2 SAMUELI 24 - Biblia Ilagho Jiboie Kwa Wandu Wose

Daudi kutala wandu

¹ Ngelo imu, BWANA ukakaia wazamilwa ni Waisraeli, ukam'bonya Daudi uwiredie wasi, ukimzera, “Ghenda kuwitale wandu wa Israeli na wa Juda.”

² Niko mzuri ukamzera Joabu, uo orekoghe m'baa wa majeshi, ukighamba, “Ghenda chiaimweri na wabaa wamu wa majeshi kwa vichuku vose va Israeli kufuma Dani hata Beer-sheba kuwitale awo wandu nipate kumanya mtalo ghwawo.”

³ Joabu ukamzera mzuri, “BWANA Mlungu wako ndechurie mtalo ghwa wandu wake mando ighana kuchumba seji wiko; na Mlungu ndekuneke matuku kuwiwone seji wiko. Ela kwaki bwana wapo mzuri wawuyaboilwa ni iji ilagho?”

⁴ Ela ilagho ja mzuri jikamsima Joabu chiaimweri na wabaa wose wa majeshi. Niko Joabu na wabaa wa majeshi wikafuma kwa mzuri, wighende kuwitala wandu wa Israeli.

⁵ Wikaruwuka Jordani, wikazoya kutala aja Aroeri, na kufuma ghuja muzi ghuko ghadi na ghadi ya vololo kulangaya Gadi, na kughenda hata Jazeri.

⁶ Nao wikacha Gileadi wikaidia Kadeshi andenyi ya isanga ja Wahiti; wikacha Dani, na kufuma aho, wikaghenda kumaria Sidoni,

⁷ na kucha ngomenyi ya Tiro na mizi yose ya Wahivi na Wakanaani. Wikafuma na kughenda noko cha Negebu ya Juda aja Beer-sheba.

⁸ Wiendameria kumara isanga jose, wikacha Jerusalemu, nyuma ya kazi kudwa meri ikenda na matuku mirongo iwi.

⁹ Nao Joabu ukafunya mtalo ghwa wandu kwa mzuri: Andenyi ya Israeli korekoghe na wandu wiko na ndighi relwa wuda elfu maghana wunyanya, na wandu wa Juda elfu maghana masanu.

¹⁰ Ela Daudi ukatanywa ngolonyi kwake nyuma ya kuwitala wandu. Daudi ukamzera BWANA, “Nabonya kaung'a nandighi kwa wundu ghwa agha nabonya; ela idana ee BWANA, nakulomba kuinje nambai wuwiwi ghwapo ini mdumiki wako, angu nabonya wukelu nandighi.”

¹¹ Nao imbiri Daudi usewukie nakesho, ilagho ja BWANA jerekoghe jamchea mlodi Gadi, uo orekoghe mmboni wa Daudi, jikighamba,

¹² “Ghenda kumzere Daudi huwu, ‘BWANA waghamba kusaghuo jimu jaro ja agha malagho adadu nikubonyeragha.’”

¹³ Nao Gadi ukacha kwa Daudi ukamghoria; nao ukamzera, “Saghua jimu ja agha malagho adadu; Miaka idadu ya njala ingie isangenyi kwako; angu kuwingwa ni wamaiza wako kwa meri idadu wikikunugha; angu matuku adadu gha saka izamie isangenyi kwako. Pima nao kufunye matumbulio nighiwunje kwa uo waniduma.”

¹⁴ Nao Daudi ukamzera Gadi, “Nakaia na wasi m'baa; ni baa ningie mikonunyi kwa BWANA, angu uo uko na wughoma m'baa ela nisengie mikonunyi kwa mdamu.”

¹⁵ Nao BWANA ukaduma saka ya ngawawi kwa Waisraeli kufuma luma lwa nakesho, hata ija ngelo erelaghiriloghe; wandu wikafwa kufuma Dani hata Beer-sheba elfu mirongo mfungade.

¹⁶ Hata iji malaika orekoghe tayari kughorua mkonu ghwake cha Jerusalemu eri ughukabe, BWANA ukaghalua nia ebonya ugho wuwiwi, ukamzera, “Yakata, leka.” Uja malaika wa BWANA orekaieghe kimusi aja wazenyi eelia viro ya Arauna, Mjebusi.

¹⁷ Daudi uendammbona uja malaika ototesha ukamzera BWANA, “Ola mkosa ni ini, ni ini nabonya kaung'a, ela awandu wabonya wada? Nakulomba kunikabe ini na nyumba ya aba.”

¹⁸ Ituku ijo jeni Gadi ukamghendia Daudi ukamzera, “Joka aja wazenyi eelia viro ya Arauna, Mjebusi; kumuaghie BWANA madhabahu.”

¹⁹ Daudi ukasikira malagho gha Gadi, ukajoka sa iji koni BWANA orelaghirieghe.

²⁰ Nao iji Arauna orezighanireghe nokoisi, ukammbona mzuri na wabaa wake ukimchea; Arauna ukaghenda na kughoghoma kwa ishima.

²¹ Arauna ukaghamba, “Kwaki mzuri wanichea ini mdumiki wake?” Daudi ukatumbulia, “Naachaghua iwaza yako eelia viro, nipate kumuaghia BWANA madhabahu, eri ihi saka iwoneinjika wandunyi.”

²² Arauna ukamzera Daudi, “Wusa BWANA wapo mzuri, kufunye seji kuwonagha nicha kumoni. Ng'ombe refunya kizongona chekora heri, na midi echana viro na ghongolo ra ng'ombe wori kwa wundu ghwa mbande.”

²³ Arauna ukaghamba, “Vilambo ivi vose ee mzuri, naavifunya kwako; BWANA Mlungu wako ndekurumirie oho na kizongona chako.”

²⁴ Ela mzuri ukamzera Arauna, “Hata, nichavighua kwako kwa ighuri; sidimagha kufunya kizongona kwa BWANA Mlungu wapo nisechifunyire kindo chingi.” Niko Daudi ukaghua andu koelia viro, na iro ng'ombe kwa vibelele va feza mirongo misanu.

²⁵ Daudi ukamuaghia BWANA madhabahu aho, ukafunya vizongona vekora na vizongona va mapatano. BWANA ukasikira uko kuvoya kubonyero kwa wundu ghwa isanga, na iyo saka ikainjwa kwa Israeli.