2 SAMUELI 17 - Biblia Ilagho Jiboie Kwa Wandu Wose

Hushai kumlaghasha Absalomu

¹ Nyuma ya agho, Ahithofeli ukamzera Absalomu “Sigha nisaghuo wandu elfu ikumi na iwi, nani nichafuma nimnughe Daudi nakio.

² Nichamchea ingelo wasilwa na ndighi na kufwa ngolo, nani nichamngira kiture, na wandu wose ukwanye nawo wichakimbia; nani nichamkaba mzuri uekeri.

³ Niko nichaakuredia wandu wose, sa mwai uchagha mzinyi kwa uja mundu umlowuagha. Jikundikie ni kubwagha mundu umweri, mum'bwaghe, na wandu wose wichasigharika na sere.”

⁴ Mawoni agho ghikam'boia Absalomu, na wabaa wa Israeli wose.

⁵ Nao Absalomu ukaghamba, “Mmbangenyi Hushai, Muariki, nao moni wori dimsikire mawoni ghake.”

⁶ Hushai uendacha, Absalomu ukaghamba, “Huwo niko Ahithofeli wadineka njama; kuwona wada, dibonye sa iji koni waghamba? Ikakaia si huwo kungi, basi dineke mawoni ghako.”

⁷ Hushai ukamzera Absalomu, “Njama wadineke Ahithofeli idime ndeiboie.”

⁸ Hushai ukachuria kughora, “Oho kwaichi ndeyo chiaimweri na wandu wake ni wandu wiwadie ndighi, nawo weko na luwawo sa kibarabara chasokwa wana wake mlambenyi. Aighu ya agho, ndeyo ni mundu uichi maza ra wuda, ndechaalalanya na wandu.

⁹ Yadimika hata idana wakuvisa andenyi ya kina chimu angu andu kumu kuzima. Kwa huwo ukafuma na kuwikaba ifungu ja imbiri ja masikari ghako, aho kula mundu uchaasikira agho malagho uchaghamba, ‘Awandu wisindemnugha Absalomu wabwaghwa.’

¹⁰ Niko hata umundu wako uko ing'oni sa shimba uchafwa ngolo na kuobua; kwa kukaia wandu wa Israeli wose wamwichi ndeyo kukaia ing'oni, na wandu wake ni wandu wa ndighi.

¹¹ Kwa huwo mawoni ghapo ni agha, Waisraeli wose wikwanyike chiaimweri a kwako, kufuma Dani hata Beer-sheba, wengi sa msangagha ghwa baharinyi, na oho kumoni kughendanye nawo wudenyi.

¹² Aho niko dichaamchea chiaimweri andu uko kose dichaamkua, na kumngiria seji mami ghiseagha ndoenyi; na aho uo moni hata na wandu wikwanye, ndekuchaasigharika hata umweri wawo.

¹³ Ukangia na kukuvisa andenyi ya muzi ghumu, Waisraeli wose wichacha na kamba na kughukokota ugho muzi cha vololonyi, hata igho jingi jisesigharike.”

¹⁴ Niko Absalomu na Waisraeli wose wikaghamba, “Mawoni gha Hushai, Muariki ghaboie kuchumba gha Ahithofeli.” Kwa kukaia BWANA orekoghe wabonya mpango ghobwagha mawoni gha Ahithofeli, eri upate kureda mawiwi aighu ya Absalomu.

Daudi kuonywa na kukimbia

¹⁵ Niko Hushai ukawighoria waja wakohani Zadoku na Abiathari, seji Ahithofeli wawineka njama Absalomu na wabaa wa Israeli, na seji uo wawineka.

¹⁶ “Kwa huwo dumenyi wandu shwa-shwa wiendemghoria Daudi uselale iruwukonyi ja kireti, ela ubonye bidii uruwuke putu chiaimweri na wandu wose, wisechemerelwa.”

¹⁷ Jonathani na Ahimaazi werekoghe wikiweseria aja Enrogeli, na mdumiki umu wa waka orekoghe ukighenda na kuwighoria, nawo werekoghe wikighenda na kumghoria Mzuri Daudi; kwa kukaia erekoghe suti wilindie wisewoneke wikingia mzinyi.

¹⁸ Ela mdawana umu orewiwonieghe, ukaghenda na kumghoria Absalomu; kwa huwo waja wandu wose wawi wikaghenda na iseghe na kungia nyumbenyi ya mndumu orekoghe na kisima awazenyi aho Bahurimu; wikachingia icho kisima andenyi.

¹⁹ Uja mundu mkake ukafinikira momu ghwa icho kisima na kusasara viro aighu yaro mndungi usemanyire.

²⁰ Hata iji wadumiki wa Absalomu werechieghe nyumbenyi kwa uja muka, wikamkotia, “Weke Ahimaazi na Jonathani wiao?” Uja muka ukawizera, “Waida na kuruwuka modenyi.” Wiendawilola na kuwisowa, wikawuya Jerusalemu.

²¹ Waja wandu wiendawuya, Ahimaazi na Jonathani wikafuma kisimenyi, wikaghenda na kumghoria Mzuri Daudi seji Ahithofeli wafunya njama elwa nao; wikamzera, “Wuka idakoni shwa-shwa kuruwuke ughu moda kwende.”

²² Niko Daudi chiaimweri na wandu wose orekwanyeghe nawo ukawuka na kuruwuka moda ghwa Jordani; hata ndoe ikiela, ndekoresigharikieghe hata umweri wawo useruwukie moda ghwa Jordani.

²³ Nao iji Ahithofeli wawona kukaia njama yake ndeinughilo, ukajoka punda wake, na kughenda cha mzinyi kwake. Ukaboisa malagho gha nyumbenyi kwake putu, ukakukumba lugha; ukafwa na kurikwa andenyi ya kaburi ya ndee.

²⁴ Nao Daudi ukaghenda ukavika Mahanaimu. Na Absalomu ukaruwuka moda ghwa Jordani chiaimweri na wandu wa Israeli wose.

²⁵ Absalomu orekoghe wammbika Amasa ukaie m'baa wa majeshi wulalo ghwa Joabu. Amasa orekoghe mwana wa mndumu orewangwagha Ithra, Muishimaeli, uo oremlowueghe Abigaili mwai wa Nahashi, sena Abigaili mruna wa waka Seruia ni mae Joabu.

²⁶ Waisraeli na Absalomu wikabonya kambi yawo isanga ja Gileadi.

²⁷ Daudi uendavikia Mahanaimu, Shobi mwana wa Nahashi kufuma Raba mundu wa Waamoni, na Makiri mwana wa Amieli kufuma Lo-debari, na Barzilai, Mgileadi kufuma Rogelimu,

²⁸ wikamredia Daudi vitanda, beseni, nyungu ra wongo, ngano, shairi, mifu, viro vikangilo, mngulu, na dengu,

²⁹ wuki, na siagi, na ng'ondi, na mavuda gha ng'ombe, upate kuja chiaimweri na awo wandu orekwanyeghe nawo. Angu wereghambieghe, “Awandu wazughwa, sena wasilwa kwa wundu ghwa kau aha kireti.”