2 SAMUELI 22 - Biblia Ilagho Jiboie Kwa Wandu Wose

Lumbo lwa Daudi lwa wusimi

¹ Nao Daudi ukam'boria BWANA lumbo ulu iji oremkirieghe usekabo ni Sauli na wamaiza wake wazima;

² ukaghamba, “BWANA nuo mlindiri wapo, ngome yapo, na mkiri wapo;

³ nadakuvisa andenyi ya Mlungu wapo na mlindiri wapo uo ni ngao yapo na kukia kwapo; ni ngome yapo imange, na andu kwapo kokimbiria. Oho mkiri wapo kwadanikira na wakorongi.

⁴ Nadammbanga BWANA, nao wadanikira kufuma kwa wamaiza wapo. BWANA ndekaso!

⁵ “Angu mivo-mivo ya kifwa erenimarieghe chia rose, machi mengi ghebwagha ghikanimara chia rose.

⁶ Shaghala ra kifwa rereniwadieghe, chugha ra Andu kwa wafu rikanimazira.

⁷ “Neremmbangieghe BWANA iji nerekoghe wasinyi, ngammbanga Mlungu wapo. Ukasikira lwaka lwapo hekalunyi kwake, nao ukasikira kililo chapo.

⁸ “Niko ndoenyi kukaobua na kusughusika, na misingi ya mlungunyi ikanyavurika angu Mlungu orejokeloghe ni machu.

⁹ Mosi ghorefumieghe mbuonyi kwake, ghukajoka nokoighu, na modo ghulunguragha ghukafuma momunyi kwake; nagho ghukabonya maka ghiakagha.

¹⁰ Oreghoghomeshereghe mlungunyi, ukasea andoenyi, kira kibaa cherekoghe aisi ya maghu ghake.

¹¹ Orejokieghe aighu ya ikerubi ukaburuka, ukawoneka aighu ya mawawa gha mbeo.

¹² Orebonyereghe kira chiko mbai mbai kwake kukaia chandarua, mawingu ghikambie, na machi mengi.

¹³ Kung'ala-ng'ala korekoghe imbiri kwake, korefunyireghe maka gha modo. Ghifunyagha mwengere ghung'ale-ng'ale.

¹⁴ BWANA orekabieghe lukuwa kufuma mlungunyi, na Uo-Uko-Aighu-Nandighi ukadeda.

¹⁵ Orekumbieghe mawanu ukawisaghisa wamaiza, ukafunya luhehia lukawiwinga noko.

¹⁶ Niko meda ya machi gha bahari ikawoneka, na misingi ya wurumwengu ikawoneka worinyi, kwa kukemelwa ni BWANA, na kuja kukumba miruke kwa mbua yake. Ukiwikemia wamaiza wake.

¹⁷ “BWANA oreniwadieghe uko koighu, na kunifunya andenyi ya machi mengi.

¹⁸ Ukanikira na m'maiza wapo uwadie ndighi, na awo werezamilwagha ni ini, kwa kukaia werenichumbieghe ndighi loli loli.

¹⁹ Werekoghe wanichea ngelo ya wasi ghwapo m'baa, ela BWANA nuo orekoghe saghi yapo.

²⁰ Ukaniwada na kunifunya worinyi, ukanikira angu oreboiloghe ni ini.

²¹ “BWANA oreninekieghe kara kara na mabonyo ghapo gha hachi, ukanilipa angu niserebonyereghe ikosa jingi.

²² Kwa kukaia nererilindirieghe chia ra BWANA, hata seretaneghe na Mlungu wapo kwa kubonya wuwiwi anduangi.

²³ Nereiwikieghe memu yake yose imbiri kwapo, hata sereghalukieghe nambai kusigha sharia rake anduangi.

²⁴ Serewadieghe ikosa jingi imbiri kwake, nani nerekulindirieghe nimoni nisebonye wuwiwi.

²⁵ Kwa huwo BWANA wanilipa karakara na mabonyo ghapo gha hachi, angu nisewadie ikosa jingi imbiri kwake.

²⁶ “Kwadakuwonyera kumoni kukaia mloli kwa uo uko mloli ee BWANA, na kwa uo usewadie ikosa kwadakuwonyera kumoni kukaia mucha.

²⁷ Kwadakuwonyera kumoni kukaia mweli kwa uo ukueleshagha moni, na kwa uo uzamie kwadakuwonyera kumoni kukaia mtangali.

²⁸ Oho kwadawikira wandu wikuseragha weni, ela kwadawisera wang'eti.

²⁹ Ee, oho koko taa yapo ee BWANA, na oho Mlungu wapo kwadanilangalishira kira chapo.

³⁰ Ee, nadima kufasha-fasha ijeshi kwa ndighi rako na kwa ndighi ra Mlungu wapo nadima kurama wurighenyi.

³¹ U Mlungu, chia rake reeka rikatie, malaghiro gha BWANA ghawonyera kukaia gha loli. Uo ni sa ngao kwa wose wikimbiriagha wulindiri ghwake.

³² “Nani uko Mlungu iseeka ni BWANA moni? Nani uko mlindiri ela Mlungu odu moni?

³³ U Mlungu ni andu kwapo kumange kokimbiria, nao waibonyere chia yapo ikaie ya banana.

³⁴ Waghibonyere maghu ghapo ghikaangua sa gha shaa, na kuniwika banana andu kuko ighu.

³⁵ Wadanifundisha kutumia mikonu yapo wudenyi; hata nidime kuiruda ndana ikurie.

³⁶ Oho BWANA kwaninekie ngao ya kukia kwako, kukanitesia ngawuya m'baa.

³⁷ Oho kwaniboisire andu kubaa kowadia, na maghu ghapo ndegheretenderukieghe anduangi.

³⁸ Nerewinughieghe wamaiza wapo na kuwitotesha, nani serewurieghe nyuma hata ngawimeria.

³⁹ Nerewimerieghe ngawikumba noko, wikalemwa ni kuwuka; wereghueghe aisi ya maghu ghapo.

⁴⁰ Angu oho kwaninekie ndighi sa kunirusha mkowa, nipate kulwa wuda; na awo wamaiza wapo werewukieghe aighu yapo, kukawiwika aisi ya maghu ghapo.

⁴¹ Oho kwawibonyere wamaiza wapo winikimbie, ee, kwawibonyere awo wizamilwagha ni ini wikimbie, nani ngawitotesha.

⁴² Werelolieghe wikasowa mndungi owikira, weremlilieghe BWANA, ela nderewitumbulieghe anduangi.

⁴³ Nawikabie ngawifasha wikawuya sa teri ya ndoe; nerewifashireghe na kuwichandiria sa mazozo gha chienyi.

⁴⁴ “Oho kwanikirie na nganyi ra wandu wapo, kukaniwika nikaie kilongozi cha mbari ra wandu; hata nawuyadumikilwa ni wandu niserewimanyireghe.

⁴⁵ Waghenyi wikanighoghomia; wiendasikira malagho ghapo tu, wikawuya wenisikira.

⁴⁶ Wafwa ngolo, wikacha kufuma ngomenyi kwawo wikisughusika.

⁴⁷ “BWANA oko moyo; uo mlindiri wapo ndekaso; Mlungu wapo ndekumo nandighi, uo uko mlindiri na mikiri wapo

⁴⁸ uo ni Mlungu unilipiagha kisasi chapo, na kuwika mbari ra wandu aisi yapo;

⁴⁹ uo unikirie na kunifunya kwa wamaiza wapo. Oho kwanijosere ighu aighu ya wakorongi wapo, kukanikira na wang'eti.

⁵⁰ “Kwa wundu ughu nichakukasa aghadi ya iro mbari ra wandu ee BWANA; nichabora makaso gha irina jako.

⁵¹ Mlungu wadamneka wusimi m'baa uo mzuri wake ummbikie, na kuwonyera lukundo lukatie kwa mshingwa mavuda wake; uo Daudi na kivalwa chake kwa kala na kala.”