2 TIMOTHEO 2 - Biblia Ilagho Jiboie Kwa Wandu Wose

Asikari mloli wa Kristo Jesu

¹ Idana oho mwanwapo, kaia nandighi kwa chia ya mvono ghuko andenyi ya Kristo Jesu.

² Na agho kughisikire ngighora imbiri ya washahidi wengi, kuwifundishe wandu wazima wiko wa loli, awo wichaadima kuwifundisha wazima wokoni.

³ Kaia mngara wa matiriro sa asikari mucha wa Kristo Jesu.

⁴ Ndekuwadie asikari ungi ukaiagha wudenyi, ukuranganyagha na maza ra wandu wose, kwa kukaia wakunde kumkatishira uo oremuandikieghe.

⁵ Mundu wa misarigho, nderushwagha kirumbu, usaasima kunughana na sharia.

⁶ Mlimi ubonyagha kazi kwa kufunga ndighi, nuo ufwane upate ifungu ja imbiri ja mavalo.

⁷ Ririkanya agho nighoragha, angu Bwana uchakuneka kutambukilwa ni maza rose.

⁸ Mkumbuke Jesu Kristo urukishiro kufuma kwa wafu, wa kivalwa cha Daudi, sa iji nimchilie kwa ijo Ilagho Jiboie.

⁹ Kwa wundu ghwa ijo Ilagho Jiboie, nawuyatirirwa ningirilo pingu sa m'bonyi mawiwi. Ela Ilagho ja Mlungu ndejifungwagha.

¹⁰ Kwa huwu narumaghia maza rose kwa wundu ghwa wasaghulwa, eri nawo wipate kukia andenyi ya Kristo Jesu, na kupata ugho wubaa ghwaro ghwa kala na kala.

¹¹ Ilagho iji ni ja loli: Ikakaia difue andwamweri nao, dichadua moyo andwamweri nao wori.

¹² Dikarumaghia, dichabonya nguma andwamweri nao wori. Dikamlegha, nao moni uchadilegha.

¹³ Dikasowa wuloli, uo wadua mloli; angu uo ndedimagha kukukana moni anduangi.

M'bonyi kazi urumirikie

¹⁴ Kuwikumbuse wandu maza iri, na kuwilaghira imbiri ya Bwana kukaia, wiinjikie nganyi aighu ya malagho ghisewadie fwaida ingi, ela ghadawinona awo wighisikiriagha.

¹⁵ Funga ndighi kukuwonyera kumoni kwa Mlungu sa m'bonyi kazi urumirikie, usefushwagha waya kwa kazi yake, ujiwadiagha nicha ijo ilagho ja loli.

¹⁶ Kuja kusongoda-songoda kuseko na kuobua kwa Mlungu kukuinjikie na mbai, angu kuchawibonya wandu wichurie kukaia kula na Mlungu;

¹⁷ na madedo ghawo ghichakaia sa chonda chijagha cha ghilimi. Aghadi ya wandu awo, ni Humenayo na Fileto.

¹⁸ Wandu wilagharilo ni irumirio, hata wiaghamba wei kuruka kwa wafu kwamerie kuida, nawo waawuyajinona irumirio ja wandu wamu.

¹⁹ Ela msingi ghwa Mlungu ghwamange, nagho ghwawadie mhuri ughu: “Bwana wawimanya awo wiko wake,” sena, “Uo ose ujighoragha irina ja Bwana, suti utane na wuwiwi.”

²⁰ Andenyi ya nyumba mbaa, ndeviko vombo va dhahabu na va feza veni viekeri anduangi, ela veko vimu va midi, na vimu va wongo wori. Vimu vatumilwa ngelo ya ishima, na vimu vatumilwa sa matuku ghose.

²¹ Ngera mndungi wakuelesha moni na iro maza mbiwi, uchakaia chombo cha ishima, chiwikilo wakfu, chimfwanagha mundu wa nyumba, kwa wundu ghwa kula kazi ndicha.

²² Kwa huwo, kuriinjikie bea ra wudawana; kuinughe hachi, irumirio, lukundo, na sere andwamweri na awo wimmbangiagha Bwana kwa ngolo ielie.

²³ Kurileghe nganyi ra wukelu, risewadie akili, kukimanya angu radareda kurashana.

²⁴ Na mdumiki wa Bwana, ndeimfwane ukaie orashana na wandu, ela yamfwana ukaie mucha kwa kula mundu; mwalimu wa loli, urumaghiagha

²⁵ na kuwiwonyera kwa wumboa awo wimtangalagha. Kewada Mlungu uchawineka kuhea na kuvikia kuimanya ija loli;

²⁶ nyuma ya kuwiwada na kuwibonya wifufunuke ugho mdegho ghwa Ibilisi, wipate kubonya lukundo lwa Mlungu.