2 TIMOTHEO 4 - Biblia Ilagho Jiboie Kwa Wandu Wose

¹ Nakulaghira imbiri ya Mlungu na imbiri ya Kristo Jesu, uo uchaawitanya wandu wiko moyo na wandu wifue, ngelo ya kuwoneka kwake kukaia mzuri.

² Chila jija Ilagho ngelo ifwane, na ngelo isefwane; wonyera, kania, shashira, kwa kurumaghia kose na kufundisha.

³ Angu matuku ghichacha ngelo wandu wisechaaghirumiria mafundisho gha loli, ela wikikaia wikunde kusikira malagho kunughana na bea rawo reni, wichakukwanyira weni walimu, awo wichaawineka mafundisho agho wighikunde;

⁴ nawo wichasigha kuisikira ija loli na kunugha chughano.

⁵ Ela oho kukumazire matuku ghose, kurumaghie wasi, kubonye kazi ya mchili wa Ilagho Jiboie, na kukatisha wudumiki ghwako.

⁶ Angu ini nalighisa kufunywa kizongona, na ngelo yapo eghusigha ughu wurumwengu yavika.

⁷ Namerie kulwa ghuja wuda ghuboie, namerie mwendo ghwapo, na irumirio najilindirie.

⁸ Na idana nawikilwa kirumbu cha hachi, icho nichaanekwa ni Bwana uo Mtanyi wa hachi jija Ituku; hata si ini moni niekeri anduangi, ela uchawineka awo wose wikundagha kuja kuwoneka kwake.

Malaghiro

⁹ Nakunde kuche kwapo shwa-shwa.

¹⁰ Angu Dema wanisighie kwa kukunda maza ra wurumwengu ughu ghwa idana na kughenda Thesalonike, Kreske nao waghendie Galatia, na Tito ukaghenda Dalmatia.

¹¹ Luka uekeri nuo dikwanye. Mchanye na Marko, angu wanifwana nandighi kwa wudumiki.

¹² Tukiko namdumie Efeso.

¹³ Iji kwakacha-lee, kunidwae ikaputi japo nerejisighieghe kwa Karpo aja Troa, na vija vuo wori, na kuchumba vija va mirongo.

¹⁴ Alekizanda uja mchani wa shaba orenibonyereghe kiwiwi na ndighi; Bwana uchamlipa kwa mabonyo ghake.

¹⁵ Hata oho kumoni kukulindie nao, angu oreghitangalieghe nandighi madedo ghedu.

¹⁶ Iji nerekoghe ngikudederia indo ja imbiri, ndekuwadie mndungi oreniteserieghe, wandu wose wedenikimbia. Mlungu usewitalie ikosa ijo.

¹⁷ Ela Bwana orekoghe andwamweri nani, ukanineka ndighi rewichilia ghose, eri wandu wa mbari zima wose wipate kusikira. Aho ngavuvulwa sa kufuma momunyi ghwa shimba.

¹⁸ Bwana uchanivuvua kufuma kwa kula kiwiwi, na kunikira kwa wundu ghwa Wuzuri ghwake ghwa mlungunyi. Kwake uo, ndeghukaie wubaa kwa kala na kala. Amen.

Voro ra kutua

¹⁹ Wiroghuo Priska na Akula na kinyumba cha Onesforo.

²⁰ Erasto oresigharikieghe Korintho, Trofimo nao neremsighieghe uko mkongo aja Mileto.

²¹ Nakunde kuche imbiri kwari isezoe. Eubulo wakuroghua; na wokoni Pudene, Lino, Klaudia, na wanidu wose wakuroghua.

²² Bwana ndekaie na roho yako. Mvono ndeghukaie nenyo.