2 SAMUELI 12 - Biblia Ilagho Jiboie Kwa Wandu Wose

Nathani kumkemia Daudi na kuhea kwa Daudi

¹ Niko BWANA ukamduma Nathani kwa Daudi. Nathani ukacha ukamzera Daudi, “Korekoghe na wandu wawi muzi ghumu; umu orekoghe mzuri wa mali na umu orekoghe mkiwa.

² Uja mundu mzuri orekoghe na ng'ondi na ng'ombe nyingi nandighi;

³ na uja mkiwa nderekoghe na kilambo chingi ela mwana wa ng'ondi mtinieri wa waka oremghueghe ukamlela hata ukakaia ukizoghuanya na wana wake; ukakaia ukija vindo vake ivi veni orejagha, na kunywa na kikombe chake cheni, ukakaia ukilala laghenyi kwake; odeeka sa mwai wake moni.

⁴ Nao ituku jimu uja mzuri wa mali ukachelwa ni mghenyi; ukakurilwa ni kuwada imu ya ng'ondi rake, angu mfugho rake kwa kum'boisiria uja mghenyi vindo, ela ukawada uja mwana wa ng'ondi wa uja mkiwa, na kum'bwaghia uja mghenyi oremchieghe.”

⁵ Nao Daudi ukajokwa ni machu aighu ya uja mzuri wa mali ukamzera Nathani, “Sa iji BWANA ukaiagha moyo, uo mundu orebonyereghe huwo yamfwana ufo;

⁶ sena ulipe uo mwana wa ng'ondi mando ana, angu ubonyere ilagho ijo, na kulegha kummbonia uja mkiwa wughoma.”

⁷ Nathani ukamzera Daudi, “Oho nuo uja mundu. BWANA, uo Mlungu wa Israeli, waghamba ‘Nerekushingieghe mavuda kukaie mzuri aighu ya Israeli, ngakukira kusebwagho ni Sauli;

⁸ ngakuneka ugho wuzuri orekoghe nagho, na awo waka wake; ngakuneka wandu wa Israeli na wa Juda kuwibonyere nguma; na ngera agho ghedeeka matini, neredimagha kukuchuria.

⁹ Kwaki kujimenyere ilagho japo, kukabonya wuwiwi imbiri kwapo? Kwam'bwaghie Uria Mhiti, kukawusa mkake; na koom'bwagha wudenyi kwa kutumia lufu lwa Waamoni.

¹⁰ Kwa huwo, wandu wa kivalwa chako jingi ndewichaakaia wisebwaghwaa kwa lufu, kwa kukaia kwanimenyere kukawusa mka wa Uria uwuye mkako.’

¹¹ ‘Ola nichakuwusiria mawiwi kufuma kwa kivalwa chako cheni. Nichawusa waka wako kukiwona, na kumneka mmbenyu mkwanye; nao uchalala nawo iruwa jikiaka.

¹² Oho korebonyereghe ilagho iji kivisonyi, ela ini nichajibonya mesonyi kwa Waisraeli wose iruwa jikiaka.’”

¹³ Nao Daudi ukamzera Nathani, “Nam'bonyere BWANA kaung'a.” Nathani ukamzera Daudi, “Wokoni BWANA nao, wainja kaung'a yako; ndekufwagha kungi.

¹⁴ Elaima, angu kummenyere BWANA nandighi kwa ibonyo ijo, uo mwana kuvailo uchafwa.”

¹⁵ Nao Nathani ukaghala cha nyumbenyi kwake. Nao BWANA ukamkaba uja mwana orevailoghe Daudi ni mka-Uria, ukawuya mkongo.

Kifwa cha mwana wa Daudi

¹⁶ Daudi ukakaia ukimvoya Mlungu kwa wundu ghwa uja mwana; ukangia chumbenyi, ukakaia ukilala andonyi na kufunga tumu kula kio.

¹⁷ Wabaa wa nyumbenyi kwake wikacha kummbusira, ela ukalegha, hata nderejieghe vindo andwamweri nawo anduangi.

¹⁸ Ituku ja mfungade, uja mwana ukafwa. Wadumiki wa Daudi wikaobua kumghoria wei uja mwana wafwa; kwa kukaia wereghambieghe, “Ikakaia iji mwana orekoghe umoo oreleghieghe kudedanya nesi, wele dikamghoria wei mwana wafwa ikaia wada? Kewada wadima kukubonya moni ilagho.”

¹⁹ Daudi uendawona wabaa wake wikihohoriana, ukamanya kukaia uja mwana wafwa, ukawikotia awo wabaa, “Welee, mwana waafwa?” Wikatumbulia, “Ee wafwa.”

²⁰ Nao Daudi ukawuka, ukakuoghosha na kukushinga mavuda; ukarwa marwao ghake na kughenda cha ngomenyi kwa BWANA, ukamtasa Mlungu. Konyuma ukaghenda nyumbenyi kwake, ukalomba uneko vindo; wikam'boisira vindo na kuviwika imbiri kwake, nao ukaja.

²¹ Wabaa wake wikamzera, “Ni ilaghoki iji kwabonya? Iji mwana orekoghe mkongo, korefungieghe tumu kukimlilia, ela mwana uendafwa, kwawuka kukaja vindo.”

²² Nao ukaghamba, “Iji mwana orekoghe moyo, nerefungieghe tumu ngilila; kwa kukaia neregheshereghe, ‘Kewada BWANA wadima kuniwonia wughoma mwana wapo uboo.’

²³ Ela idana wameria kufwa, nifungiaki sena? Nidima kummbunja sena? Ini nichaghenda kwake, ela uo ndechaawuya kwapo.”

Kuvalwa kwa Solomoni

²⁴ Nao Daudi ukamhoresha mkake Bathsheba, ukangia kwake, ukalala nao; ukava mwana wa womi, nao ukammbanga irina jake Solomoni. BWANA ukamkunda uo mwana.

²⁵ BWANA ukamduma mlodi Nathani uendemmbanga uo mwana Jedidia; kwa kukaia BWANA oremkundieghe.

Daudi kuwada muzi ghwa Raba

²⁶ Joabu ukabonya wuda na Raba muzi ghwa Waamoni na kughuwada ugho muzi ghwa kiwuzuri.

²⁷ Ukaduma wandu kwa Daudi ukighamba, “Nakaba muzi ghwa Raba, ngawada machi garo.

²⁸ Idana kwanya wandu wose wisigharikie chiaimweri, kubonye kambi na kughumara ugho muzi hata kughuwade; nisecheghuwada ghuchewangwa kwa irina japo.”

²⁹ Nao Daudi ukawikwanya wandu wose chiaimweri, ukaghenda Raba; ukalwa na kughuwada.

³⁰ Daudi ukawusa kirumbu cha dhahabu kufuma chongonyi cha Milkomu chiko na wulemeri ghwa kilo mirongo idadu na isanu, na andenyi yaro korekoghe na lulu iboie; na icho kirumbu chikangirwa chongonyi kwa Daudi, ukadwa wunyika vilambo vingi va ugho muzi va zoghori mbaa.

³¹ Ukawidwa wunyika wandu wa ugho muzi, ukawiwika wibonye kazi na misumeno, na sururu ra chuma, na masoka gha chuma; ukawiwika wibonyeghe matofali. Na huwo niko orebonyereghe kwa mizi yose ya Waamoni. Niko Daudi na wandu wose wikawuya Jerusalemu.