2 WAZURI 13 - Biblia Ilagho Jiboie Kwa Wandu Wose

Mzuri Jehoahazi wa Israeli

¹ Mwaka ghwa mirongo iwi na idadu, ghwa kubonya nguma kwa Joashi mwana wa Ahazia, mzuri wa Juda, niko Jehoahazi mwana wa Jehu orezoeghe kuwibonyera Israeli nguma aho Samaria; ukabonya nguma kwa miaka ikumi na mfungade.

² Ukabonya mawiwi imbiri ya BWANA kara kara na kaung'a ra Jeroboamu mwana wa Nebati, kwa iro orewishekerieghe Israeli kubonya kaung'a; hata uo moni nderekuwikieghe kula naro anduangi.

³ Nao machu gha BWANA ghikawuka aighu ya Israeli, ukawifunya na kuwingira mikonunyi kwa Hazaeli mzuri wa Siria, na kwa Ben-hadadi mwana wa Hazaeli.

⁴ Niko Jehoahazi ukamlomba BWANA, na BWANA ukamsikira; angu orewonieghe seji mzuri wa Siria orewikorongieghe Waisraeli.

⁵ (Kwa huwo BWANA ukawineka Waisraeli mkiri, ukawifunya mikonunyi kwa Wasiria, wikakaia isangenyi kwawo sa iji koni werekoghe.

⁶ Elaima sena ndewerekutanyireghe na kaung'a ra nyumba ya Jeroboamu, iro orewishekerieghe Waisraeli kungia kaung'enyi; wikachuria kukaia andenyi yaro. Hata ndewereinjireghe ija fwana ya mlungu ghwa waka Ashera aja Samaria.)

⁷ Mndungi wa ijeshi ja Jehoahazi nderesigharikieghe, ela wajoki farasi mirongo misanu, magare ikumi na masikari gheghenda na maghu elfu ikumi; kwa kukaia awo wazima werekoghe wose watoteshwa ni mzuri wa Siria, kwa kuwifasha-fasha sa teri.

⁸ Mabonyo ghose ghisigharikie gha Jehoahazi, chiaimweri na agho ughibonyere kwa ndighi mbaa, ghaandikilo andenyi ya Chuo cha Malagho gha Ngelo cha Wazuri wa Israeli.

⁹ Nao Jehoahazi ukafwa sa weke ndee ukarikwa aho Samaria, na mwana wake Joashi ukabonya nguma wulalo ghwake.

Mzuri Jehoashi wa Israeli

¹⁰ Mwaka ghwa mirongo idadu na mfungade ghwa kubonya nguma kwa Joashi mzuri wa Juda, niko Jehoashi mwana wa Jehoahazi orezoeghe kuibonyera Israeli nguma aho Samaria; ukabonya nguma kwa miaka ikumi na irandadu.

¹¹ Nao moni wori ukabonya mawiwi imbiri ya BWANA, hata nderetaneghe na kaung'a ra Jeroboamu mwana wa Nebati, kwa iro orewishekerieghe Waisraeli kungia kaung'enyi, ela ukachuria kuribonya.

¹² Mabonyo ghose gha Jehoashi ghisigharikie, na agho ubonyere, na wudimi ghwake gholwa na Amazia mzuri wa Juda, ghaandikilo andenyi ya Chuo cha Malagho gha Ngelo cha Wazuri wa Israeli.

¹³ Niko Jehoashi ukafwa sa weke ndee, ukarikwa Samaria andu wazuri wa Israeli wirikilwagha; na Jeroboamu ukabonya nguma wulalo ghwake.

Kifwa cha Elisha

¹⁴ Mlodi Elisha ukalwala wukongo ugho ghocheem'bwagha, na Jehoashi mzuri wa Israeli ukasea kummbona; ukamlilia ukighamba, “O aba ee, O aba ee! Mtesia na mlindiri wa Israeli!”

¹⁵ Elisha ukamzera, “Wada ndana na mawanu;” ukawada ndana na mawanu.

¹⁶ Elisha ukamzera mzuri wa Israeli, “Lunganyira iwanu;” nao ukalunganyira. Elisha ukawikiria mikonu yake aighu ya mikonu ya mzuri;

¹⁷ ukamzera, “Rughua idirisha ja luwaru lwa mashariki;” ukarughua. Niko Elisha ukamzera, “Oke kumba!” Nao ukakumba. Elisha ukaghamba, “Ni iwanu ja BWANA ja wusimi, iwanu ja wusimi aighu ya Wasiria. Kuchalwa na Wasiria aja Afeki hata kuwimerie.”

¹⁸ Nao ukamzera, “Wada mawanu;” ukaghiwada. Elisha ukamzera mzuri wa Israeli, “Ghilasire andonyi.” Ukalasa mando adadu, ukasigha.

¹⁹ Elisha ukajokwa ni machu ukamzera, “Kumangu kwalasa mando masanu angu arandadu, niko kwawikabagha Wasiria hata kuwimerie; ela idana kuchawikaba mando adadu tu.”

²⁰ Niko Elisha ukafwa, nawo wikamrika. Na kula kuzoya kwa mwaka, majeshi gha Wamoabu werekoghe wikicha kulwa na wandu isangenyi.

²¹ Ituku jimu, iji wandu werekoghe wikirika mndumu, wikawona ijeshi ja wandu jikijoka; wikaikumba ija gharia andenyi ya kaburi ya Elisha. Uendaadada maindi gha Elisha, uja mundu ukaruka na kukaia kimusi.

Wuda aghadi ya Israeli na Siria

²² Hazaeli mzuri wa Siria ukawikoronga Waisraeli matuku ghose gha Jehoahazi.

²³ Ela BWANA ukakaia na wughoma aighu ya wandu wake, ukaghaluka uwitesie kwa wundu ghwa ijo ilaghano orejibonyereghe na Abrahamu, Isaaka, na Jakobo; ndewerewitoteshereghe hata nderewisighieghe jingi.

²⁴ Hazaeli mzuri wa Siria uendafwa, mwana wake Ben-hadadi ukakaia mzuri wulalo ghwake.

²⁵ Niko Jehoashi mwana wa Jehoahazi ukawusa mizi yose erewadiloghe ni ndee Jehoahazi ngelo ra wuda. Joashi ukamsima Ben-hadadi mando adadu, ukaiwunja mizi ya Israeli.