2 WAZURI 1 - Biblia Ilagho Jiboie Kwa Wandu Wose

Elija na Mzuri Ahazia

¹ Nyuma ya kifwa cha Ahabu, Moabu wikawilegha Israeli.

² Mzuri Ahazia ukapotoka kufuma idirishenyi ja chumba cha ngome yake gorofenyi aja Samaria, ukashoghonoka; ukaduma wandu wikotie Baalzebubu, mlungu ghwa Ekroni ngera uboa.

³ Ela malaika wa BWANA ukamzera mlodi Elija, Mtishbi, “Wuka, kwendekwana na wandu wadumwa ni mzuri wa Samaria kuwizere, ‘Welee, huwo Mlungu oosoweka Israeli kwendaakotia malagho kwa Baalzebubu mlungu ghwa Ekroni?’

⁴ Ola BWANA waghamba, ‘Ndekuchaaboa, ela kwa loli kuchafwa.’” Elija ukabonya sa iji BWANA oremlaghirieghe.

⁵ Waja wandu weredumiloghe wikawuya kwa mzuri; nao moni ukawikotia, “Kwaki mwawuya?”

⁶ Wikamzera, “Daakwana na mndumu ukadizera diwuye kwako dikuzere, BWANA waghamba, ‘Welee, huwo Mlungu oosoweka Israeli kwendaakotia malagho kwa Baalzebubu mlungu ghwa Ekroni? Kwa huwo ndekuchaaghusea ugho wuli kughulalie, ela kuchafwa.’”

⁷ Mzuri ukawikotia, “Uo mundu mkwane ukamzera agho malagho wafwane wada?”

⁸ Wikatumbulia, “Ni mundu urwae mrongo ghwa nyamandu, uko na mkowa ghwa mrongo kiwonunyi kwake.” Mzuri ukaghamba, “Uo ni Elija, Mtishbi.”

⁹ Nao mzuri ukaduma m'baa wa ijeshi na wandu mirongo misanu wimrede Elija. Ukajoka kwa Elija ukamkua uko kidombo koighu mghondinyi, ukamzera, “Ee mundu wa Mlungu, mzuri waghamba kusee.”

¹⁰ Elija ukamtumbulia uja m'baa wa wandu mirongo misanu, “Ikakaia ne mundu wa Mlungu, modo ndeghusee kufuma mlungunyi ghukumerie chiaimweri na wandu wako mirongo misanu.” Modo ghukasea kufuma mlungunyi ghukammeria chiaimweri na awo wandu wake mirongo misanu.

¹¹ Mzuri ukaduma sena m'baa umu chiaimweri na wandu mirongo misanu. Ukajoka na kumzera, “Ee mundu wa Mlungu, kwazerwa ni mzuri kusee shwa-shwa.”

¹² Elija ukamtumbulia, “Ikakaia ne mundu wa Mlungu, modo ndeghusee kufuma mlungunyi, ghukumerie chiaimweri na wandu wako mirongo misanu.” Niko modo ghwa Mlungu ghukasea kufuma mlungunyi, ghukammeria chiaimweri na wandu wake mirongo misanu.

¹³ Mzuri ukaduma m'baa umu wa kadadu na wandu wake mirongo misanu. Uja m'baa ukaghenda na kughwa maghunyi kwa Elija, ukamvoya ukighamba, “Ee mundu wa Mlungu, nakulomba kuwone irangi japo na ja awa wandu mirongo misanu kukaia ja zoghori imbiri kwako.

¹⁴ Wona modo ghwaserie kufuma mlungunyi, ghukawimeria waja wabaa wawi, chiaimweri na wandu wawo mirongo-misanu mirongo-misanu; ela idana nakulomba kuwone irangi japo kukaia ja zoghori.”

¹⁵ Malaika wa BWANA ukamzera Elija, “Seanya nao kusakeobua.” Nao Elija ukawuka ukaseanya nao cha kwa mzuri;

¹⁶ ukamzera, “BWANA waghamba huwu, ‘Kwa kukaia kwadumie wandu kukotia malagho kwa Baalzebubu, ugho mlungu ghwa Ekroni, sa kwamba Mlungu ndeko Israeli, kwa wundu ugho, ndekuchaaboa, ela kwa loli kuchafwa.’”

¹⁷ Nao Ahazia ukafwa kunughana na ilagho ja BWANA jereghoreloghe ni Elija. Mruna Jehoramu ukawada wulalo ghwake, mwaka ghwa kawi ghwa kubonya nguma kwa Jehoramu mwana wa Jehoshafati mzuri wa Juda, kwa kukaia Ahazia nderewadieghe mwana ungi wa womi.

¹⁸ Mabonyo ghose gha Ahazia oreghibonyereghe, ghaandikilo andenyi ya Chuo cha Malagho gha Ngelo cha Wazuri wa Israeli.