2 SAMUELI 11 - Biblia Ilagho Jiboie Kwa Wandu Wose

Daudi na Bathsheba

¹ Nao iji kimu chavika, ingelo wazuri wighendagha wudenyi, Daudi ukamduma Joabu na wabaa, na majeshi gha Waisraeli wose. Wikawikaba Waamoni na kughumara muzi ghwa Raba. Ela Daudi ukasigharika Jerusalemu.

² Ituku jimu luma lwa kenyi, Daudi ukawuka kufuma wulinyi kwake, ukakaia ukisela-sela aighu ya dari ya ngome yake. Nao ukisela aighu darinyi, ukammbona muka umu ukikuoghosha; muka uo orekoghe ughokie nandighi.

³ Nao ukikunda kummanya, ukaduma mndumu ummanyishe malagho gha uo muka. Mndumu ukamzera, “Uo muka ni Bathsheba mwai wa Eliamu, nao ni muka wa Uria, Mhiti.”

⁴ Niko Daudi ukaduma wandu wiendemuonda; nao ukacha, na Daudi ukalala nao. (Uo muka odeeka wameria kukuelesha kufuma merinyi.) Nao ukawuya cha nyumbenyi kwake.

⁵ Niko uja muka ukapata kifu, ukaduma malagho kwa Daudi ukighamba, “Napatiro ni kifu.”

⁶ Nao Daudi ukaduma malagho kwa Joabu ukighamba, “Nidumirie Uria, Mhiti.” Nao Joabu ukamduma Uria kwa Daudi.

⁷ Nao iji Uria wavika, Daudi ukamkotia malagho gha Joabu seji wawuyabonya, na seji wandu wiko, na malagho gha wuda.

⁸ Daudi ukamzera Uria, “Ghenda nyumbenyi kwako kuhore.” Uria ukafuma ngomenyi kwa mzuri; ukadumilwa inosi ni mzuri.

⁹ Ela Uria ukalala aho mnyangonyi ghwa ngome ya mzuri chiaimweri na wadumiki wa mzuri, hata ndereghendieghe nyumbenyi kwake anduangi.

¹⁰ Wandu wikamghoria Daudi, “Uria ndelale nyumbenyi kwake.” Nao Daudi ukamzera Uria, “Nechi wei koofuma charonyi, kwaki kuselale nyumbenyi kwako?”

¹¹ Uria ukamzera Daudi, “Sanduku ya Ilaghano na wandu wa Israeli na wa Juda wose waawuyalala a viwandenyi, na bwana wapo Joabu na wabaa wose wa bwana wapo weeka kambinyi a mlambenyi. Welee, nidima wada kughenda nyumbenyi kuja na kunywa na kulala na muka wapo? Sa iji koni kukaiagha moyo, na roho yako ikaiagha moyo, ini sichaabonya ilagho ijo anduangi.”

¹² Daudi ukamzera, “Idana sinda aha idime kulale na kesho nichakusigha kughende.” Nao Uria ukakaia aho Jerusalemu hata ituku ja kawi.

¹³ Daudi ukamkaribisha; wikaja na kunywa chiaimweri, hata ukammbongera; ela nakio Uria ukaenda ukalala wulinyi chiaimweri na wadumiki wa bwana wake, hata ndereghendieghe nyumbenyi kwake anduangi.

¹⁴ Nakesho yaro, Daudi ukaandika barua kwa Joabu, ukamneka Uria uido.

¹⁵ Andenyi ya barua ukaandika huwu: “Mmbikenyi Uria msitari ghwa imbiri ghwa wuda ghubirie, nao mumsighe ubwagho.”

¹⁶ Nao iji Joabu oreghumariagha muzi, ukammbika Uria andu orekumanyireghe koko na wamaiza wiko mang'oni.

¹⁷ Wandu wa muzi wikafuma kulwa na Joabu; na wadumiki wamu wa Daudi wikabwaghwa, hata na Uria, Mhiti ukabwaghwa wokoni.

¹⁸ Nao Joabu ukaduma mundu kumghoria Daudi seji malagho gha wuda ghakaia;

¹⁹ ukamlaghira ukighamba, “Iji kwameria kumghoria mzuri malagho ghose gha wuda,

²⁰ nao kuwone wakajokwa ni machu na kughamba, ‘Kwaki moreghendagha kaavui na muzi huwu? Huwo ndemuichi kukaia wamaiza wadima kukumba mawanu kufuma naighu ya wurigha?

²¹ Huwo ndemuichi kukaia Abimeleki mwana wa Jerubeshethi odebwaghwa ni muka kwa kumpotuya igho jesha naighu wurighenyi, nao ukafuya Thebesi? Kwaki moreghendagha kaavui na wurigha?’ Aho kuchurie kughora, ‘Na mdumiki wako Uria, Mhiti, wori wafue.’”

²² Niko uja mdumwa ukaghenda na kumghoria Daudi malagho ghose seji oredumiloghe ni Joabu.

²³ Ukamzera Daudi, “Waja wandu weedichumba ndighi, wikaadinugha hata mlambenyi; ela dikawiwunja hata mbengenyi ya muzi.

²⁴ Niko wandu wa ndana wikadilasa na mawanu kufuma wurighenyi naighu, na wadumiki wamu wa mzuri wafue, na mdumiki wako Uria wori wafue.”

²⁵ Nao Daudi ukamzera uja mdumwa, “Kumzere Joabu welee, ‘Kusekaie na wasi kwa agho ghikupatire, kwa kukaia lufu lwadaaja kose kose ii chia na ii chia; kwa huwo kukufungishe ndighi kughuwade ugho muzi;’ na huwo kuchurie kumkumba ngolo.”

²⁶ Nao iji Bathsheba wasikira kukaia mumi wake Uria wafue, ukamlilia nandighi.

²⁷ Hata matuku gha ifwa ghiendasia, Daudi ukaduma, na Bathsheba ukaredwa ngomenyi kwake. Nao ukammbusa ukawuya mkake, nao ukava mwana wa womi. Ela ijo ilagho jerebonyeroghe ni Daudi jikamzamia BWANA.