2 WAZURI 11 - Biblia Ilagho Jiboie Kwa Wandu Wose

Malkia Athalia wa Juda

¹ Athalia, mae mzuri Ahazia, uendamanya kukaia mwana wake wameria kufwa, ukafunya momu wandu wose wa kichuku cha wuzuri wibwagho.

² Ela Jehosheba, mwai wa Mzuri Joramu, nao ni mruna Ahazia, ukammbwada Joashi mwana wa Ahazia ukamwinja aghadi ya wana wa wazuri wawikwa tayari kubwaghwa, ukamvisa andenyi ya chumba chake chiaimweri na mleli wake. Kwa chia iyo ukamvisa usewono ni Athalia uchebwaghwa.

³ Ukakaianya nao kwa miaka irandadu, ukamvisa Hekalunyi ngelo rose Athalia orekoghe ukibonya nguma isangenyi.

⁴ Ela andenyi ya mwaka ghwa mfungade, Jehoiada mkohani ukaduma wabaa wa Wakari wiche, na wabaa wa walindiri, ukawidwa hata wikavika andenyi ya Hekalu. Ukabonya nawo ilaghano kwa ighemi kunughana na mpango ughubonyere aighu ya mwana wa Mzuri Ahazi, uo Joashi; ukawiwonyera uo mwana wa mzuri.

⁵ Niko ukawilaghira, “Huwu niko mchaabonya, mkacha kazinyi elindia ituku ja Sabato, ifungu jenyu ja kadadu mchalindia ngome;

⁶ na ifungu ja kadadu jichalindia mbengenyi ya Suri; na ifungu jimu ja kadadu jichakaia nanyuma ya walindiri wiko nanyuma ya mbenge kwa kulindia ngome.

⁷ Waja wisechaakaia kazinyi ituku ja Sabato, wichalindia Hekalu kwa kumlindia mzuri ituku ijo.

⁸ Wichamlindia Mzuri Joashi wiko na maswagha ghawo mikonunyi; na uo ose uchaawisoghodera uchabwaghwa. Mumlindie mzuri ukingia hata ukifuma.”

⁹ Nao waja wabaa wikamsikira uja mkohani Jehoiada, kula umu ukareda wandu wake wewada mazughe na wesighia wambao mazughe ituku ja Sabato.

¹⁰ Uja mkohani Jehoiada ukawineka waja wabaa mafumu na ngao, agho gherekoghe gha Mzuri Daudi, gherewikiloghe Hekalunyi.

¹¹ Waja walindiri wikakaia kimusi kula mundu na maswagha ghake mkonunyi kwake, kufuma luwaru lwa kusinyi hata luwaru lwa kaskazinyi naimbiri ya Hekalu.

¹² Niko Jehoiada ukamfunya uja Joashi mwana wa mzuri, ukamngira kirumbu chongonyi kwake na kumneka chuo cha malaghiro gha wuzuri mkonunyi kwake; wikamdunga mavuda na kumghora kukaia ni mzuri. Wikamkabia chui wikighamba, “Kuduo moyo ee mzuri.”

¹³ Malkia Athalia uendasikira chwaka ra walindiri na wandu, ukafuma na kungia andenyi ya Hekalu; ukakua wandu wameria kukwanyika.

¹⁴ Ukazighana, ukammbona mzuri mmbishi wawikwa, uko kimusi anguronyi ya Hekalu karakara na mzango, wamarwa ni wabaa wa majeshi na wakabi tarumbeta; na wandu wose wikizuma kwa tarumbeta. Athalia ukarashua nguwo rake kwa wasi, ukakema ukighamba, “Ni sheshe, ni sheshe!”

¹⁵ Niko mkohani Jehoiada, angu userekundieghe Athalia ubwaghilo andenyi ya Hekalu, ukawilaghira waja wabaa wa majeshi, “Mfunyenyi noko cha shighadi ukilindilwa ni walindiri, na uo ose uchaatima kumnugha, mum'bwaghe kwa lufu.”

¹⁶ Nao wikammbwada, wikamfunyira chia ya Mbenge ya Farasi ya ngome ya mzuri, wikammbwagha.

Kuboisa malagho kwa Jehoiada

¹⁷ Niko mkohani Jehoiada ukabonya ilaghano aghadi ya BWANA na mzuri Joashi, na wandu kukaia wichakufunya wikaie wa BWANA, sena ukabonya wandu wibonye ilaghano na mzuri.

¹⁸ Niko wandu wikangia andenyi ya hekalu ya Baali, wikaichikanya, na kunona-nona madhabahu na milimu; wikam'bwagha uja mkohani wa Baali Matani naimbiri ya iro madhabahu. Jehoiada ukawika walindiri welindia Hekalu kwa mazughe.

¹⁹ Niko ukafuma chiaimweri na wabaa wa majeshi, na wabaa wa Wakari, na walindiri, na wandu wose; wikamlongoza mzuri kufuma Hekalunyi, wikammarishira Mbengenyi ya Walindiri hata ngomenyi ya mzuri. Ukasea kidombo aighu ya kifumbi chake cha nguma icho chiserelwagha ni wazuri.

²⁰ Wandu wose isangenyi wikaboilwa nandighi; muzi ghose ghukakaia na sere nyuma ya Athalia kubwaghwa aho ngomenyi ya mzuri.

²¹ Joashi orezoeghe kuibonyera Juda nguma uko wa irika ja miaka mfungade.