2 TIMOTHEO 3 - Biblia Ilagho Jiboie Kwa Wandu Wose

Matuku gha kutua

¹ Ela kutambukilo huwu, kukaia matuku gha kutua mbai, richacha ngelo ra wasi;

² angu wandu wichakaia wekukunda weni, wilakie na pesa, wekukasa, wing'etere; wichakaia wedukana wandu, wisesikiragha wavi wawo, wisewadie chawucha ingi, wiseelie,

³ wisene wughoma; wichakaia wa machu, wizighiriagha, walaki, wibirie, wizamilwagha ni nicha,

⁴ wa mikalo, wisetalagha, wibandilo ni chongo, wikunde maseko kuchumba kumkunda Mlungu;

⁵ wiko na fwana ya kumuobua Mlungu, ela wiarikana ndighi raro. Kuwiinjikie wandu sa awo.

⁶ Aghadi yawo, weko wandu wingiagha nyumba ra wandu, na kuwidwa wunyika waka wisedimagha kukumazira, widukie misigo ya kaung'a na kughenjwa ii chia na ii chia ni bea zima-zima;

⁷ nawo wakufundisha tulituli, ela na jingi ndewidimagha kuvikia kuimanya iyo loli anduangi.

⁸ Na sa iji koni Jane na Jambre weremtangalieghe Musa, niko koni na awo wandu wiitangalagha ija loli; wandu winonekie vongo, wiko na irumirio ja tee.

⁹ Ela ndewichaaghenda kula, angu wukelu ghwawo ghuchawonwa ni wandu wose, seji ghwa Jane na Jambre ghorewonekieghe.

Mafundisho gha kutua

¹⁰ Idana kwamerie kunugha mafundisho ghapo, mwendo ghwapo, makusudi gha irangi japo, irumirio japo, kurumaghia kwapo, lukundo lwapo, kumanga kwapo,

¹¹ kutirirwa kwapo, wasi ghwapo, maza rerenipatireghe aja Antiokia, Ikonio na Lustera; seji neretiriroghe ngirumaghia, ela hata huwo Bwana ukanivuvua.

¹² Na loli, awo wikunde kudua na irangi jemuobua Mlungu andenyi ya Kristo Jesu, wichatirirwa

¹³ ingelo wawiwi na wandu wa kisha wichaachuria kubonya mawiwi kuchumba; wikikalia wandu nawo weni wikikalilwa.

¹⁴ Ela oho, dua kwa agho kukufundishire na kughirumiria putu, kukimanya awo wandu kukufundishire kwawo,

¹⁵ na seji kumanyire Maandiko Ghielie kufuma wanake ghwako, agho ghidimagha kukuneka mafundisho ghiredagha kukia kwa chia ya irumirio jiko kwa Kristo Jesu.

¹⁶ Maandiko ghose gheefurilwa ni Mlungu, nagho ghafwana kwa kufundisha, kwa kuwonyera, kwa kuboisa makosa, na kwa kuwifundisha wandu chia ya hachi;

¹⁷ eri mundu wa Mlungu ukaie ukatie, uko tayari kubonya kula kazi ndicha.