2 SAMUELI 5 - Biblia Ilagho Jiboie Kwa Wandu Wose

Daudi kuwuya mzuri wa Israeli na Juda

¹ Niko mbari yose ya Israeli ikamchea Daudi aho Hebroni ikighamba, “Ola isi de wandu wa bagha imweri na oho.

² Ngelo iidie iji Sauli orekoghe mzuri aighu yedu, ni oho kumoni korekoghe kukiwilongoza wandu wa Israeli wudenyi, na BWANA orekuzerieghe, ‘Oho kuchakaia mlisha wa wandu wapo Israeli na m'baa wawo.’”

³ Niko wabaa wose wa Israeli wikamchea Daudi aho Hebroni; na Mzuri Daudi ukabonya nawo ilaghano imbiri ya BWANA; nawo wikamshinga Daudi mavuda ukaie mzuri aighu ya Israeli.

⁴ Daudi orekoghe mundu wa irika ja miaka mirongo idadu iji orezoyagha kubonya nguma; ukabonya nguma miaka mirongo ina.

⁵ Orechibonyereghe kichuku cha Juda nguma aja Hebroni kwa miaka mfungade na meri irandadu, na aja Jerusalemu, ukawibonyera Waisraeli wose nguma, chiaimweri na kichuku cha Juda, kwa miaka mirongo idadu na idadu.

⁶ Nao iji Mzuri Daudi orekundieghe kungia Jerusalemu chiaimweri na wandu wake, Wajebusi awo werekoghe waisanga wa aho wikamzera Daudi, “Aha uko ndekungiagha kungi; hata vitungure na wakelemeri wadima kukuwinga,” wikiririkanya kedi Daudi ndedimagha kughuwada ugho muzi.

⁷ Ela sena Daudi ukaiwada ngome ya Sioni, nagho nigho ghocheewangwa muzi ghwa Daudi.

⁸ Ituku jija Daudi ukaghamba, “Uo ose uchaawikaba Wajebusi, ndejoke kwa kuidiria mkuonyi ghwa machi, uwikabe awo vitungure na wakelemeri winizamiagha.” (Iyo niyo sababu ighorwagha kukaia, “Vitungure na wakelemeri ndewina rusa engia nyumba ya BWANA.”)

⁹ Nyuma ya Daudi kuwada ugho muzi, ukaghuwanga “Muzi ghwa Daudi.” Niko Daudi ukaagha ugho muzi chia rose kufuma Milo hata kondenyi.

¹⁰ Daudi ukachurikia na kuwuya mundu m'baa, kwa kukaia BWANA Mlungu wa majeshi orekoghe andwamweri nao.

¹¹ Niko Hiramu mzuri wa Tiro ukaduma wandu kwa Daudi, chiaimweri na midi ya sida; na mafundi gha mbau na gha magho, ghikamuaghia Daudi ngome.

¹² Daudi ukamanya kukaia BWANA wammangisha ukaie mzuri aighu ya Israeli, na kukaia waghubonyere wuzuri ghwake ghukaie nicha kwa wundu ghwa wandu wake Israeli.

¹³ Nyuma ya Daudi kusea Jerusalemu kufuma Hebroni, ukalowua waka wekanya na waka wengi aho; ukavailwa wana wengi wa waka na wa womi.

¹⁴ Agha nigho marina gha wana werevaloghe Jerusalemu: Shamua, Shobabu, Nathani, Solomoni;

¹⁵ Ibhari, Elishua, Nefegi, Jafia;

¹⁶ Elishama, Eliada, na Elifeleti.

Wusimi aighu ya Wafilisti

¹⁷ Nao iji Wafilisti wasikira kukaia Daudi wamerie kushingwa mavuda ukaie mzuri aighu ya Israeli, wikajoka wose kumlola; ela Daudi uendasikira agho, ukasea ngomenyi ukakuvisa.

¹⁸ Wafilisti wikacha na kusasarika andenyi vololonyi ya Refaimu.

¹⁹ Daudi ukamlomba BWANA. “Welee, nijoke nilo na Wafilisti? Kuwingira mikonunyi kwapo?” BWANA ukamtumbulia Daudi, “Joka, angu kwa loli nichawingira Wafilisti mikonunyi kwako.”

²⁰ Nao Daudi ukacha Baal-perazimu, ukawisima Wafilisti aho, ukaghamba, “BWANA wawiinja wamaiza werekoghe imbiri kwapo sa kudukwa ni machi mengi.” Niko huwo irina ja andu aho jiwangwagha, Baal-perazimu.

²¹ Wafilisti wikaisigha milimu yawo aho, na Daudi na wandu wake wikaidwa.

²² Nao Wafilisti wikajoka sena na kusasarika andenyi vololonyi ya Refaimu.

²³ Hata iji Daudi oremlombieghe BWANA ukamtumbulia, “Kusejoke; ela kuwimare chia ya nanyuma, kuwijokie na iyo chia ilangayagha miforosadinyi.

²⁴ Na iji kwasikira tiri ra wandu wicheriagha miforosadinyi naighu, niko aho kukufungishe ndighi kufume kulo nawo, kwa kukaia BWANA wakiria imbiri kwako kukaba majeshi gha Wafilisti.”

²⁵ Nao Daudi ukabonya sa iji koni BWANA umzerie ukawikaba Wafilisti kufuma Geba hata Gezeri.