2 SAMUELI 2 - Biblia Ilagho Jiboie Kwa Wandu Wose

Daudi kubonywa Mzuri wa Juda

¹ Nyuma ya agho Daudi ukamkotia BWANA, “Nijoke nikaie andenyi ya ghumu ghwa mizi ya Juda?” BWANA ukaghamba, “Joka.” Daudi ukakotia, “Nijoka muzi ghuao?” BWANA ukaghamba, “Muzi ghwa Hebroni.”

² Nao Daudi ukajoka chiaimweri na waka wake wawi, Ahinoamu wa muzi ghwa Jezreeli na Abigaili muka mkiwa wa Nabali wa muzi ghwa Karmeli.

³ Daudi ukawireda wandu wake orekwanyeghe nawo, kula mundu na kinyumba chake; wikakaia mizi ya Hebroni.

⁴ Niko wandu wa Juda wikacha, wikamdunga Daudi mavuda ukaie mzuri aighu ya Juda. Nao iji Daudi waghorelwa kukaia wandu wimrikie Sauli ni wa Jabeshi-gileadi,

⁵ ukaduma wandu kwa Wajabeshi-gileadi ukighamba, “BWANA umrasimie inyo, kwa kukaia mwakuwonyere mmbeni kukaia waloli kwa bwana onyu Sauli, mkamrika.

⁶ Idana BWANA um'bonyere wughoma na lukundo lukatie, na nimoni nicham'bonyera nicha angu m'bonyere ilagho iji.

⁷ Nenyo mkufungishe ndighi, mkaie na wuwana; kwa kukaia bwana onyu Sauli wafue, na wandu wa Juda wanidunga mavuda nipate kukaia mzuri aighu yawo.”

Ishboshethi kubonywa mzuri wa Israeli

⁸ Abneri mwana wa Neri, m'baa wa majeshi gha Sauli, oremdwaeghe mwana wa Sauli Ishboshethi ukamreda aja Mahanaimu,

⁹ ukam'bonya ukaie mzuri aighu ya masanga gha Gileadi, Asheri, Jezreeli, Efraimu, Benjamini, na Israeli yose.

¹⁰ Ishboshethi mwana wa Sauli orekoghe mundu wa miaka mirongo ina iji orezoyagha kubonya nguma aighu ya Israeli; ukabonya nguma kwa miaka iwi. Ela kichuku cha Juda chikamnugha Daudi.

¹¹ Daudi ukakaia Hebroni ukibonya nguma aighu ya Juda kwa miaka mfungade na meri irandadu.

Wuda aghadi ya Israeli na Juda

¹² Nao Abneri mwana wa Neri, na wabaa wa Ishboshethi mwana wa Sauli wikajoka kufuma Mahanaimu na kuvika Gibeoni.

¹³ Na Joabu mwana wa Seruia na wabaa wa Daudi wikafuma wikakwana nawo aja kiriwenyi cha Gibeoni; wikasea kidombo aho kiriwenyi wikalangayana wamu ii chia na wamu ii chia.

¹⁴ Abneri ukamzera Joabu, “Wadawana wamu ndewiwuke wisimane weni na weni imbiri kodu.” Joabu, ukaghamba, “Ndewiwuke.”

¹⁵ Niko wikawuka mtalo ghukatane. Wadawana ikumi na wawi kwa wundu ghwa Ishboshethi na kichuku cha Benjamini, na ikumi na wawi wa wadumiki wa Daudi.

¹⁶ Wikawadana chongo kula mundu na m'maiza wake, na kula umu ukamdunga mmbao na lufu lwake luwarunyi; wose mirongo iwi na bana wikaghwa andoenyi, wikafwa. Kwa huwo andu aho kukawangwa Helkath-hazzurim kuko isanga ja Gibeoni.

¹⁷ Niko wuda ghubirie ghukabuka ituku ijo; Abneri na wandu wa Israeli wikakabwa ni wandu wa Daudi.

¹⁸ Wana wadadu wa Seruia werekoghe aho, nawo ni Joabu, Abishai na Asaheli. Uo Asaheli orekoghe uangue sa shaa kwa iseghe.

¹⁹ Nao Asaheli ukamnugha Abneri hata ndereghalukighe mkonu ghwa kiwomi angu ghwa kiwaka anduangi iji oremnughagha.

²⁰ Nao Abneri ukazighana nanyuma ukammbona Asaheli ukamzera, “Wele ni oho Asaheli?” Ukatumbulia, “Ni ini nimoni.”

²¹ Abneri ukamzera, “Ghaluka mkonu ghwa kiwomi angu ghwa kiwaka, kuwade mndumu wa irika kumsoke vilambo.” Ela Asaheli nderelekieghe kumnugha Abneri anduangi.

²² Abneri ukamzera sena, “Asaheli, ghaluka nambai kusighe kuninugha. Kwaki kunishekeriagha nikubwaghe? Huwo nichaghora wada kwa mwanyinyu Joabu?”

²³ Ela ukalegha kughaluka nambai; kwa huwo Abneri ukamdunga na mbela ya ifumu kinyuma-nyuma, hata jikafuma ichia cha mghongo. Nao ukaghwa ukafuya ahoeni. Wandu wose werekoghe wikicha, wiendavika andu Asaheli oreghueghe na kufwa, wikamanga kimusi.

²⁴ Ela Joabu na Abishai wikamnugha Abneri; hata iji iruwa jerekoghe jikineng'ena, wikavika mghondi ghwa Ama, ghuko naimbiri ya Gia, chia eghenda cha kireti cha Gibeoni.

²⁵ Niko wandu wa kichuku cha Benjamini wikakukwanya weni nyuma ya Abneri, wikakaia ijeshi jimweri; wikakaia kimusi mghondinyi koighu.

²⁶ Nao Abneri ukammbanga Joabu, “Wele diabwaghanagha matuku ghose? Ndekuichi kukaia kutua kuchakaia kubirie? Ni lii kuchaawizera wandu wako wisighe kunugha waruna?”

²⁷ Joabu ukaghamba, “Sa iji Mlungu ukaiagha moyo, ngera kusededieghe, awandu wadachaleka kuwinugha waruna kesho.”

²⁸ Niko Joabu ukakaba tarumbeta, na wandu wose wikasigha wuda; hata ndewerewinughieghe Waisraeli sena, na hata ndewichelwa sena anduangi.

²⁹ Abneri na wandu wake wikaghenda kio chee kwa kumaria Araba; wikaruwuka Jordani, wikaghenda hata wikavika Mahanaimu imbiri ya dime ghadi.

³⁰ Joabu ukasigha kumnugha Abneri ukawuya. Hata iji orewikwanyireghe wandu wose chiaimweri, ukawona kukaia wadumiki wa Daudi wiseko ni ikumi na ikenda, Asaheli uko mbai.

³¹ Ela wandu wa Daudi werekoghe wabwagha wandu maghana adadu na mirongo irandadu wa kichuku cha Benjamini, awo werekoghe wa Abneri.

³² Wikamdwa Asaheli na kumrika andenyi ya kaburi ya ndee aho Bethlehemu. Joabu na wandu wake wikalalaghenda kio chee, ndoe ikawielia wavika Hebroni.