Peka mwana wa Remalia; ukamkaba na kum'bwagha. Ukabonya nguma wulalo ghwake mwaka ghose ghwa mirongo iwi ghwa kubonya nguma kwake Jothamu mwana wa Uzia.

³¹ Mabonyo ghose gha Peka oreghibonyereghe, ghaandikilo andenyi ya Chuo cha Malagho gha Ngelo cha Wazuri wa Israeli.

Mzuri Jothamu wa Juda

³² Mwaka ghwa kawi ghwa kubonya nguma kwa Peka mwana wa Remalia, mzuri wa Israeli, niko Jothamu mwana wa Uzia mzuri wa Juda uzoe kubonya nguma.

³³ Orekoghe mundu wa irika ja miaka mirongo iwi na misanu ngelo orezoyagha kubonya nguma. Ukabonya nguma Jerusalemu kwa miaka ikumi na irandadu, mae orewangwagha Jerusha mwai wa Zadoku.

³⁴ Ukabonya agho gherekoghe gha hachi imbiri ya BWANA, karakara na agho ghose gherebonyeroghe ni ndee Uzia.

³⁵ Elaima ndereinjireghe aja andu kotasira wikakaia mighondinyi; wandu wikakaia wikifunyira vizongona na kufukira marumba mghondinyi.

³⁶ Mabonyo ghose gha Jothamu oreghibonyereghe ghaandikilo andenyi ya Chuo cha Malagho gha Ngelo cha Wazuri wa Juda.

³⁷ Matuku agho, BWANA ukazoya kuduma Rezini mzuri wa Siria na Peka mwana wa Remalia wilo na Juda.

³⁸ Jothamu ukafwa sa weke ndee; ukarikwa chiaimweri na weke ndee mzinyi ghwa Daudi, na mwana wake Ahazi ukabonya nguma wulalo ghwake.