2 TIMOTHEO 1 - Biblia Ilagho Jiboie Kwa Wandu Wose

¹ Ini Paulo, mdumi wa Kristo Jesu kwa lukundo lwa Mlungu, udumilo kujichila ijo ilaghiro ja irangi jiko andenyi ya Kristo Jesu,

² nakuandikia oho Timotheo mwana wapo mkundwa: Mvono ndeghukaie kwako, na wughoma, na sere rifumagha kwa Mlungu Aba, na kwa Kristo Jesu Bwana odu.

Kufunya chawucha na kukumba ngolo

³ Namfunyira Mlungu chawucha, uo nimdumikiagha kwa nia ielie, seji werebonyereghe weke aba, ngelo nawuyakukumbuka tulituli andenyi ya malombi ghapo;

⁴ ngikumbuka mbori rako, na kukunda nandighi kio na dime nikuwone, nipate kuboilwa kubaa.

⁵ Nakumbuka irumirio jako ibaa, ijo jerekoghe na wawayo Loisi aho imbiri, na mayo Eunike; na idana neko na wuloli kukaia jeko andenyi kwako.

⁶ Kwa wundu ugho, nakukumbusa kujinyavurishe ijo inosi ja Mlungu jiko andenyi kwako; ijo korejipatireghe kwa chia ya kukuwikiria mikonu yapo.

⁷ Angu Mlungu nderedinekieghe Roho wa wowa anduangi, ela oredinekieghe Roho wa kudima, na lukundo, na kukumazira.

⁸ Idana kusakewona waya kumshuhudia Bwana odu, hata kusakeniwonia waya ini mfungwa wake, ela kurumaghie wasi kwa ndighi ra Mlungu, kwa wundu ghwa ijo Ilagho Jiboie.

⁹ Mlungu oredikirieghe na kudiwanga dipate kukaia waeli; si kwa wucha ghwa kazi redu anduangi, ela ni kwa wucha ghwa mpango ghwake moni, na mvono ugho oredinekieghe andenyi ya Kristo Jesu imbiri ya ngelo.

¹⁰ Na idana, mvono ugho ghwawonekie worinyi kwa chia ya kuwoneka kwa Mkiri odu Kristo Jesu, uo uinjire kifwa na kureda irangi jisefwagha mwengerenyi kwa chia ya ijo Ilagho Jiboie.

¹¹ Na ini nerewikiloghe nikaie mchili, na mdumi, na mwalimu wa ijo Ilagho Jiboie;

¹² na kwa wundu ugho, niko nawuyapatwa ni ughu wasi. Ela sifwagha waya, angu namwichi uo nimrumirie, nani neko na wuloli kukaia wadima kuchilindia icho nichiwikie kwake hata Ituku jija.

¹³ Nugha mfwano ghwa malagho gha loli, agho koreghisikireghe kwapo, kwa irumirio na lukundo luko andenyi ya Kristo Jesu.

¹⁴ Lindia iyo loli erewikiloghe kwako kwa ndighi ra Roho Mweli, uo ukaiagha andenyi kodu.

¹⁵ Oho kwamanya angu wandu wose wa isanga ja Asia wanisighie, aghadi ya awo, ni Fugelo na Hermogene.

¹⁶ Bwana ndewifue wughoma wandu wa nyumba ya Onesforo, angu orenihoreshereghe ngolo kalazi koni. Uo nderewonieghe waya kwa kufungwa kwapo,

¹⁷ ela iji wavika Roma, orenilolieghe nandighi hata ukaniwona.

¹⁸ Bwana ndemneke kufuilwa wughoma Ituku ja Bwana. Hata oho kumoni kwaichi nandighi ugho wudumiki ghose oreghubonyereghe aja Efeso.