2 WAZURI 10 - Biblia Ilagho Jiboie Kwa Wandu Wose

Kubwaghwa kwa kivalwa cha Ahabu

¹ Ahabu orevaeghe wana wa womi mirongo mfungade aho Samaria. Niko Jehu ukaandika barua ukaiduma kwa wabaa wose wa muzi ghwa Samaria, na wareri wose wa wana wa Ahabu, ukighamba,

² “Kwa kukaia mokwanye na wana wose wa bwana onyu, na magare ghose gha farasi moko nagho na ngome rose na maswagha;

³ mkapata barua ihi, msaghuo, umu wa wana wa bwana onyu, uo mummbonagha ufwane, upate kuseria kifumbi cha nguma cha nyumba ya bwana onyu na kuidederia.”

⁴ Ela waja wandu wikangilwa ni kiture wikaghamba, “Didima wada kumtangala Jehu, ikakaia Mzuri Joramu na Mzuri Ahazia ndeweremdimieghe?”

⁵ Niko uo m'baa orekoghe mzighaniri wa ngome, na uo orekoghe mlindiri wa muzi, chiaimweri na vilongozi vimu wikaduma malagho kwa Jehu wikighamba, “Isi de wadumiki wako, nesi dichabonya kula ilagho kuchaakunda dibonye. Ndedichaawika mzuri ungi, deekunda oho kubonye agha kughiwonagha ghaboie.”

⁶ Niko Jehu ukawiandikia barua ya kawi ukighamba, “Ikakaia loli moko cha kwapo, na moko tayari kunisikira, mmbwade awo wana wa bwana onyu Mzuri Ahabu, nao muwidumbuo vongo vawo wose, muvirede kwapo kesho ngelo sa ihi cheni aha Jezreeli.” Awo wana mirongo mfungade wa kivalwa cha Ahabu, werekoghe aisi ya wulindiri ghwa wabaa wamu wa muzi ghwa Samaria, nawo werekoghe wikiwilela.

⁷ Barua ya Jehu iendawivikia ivo vilongozi verekoghe vikilela awo wana, wikawidumbua vongo wana wose wa kivalwa wa Ahabu. Wikakumbiria ivo vongo vose vikapunyi, na kuvighenja Jezreeli kwa Jehu.

⁸ Jehu uendaghorelwa kukaia ivo vongo va wana wa mzuri varedwa, ukaghamba, “Vipange zaria iwi aho mnyangonyi ghwa mbenge vikaie hata kesho.”

⁹ Nakesho yaro, Jehu ukawuka ukaghenda cha mbengenyi; ukawizera wandu werekoghe aho, “Inyo ndemne ikosa; ni ini neremleghieghe Mzuri Joramu, ngam'bwagha ela awa wandu mirongo mfungade wabwaghwa nani?

¹⁰ Idana manyenyi kukaia ndekuwadie ilagho jingi ja BWANA jighorelo ndoenyi aighu ya kinyumba cha Ahabu jichaida iduu, na agha ni kukatia kwaro ilagho ja BWANA jighorelo ni mlodi Elija.”

¹¹ Niko Jehu ukabwagha wandu wisigharikie wa kinyumba cha Ahabu aho Jezreeli. Ukabwagha wandu wake wose werekoghe wabaa na waghenyi wake wa ngolonyi, na wakohani wake; ndekoresigharikieghe mndungi wa Ahabu hata umweri.

Kubwaghwa kwa kichuku cha Mzuri Ahazia

¹² Nao Jehu ukafuma Jezreeli, ukaghenda Samaria; ukavika chienyi andu kuwangwagha, “Kambi ya Walisha,”

¹³ ukakwana na wandu wamu wa kichuku cha Mzuri Ahazia wa Juda ukawikotia, “Mo weke ani inyo?” Wikatumbulia, “Isi de wandu wa kichuku cha Ahazia, diaseawiroghua wana wa kichuku cha wuzuri, awo wana wa Malkia Jezebeli.”

¹⁴ Jehu ukawizera wandu wake, “Wiwadenyi wimoo!” Nao wikawiwada, wikawidwa na kuwibwagha kaavui na kina aho Kambi ya Walisha. Wikawibwagha wose, wandu mirongo ina na wawi; ndeweresighieghe hata mundu umweri.

Kubwaghwa kwa masighariko gha kichuku chose cha Ahabu

¹⁵ Jehu uendafuma aho, ukakwana na Jehonadabu mwana wa Rekabu wacha kummara; ukamroghua ukighamba, “Koko na ngolo cha kwapo seji niko na ngolo cha kwako?” Jehonadabu ukamtumbulia, “Hee.” Jehu ukaghamba, “Ikakaia ni loli, nneke mkonu ghwako.” Nao ukamneka mkonu ghwake, na Jehu ukammbwada, ukamjosa igarenyi kwake,

¹⁶ ukamzera, “Nndoko dighendanye kuwone kumoni seji nikufunyire kwa wundu ghwa BWANA.” Wikaghenda wose hata Samaria.

¹⁷ Jehu uendavika Samaria, ukabwagha wandu wose weresigharikieghe wa Ahabu aho Samaria, ukawimeria wose kunughana na ilagho ja BWANA oremghorieghe mlodi Elija.

Kubwaghwa kwa watasi Baali wose

¹⁸ Nao Jehu ukakwanya wandu wa Samaria chiaimweri ukawizera, “Ahabu oredumikieghe ghuja mlungu Baali katinieri, ela ini nichaghudumikia kuchumba.

¹⁹ Kwa huwo niwangienyi walodi wose wa Baali, wandu wose wimtasagha na wakohani wake wose, ungi usesoweke; kwa kukaia nifunya kizongona kibaa kwa Baali, na mndungi ukasoweka uchabwaghwa.” Ela Jehu odebonya mikalo upate kuwitotesha watasi Baali wose.

²⁰ Niko Jehu ukafunya momu, “Wikenyi ituku jemtasa Baali.” Nao wandu wikawika ituku.

²¹ Nao Jehu ukabonya itangazo ukajiduma isangenyi jose ja Israeli. Wandu wose wimtasagha Baali wikacha; mndungi nderesigharikieghe usechee. Wikangia wose andenyi ya hekalu ya Baali, hata ikachua wandu pacha.

²² Jehu ukamzera mkohani orekoghe mzighaniri wa nguwo ra wutasi, “Reda nguwo ra wutasi kwa watasi wose wa Baali.” Ukawiredia wose.

²³ Nao Jehu ukangia hekalunyi ya Baali chiaimweri na Jehonadabu mwana wa Rekabu; ukawizera watasi wose wa Baali, “Timenyi kulola ngera mmbona mdumiki ungi wa BWANA uko aghadi konyu, kwa kukaia deekunda watasi Baali wiekeri.”

²⁴ Nao Jehu ukangianya na Jehonadabu kufunya vizongona vekora kwa Baali. Ela orekoghe wawika wandu mirongo wunyanya shighadi ya hekalu nyuma ya kuwilaghira huwu, “Mndungi ukafufunushira ungi wa wandu wa Baali, uchabwaghwa!”

²⁵ Nyuma ya Jehu kufunya icho kizongona chekora ukawizera waja wandu werekoghe wikilaliria, awo walindiri na wabaa, “Ngienyi m'bwaghe kula umu wawo, mselekerie ungi!” Nao wikangia na chufu, wikawibwagha wose na kufunya mimbi yawo cha shighadi. Wikangia andu kwa ndenyi kwa iyo hekalu;

²⁶ wikafunya iro nguro ra hekalu ya Baali na kurikora.

²⁷ Wikarichikanya-chikanya iro nguro ra Baali na kuighusha iyo hekalu ya Baali, na kuighalusa iwuye choronyi; nayo eko huwo linu.

²⁸ Huwo niko Jehu oreinjireghe wutasi ghwa Baali kwa Israeli.

²⁹ Ela nderesighieghe kaung'a ra Jeroboamu mwana wa Nebati, kwa iro, orewishekerieghe Waisraeli kungia kaung'enyi etasa milimu ya ngache ra dhahabu oreiwikieghe Betheli na Dani.

³⁰ Nao BWANA ukamzera Jehu, “Kwa kukaia kwakatisha agho ghose nerekulaghirieghe kuibonyere nyumba ya Ahabu, sa iji koni ngolo yapo erekundieghe, wana wako wichakaia aighu ya kifumbi cha nguma cha Israeli hata kivalwa cha kana.”

³¹ Ela Jehu nderelindirieghe kunugha seji sharia ya BWANA Mlungu wa Israeli iko kwa ngolo yake yose, hata nderetaneghe na kaung'a ra Jeroboamu kwa iro orewishekerieghe Israeli kungia kaung'enyi.

Kufwa kwa Jehu

³² Ngelo iyo, BWANA ukazoya kuipunguza mano ya wandu wa Israeli. Mzuri Hazaeli wa Siria ukawisima wandu wa Israeli putu;

³³ kufuma mashariki ya Jordani, isanga jose ja Gileadi andu Wagadi, na Wareubeni, na Wamanase; werekaieghe, hata Aroeri kaavui na vololo ya Arinoni, Gileadi na Bashani.

³⁴ Maza zima rose ribonyero ni Jehu na mabonyo ghake gha wuing'oni, ghaandikilo andenyi ya Chuo cha Malagho gha Ngelo cha Wazuri wa Israeli.

³⁵ Jehu ukafwa sa weke ndee, ukarikwa Samaria; na mwana wake Jehoahazi ukawada kubonya nguma wulalo ghwake.

³⁶ Jehu orebonyereghe nguma andenyi ya Israeli kwa miaka mirongo iwi na wunyanya.