2 SAMUELI 10 - Biblia Ilagho Jiboie Kwa Wandu Wose

Daudi kuwisima Waamoni na Wasiria

¹ Nyuma ya matuku ghamu, Nahashi mzuri wa Waamoni ukafwa; na mwana wake Hanuni ukabonya nguma wulalo ghwake.

² Daudi ukaghamba, “Kwa kukaia Nahashi orekoghe mloli kwapo, nanimoni nichakaia mloli kwa mwana wake Hanuni.” Niko Daudi ukaduma wadumiki wake, nawo wikangia isanga ja Waamoni; kwendamhoresha Hanuni ngolo.

³ Ela wabaa wa Waamoni wikamzera bwana wawo Hanuni, “Kuakalikia kedi wei Daudi wakudumia wandu wekuhoresha, nao kuwone kedi wamnekie ndeyo ishima; nechi waawiduma wikulawuo oho na isanga iji wori, eri upate kujikaba.”

⁴ Nao Hanuni ukawiwada wadumiki wa Daudi, ukawiara sombe nusu kula umu wawo, na kudumbua nguwo rawo nanyuma kufuma kondonyi hata kiwonunyi, ukawilekeria wighende noko.

⁵ Daudi uendaghorelwa agho malagho, ukaduma wandu wiwimare; kwa kukaia awo wandu werefueghe waya nandighi. Mzuri ukawizera, “Kaienyi Jeriko hata sombe renyu razoghua ima mchecha.”

⁶ Nao iji Waamoni wawona kukaia wamvavira Daudi, wikakodesha Wasiria wa Beth-rehobu, na Wasiria wa Soba, masikari gheghenda na maghu elfu mirongo iwi, na mzuri wa Maaka ukacha na masikari elfu imweri, na wandu wa Tobu elfu ikumi na iwi.

⁷ Daudi uendasikira agho, ukamduma Joabu na majeshi ghose gha wandu wiwadie ndighi.

⁸ Waamoni wikacha na kukupanga kwa wuda aho mbengenyi mzawo; Wasiria wa Soba na Rehobu, na wandu wa Toba na Maaka wikakaia a mlambenyi.

⁹ Nao iji Joabu wawona kukaia wuda ghwapangwa naimbiri na nanyuma, ukasaghua mang'oni ghirumirikie kuchumba gha Israeli, ukawipanga wilo na Wasiria;

¹⁰ na awo wisigharikie ukawiwika aisi ya wulongozi ghwa mruna Abishai, wipate kulwa na Waamoni.

¹¹ Ukawizera, “Wasiria wikabia cha kwapo, kuacha kunitesie, na Waamoni wikabia cha kwako, niacha nikutesie.

¹² Kukaie na ngolo, dilo kiwomi kwa wundu ghwa wandu wedu na kwa wundu ghwa mizi ya Mlungu odu; BWANA ndebonye ijo ujiwonagha nicha kwake.”

¹³ Niko Joabu na wandu wake orekwanyeghe nawo wikasoghoda kaavui na wuda wipate kulwa na Wasiria, na awo Wasiria wikakimbia.

¹⁴ Waamoni wiendawona kukaia Wasiria wakimbia, nawo weni wikamkimbia Abishai na kungia cha mzinyi kwawo. Niko Joabu ukasigha kulwa na Waamoni, ukawuya cha Jerusalemu.

¹⁵ Wasiria wiendawona kukaia wasimwa ni Waisraeli, wikakukwanya chiaimweri.

¹⁶ Na Hadadezeri ukaduma Wasiria awo wikaiagha kimonu cha Moda ghwa Eufrate wiche; wikacha Helamu chiaimweri na Shobaki m'baa wa majeshi gha Hadadezeri wa Soba ukiwilongoza.

¹⁷ Daudi uendaghorelwa, ukakwanya Waisraeli wose, ukaruwuka Moda ghwa Jordani na kucha Helamu. Wasiria wikakupanga weni kumlangaya Daudi, wikalwa nao.

¹⁸ Wasiria wikawikimbia Waisraeli; Daudi ukabwagha Wasiria wandu maghana mfungade weghendesha magare, na wajoki farasi wandu elfu mirongo ina; ukamshoghonua Shobaki m'baa wawo wa majeshi, hata ukafuya ahoeni.

¹⁹ Niko aho awo wazuri werekukwanyireghe na Hadadezeri iji wawona kukaia wameria kusimwa ni Waisraeli, wikalomba sere kwa Waisraeli, na kukuwika aisi yawo. Kwa huwo Wasiria wikaobua, hata ndewichewitesia Waamoni sena.