2 WAKORINTHO 5 - Biblia Ilagho Jiboie Kwa Wandu Wose

¹ Angu isi damanya, mimbi edu ya ndoenyi iko sa hema, iyo dikaiagha andenyi yaro, iji yavuchulwa, deko na iaghi jifumagha kwa Mlungu; nyumba isebonyero kwa mikonu, ya kala na kala, iko mlungunyi.

² Aha loli daawuyasirimika, dikiwesera kwa bea mbaa dirusho maaghi gha mlungunyi;

³ eri iji darushwa, disewoneke duu.

⁴ Angu iji dadua andenyi ya mimbi ihi iko sa hema, dasoria ngolo kwa bea mbaa; si angu wei deekunda kufuma andenyi yaro, ela deekunda dirusho iyo mimbi ya mlungunyi; eri icho chefwa chimilo ni irangi.

⁵ Na uo oredibonyereghe kwa wundu ghwa ilagho ijo ni Mlungu, nao wadinekie uo Roho ukaie wufunga ghodu.

⁶ Kwa wundu ugho, dakaia na ngolo mbaa ngelo rose; nesi dawuyamanya angu ingelo diko andenyi ya mumbi, deeka kula na Bwana;

⁷ angu dadaghenda kwa chia ya irumirio, hata si kwa kuwona anduangi.

⁸ Nesi deko na ngolo mbaa, dikiwona angu kufuma mumbinyi na kughenda cha kedu kwa Bwana, ni nicha kuchumba.

⁹ Kwa huwo, dafunga ndighi kum'boia uo; ikaiagha ngera deeka aha, angu ngera deeka noko.

¹⁰ Angu isi diwose, suti dikaie kimusi imbiri ya kifumbi cha kutanya cha Kristo; eri kula mundu upate malipo gha agho oreghibonyereghe ngelo uko mumbinyi; ikaiagha ni mecha, angu mawiwi.

Wughenyi na Mlungu kwa chia ya Kristo

¹¹ Kwa huwo, isi dikimanya kuja kuobua kwa Mlungu seji kuko, dawishingira wandu; ela seji diko, Mlungu waichi; nani nasuwiria hata nia renyu wori radiichi.

¹² Ndediwuekukuma isi diweni konyu sena anduangi, ela daawuyam'bonya mkaie na sababu edikasa isi, eri mdime kuwitumbulia awo wikukasagha weni kwa wundu ghwa wubaa ghwa mundu uko nagho, na si seji uko kwa tabia yake anduangi.

¹³ Angu ikakaia deeghalukwa ni akili redu, ni kwa wundu ghwa Mlungu; na ikakaia diko na akili redu nicha, ni kwa wundu ghwa fwaida enyu.

¹⁴ Angu lukundo lwa Kristo lwadibonyera nguma, kwa kukaia damerie kuwona huwu, ikakaia mundu umweri orefueghe kwa wundu ghwa wose, huwo wose wedeefwa.

¹⁵ Nao orefueghe kwa wundu ghwa wose, eri awo wiko moyo wisakekaia moyo sena kwa wundu ghwawo weni anduangi, ela wikaie moyo kwa wundu ghwa uo orefueghe, na kurukishwa kwa wundu ghwawo.

¹⁶ Kwa huwu kufuma idana, ndedimmanyagha mndungi kwa kunugha seji uwonekagha anduangi; hata ngera deremmanyireghe Kristo kunughana na seji orekoghe ukiwoneka, ndediduagha dikimmanya huwo anduangi.

¹⁷ Kwa huwo ngera mndungi oko andenyi ya Kristo, wakaia iumbo iwishi, maza ra kala rameria kuida, na iro mbishi rameria kucha.

¹⁸ Maza iri rose riafuma kwa Mlungu, uo udipatanishire nao moni kwa chia ya Kristo; na kudineka ugho wudumiki ghopatanisha.

¹⁹ Huwo ni kughamba, Mlungu orekoghe ukighupatanisha wurumwengu na uo moni andenyi ya Kristo, kuseko na kuwitalia wandu makosa ghawo, nao wadinekie ijo ilagho ja kupatanisha.

²⁰ Kwa wundu ugho, isi deeka wadumwa wa Kristo; na Mlungu waawuyamvoya inyo ukiditumia isi; nesi dikikaia wadumwa wa Kristo, damvoya inyo mpatanisho na Mlungu.

²¹ Kristo ndereichii kaung'a, ela Mlungu orem'bonyereghe kukaia kaung'a kwa wundu ghodu, eri isi dipate kukaia hachi ya Mlungu andenyi kwake.