2 WAKORINTHO 4 - Biblia Ilagho Jiboie Kwa Wandu Wose

Mali ra kiroho andenyi ya vombo va wongo

¹ Kwa huwo, angu diko na ughu wudumiki kwa wughoma ghwa Mlungu, ndedifwagha ngolo kungi.

² Ela darilegha iro chia rivisikie ra waya, na kulegha kughenda na mikalo, hata ndedikunde kujighalusa ilagho ja Mlungu anduangi. Ela dadeda worinyi malagho gha loli, eri kula mundu udimanye seji diko imbiri ya Mlungu.

³ Angu hata ngera Ilagho Jiboie dawuyajichila jafinikirwa, jaafinikirwa kwa awo witotagha wiekeri.

⁴ Awo ndewidimagha kurumiria, angu mlungu wa wurumwengu ughu wawituwira akili rawo, na kuwighiria wisewone mwengere ghwa Ilagho Jiboie ja wubaa ghwa Kristo; uo uko fwana ya Mlungu.

⁵ Angu ndediwuekuchila isi diweni anduangi, ela daawuyamchila Jesu Kristo kukaia Bwana, na isi kukaia wadumiki wenyu kwa wundu ghwa Jesu.

⁶ Angu uo Mlungu ughambie, “Mwengere ndeghung'ale-ng'ale kufuma kirenyi”, nuo moni ung'alie andenyi ngolonyi kodu, na kudineka mwengere, dipate kughumanya wubaa ghwa Mlungu ghwawuyang'ala-ng'ala wushunyi kwa Kristo.

⁷ Ela deko na mali ihi andenyi kodu isi diko sa vombo va wongo; eri rija ndighi mbaa richumbie ripate kuwoneka kukaia ni ra Mlungu, hata si redu ringi anduangi.

⁸ Dakorongwa kwa kula chia, ela ndediwuemerelwa; dakambirwa chongo, ela ndedifwagha ngolo;

⁹ datirirwa, ela ndedisighilo diekeri; daghushwa andonyi, ela ndeditoteshwagha anduangi.

¹⁰ Matuku ghose daawuyaduka kifwa cha Jesu mimbinyi kodu, eri irangi ja Jesu, jipate kuwoneka worinyi mimbinyi kodu wori.

¹¹ Angu iji diko moyo, daawuyakaia ndengonyi ebwaghwa kwa wundu ghwa Jesu; eri irangi ja Jesu jipate kuwoneka worinyi andenyi ya mimbi edu efwa.

¹² Kwa wundu ugho, kifwa chaawuyabonya kazi andenyi kodu, ela konyu ni irangi.

¹³ Kwa kukaia deko na roho ija cheni ya irumirio, erekoghe na uja mundu oreandikieghe, “Ini nederumiria, niko ngadeda,” isi wori darumiria, niko huwu dadeda;

¹⁴ dikimanya angu uo oremrukishireghe Bwana Jesu, uchadirukisha isi wori andwamweri na Jesu, na kudireda imbiri kwake andwamweri nenyo.

¹⁵ Angu maza rose ni kwa wundu ghonyu, na sa iji koni mvono ghwa Mlungu ghuwivikiagha wandu wengi kuchumba, wokoni awo wengi, wichabonya malombi mengi ghefunya chawucha kwa wubaa ghwa Mlungu.

Kukaia moyo kwa irumirio

¹⁶ Kwa huwo, ndedifwagha ngolo. Angu hata ngera mumbi ghodu ghwa asili ghwaawuyasia, ela asili edu ya kiroho yaawuyabonywa wuwishi ituku ituku.

¹⁷ Angu matiriro agha gha ngelo ndini, ghaawuyadiboisira wubaa ghwa kala na kala kwa wungi, ghusedimagha kufwananishwa na kindo chingi anduangi;

¹⁸ kwa kukaia ndediwuevizighanira vindo viwonekagha anduangi, ela daawuyavizighanira ivo visewonekagha; angu vilambo viwonekagha ni veida, ela ivo visewonekagha, ni vedua kwa kala na kala.