2 WAKORINTHO 2 - Biblia Ilagho Jiboie Kwa Wandu Wose

¹ Niko nerewonieghe angu niseche konyu, nichemvavira ngolo.

² Ikakaia ini namvavira ngolo, nani uchaanibonya ini niboilo; isaakaia ni uja moni nimvavirie ngolo?

³ Nani neremuandikieghe ghaja gheni, eri ngacha nisevaviro ngolo ni waja wandu weni inifwaneghe winibonye niboilo. Angu nerekoghe na wuloli kwa inyo mmbose kukaia, kuboilwa kwapo kuchakaia kuboilwa konyu inyo mmbose.

⁴ Angu neremuandikieghe niko na wasi m'baa, na kuwawa ni ngolo ngidikwa ni mbori; si angu wei nimvavire, ela nimmanyishe ulo lukundo lubaa nimkunde nalo.

Wughoma kwa uo ukosere

⁵ Ela ngera mndungi wamvavirie mndumu ngolo, ndenivavirie ini anduangi, (nisebie nandighi konyu mmbose) oomvavira inyo.

⁶ Iyo adhabu mundu uo ukole wainekwa ni wandu wengi, yakata.

⁷ Jasighwa ni inyo mumfuye wughoma, na kumkumba ngolo usekechangilwa ni wasi ghomchumba ndighi na kulaghaya.

⁸ Na huwo namvoya mummbonyere wori mwamkunde loli.

⁹ Ijo nijo jinishekerie kumuandikia ngimtima, eri nipate kumanya ngera inyo mwasikiragha kwa maza rose.

¹⁰ Mundu uo ose mumfuyagha wughoma, nani wori namfuya wughoma. Ijo nijifuye wughoma, ikakaia jingi jiko, edeeka ni kwa wundu ghonyu imbiri ya Kristo

¹¹ kwa kumtangala Shetani usepate wulalo aighu edu; angu daichi mipango yake.

Bea ya ngolo ya Paulo andenyi ya Troa

¹² Iji nerechieghe Troa kuchila Ilagho Jiboie ja Kristo, nererughuiloghe mnyango kwa wundu ghwa Bwana;

¹³ ela ngolo yapo ndeerekoghe na sere, angu neremsowieghe mwanidu Tito aho. Niko ngalaghana na wandu na kughenda Makedonia.

Wusimi kwa chia ya Kristo

¹⁴ Ela chawucha kwa Mlungu, uo udighenjagha kari kose dikisima andenyi ya Kristo; na kueresha irumba icha ja kummanya uo kula andu, kwa kuditumia isi.

¹⁵ Angu isi deko marumba mecha gha Kristo kwa Mlungu aghadi ya awo wikirwagha na aghadi ya awo witotagha.

¹⁶ Kwa wamu ni marumba mecha kufuma kifwa kuchivikia kifwa, na kwa wazima ni marumba mecha kufuma irangi kujivikia irangi. Elaima nani udimagha maza iri?

¹⁷ Angu isi, ndediko sa wandu wamu wengi witumiagha ilagho ja Mlungu kwa fwaida rawo weni anduangi, ela deko sa wandu wa loli widumilo ni Mlungu; dadeda imbiri ya Mlungu andenyi ya Kristo.