2 WAKORINTHO 7 - Biblia Ilagho Jiboie Kwa Wandu Wose

¹ Idana kwa kukaia deko na malaghiro agha wakundwa, yadifwana dikueleshe isi diweni wuchafu ghose ghwa mumbi na roho, na kughukatisha wueli kwa uko kuobua kwa Mlungu.

Kuboilwa kwa Paulo

² Dirughuenyi ngolo renyu; isi ndedimkosere mndungi, ndedimnonie mndungi, hata kumkita mndungi anduangi.

³ Ini siwueghora ilagho iji kwa kumtanya anduangi, angu nereghorieghe imbiri, inyo moko ngolonyi kodu; difwanye, angu dikaie moyo chia imweri.

⁴ Ini namrumirie na ndighi, nakukasagha nenyo loli-loli, ngolo yapo yachulwa ni wuhoreshi. Chiaimweri na wasi ghodu ghose, nachulwa ni kuboilwa.

⁵ Angu hata iji derechieghe Makedonia, mimbi edu ndeerewonieghe kuhora kungi anduangi; ela derejishiroghe wasi kwa kula chia: cha shighadi, ni wuda; nandenyi, ni kuobua.

⁶ Ela Mlungu, uo uwihoreshagha ngolo wanyonge, oredihoreshereghe ngolo kwa kucha kwa Tito.

⁷ Hata si kwa kuja kucha kwake koni anduangi, ela wokoni kwa kudighoria seji moremhoreshereghe ngolo, na seji mwawuyaniwesera luma; kuja kunililia, na kuja kufunga ndighi kwa wundu ghwapo; nani ngaboilwa kuchumba.

⁸ Ini, siwuesikira kiwiwi chingi ngolonyi, wei neremvavirieghe kwa barua yapo; (hata ngera neresikireghe kiwiwi); angu nawona ija barua yamvavirie ngolo, hata ngera ni kwa ngelo vui.

⁹ Elaima naboilwa, si angu wei muwawilo, ela ni angu kuwawa konyu kumredie kuhea; kwa kukaia modesikira kuwawa komzighana Mlungu, nenyo ndemchepata hasara ingi yashekerelwa ni isi anduangi.

¹⁰ Angu kuwawa komzighana Mlungu kwadareda kuhea hata kuvikia kukia, nako ndekuvaviragha, ela kuwawa kwa wurumwengu kwadareda kifwa.

¹¹ Wonenyi seji uku kuwawa komzighana Mlungu kumredie kufunga ndighi andenyi konyu; kwa kukuelesha, kwa kuwawa ni ngolo, kwa kuobua, kwa kukunda, kwa kukufunya, na kufunya adhabu. Mwakuwonyere mmbeni kukaia wandu msewadie ikosa jingi kwa kula chia aighu ya maza iro.

¹² Kwa wundu ugho, hata ngera nereandikieghe ija barua, sereiandikieghe kwa wundu ghwake uo mundu orekosereghe, angu kwa wundu ghwa uo ukosero anduangi; ela nedeiandika, eri kukufunya konyu cha kodu kupate kufunukulwa worinyi konyu imbiri ya Mlungu.

¹³ Kwa huwo isi dahoreshwa ngolo. Na chiaimweri na kuhoreshwa ngolo kodu, dereboiloghe kuchumba kummbona Tito uko na kuboilwa, angu inyo mmbose moremteserieghe kukaia na ngolo mbaa.

¹⁴ Angu ikakaia nikukasire nenyo imbiri kwake, sichefwa waya anduangi; ela sa iji koni agho deremghorieghe gherekoghe gha loli, ni huwo koni kukukasa kodu imbiri ya Tito kuwonekie kukaia kwa loli.

¹⁵ Nao wachuria kumkunda inyo kwa ngolo yose, ingelo ukumbukagha uko kusikira konyu inyo mmbose, na seji moremkaribishireghe kwa kuobua na kusughusika.

¹⁶ Neko na kuboilwa kubaa, angu neko na irumirio jikate konyu.