2 SAMUELI 1 - Biblia Ilagho Jiboie Kwa Wandu Wose

Daudi kumanya kifwa cha Sauli

¹ Nyuma ya kifwa cha Sauli, Daudi ukawuya kufuma kuwibwagha Waamaleki; ukakaia Siklagi matuku awi.

² Ituku ja kadadu, mndumu ukacha kufuma kambinyi ya Sauli, wameria kurashua nguwo rake na kukudunga ndoe chongonyi kwake kuwonyera wasi. Hata iji wacha kwa Daudi, ukaghwa na kudunga chongo chake andonyi kwa ishima.

³ Nao Daudi ukamkotia, “Kwafuma hao?” Ukatumbulia, “Naafufunuka kufuma kambinyi ya Waisraeli.”

⁴ Daudi ukamkotia, “Maza raendie wada? Nighorie.” Uja mundu akatumbulia, “Wandu wakimbirie kufuma wudenyi, na wandu wengi wamerie kubwaghwa; hata Sauli na mwana wake Jonathani wori wabwaghilo.”

⁵ Daudi ukamkotia uja mundu wa irika, “Kwamanya-manya wada kukaia Sauli na mwana wake Jonathani wafue?”

⁶ Uja mundu ukamzera, “Nerekoghe nacha aighu ya Mghondi ghwa Gilboa kwa bahati, na aho ngammbona Sauli ukikusaghika na ifumu jake; na magare na wajoki farasi werekoghe wikimnugha kaavui.

⁷ Nao iji orezighanireghe nanyuma, ukaniwona ukaniwanga; ngadika ‘Neko.’

⁸ Ukanizera, ‘Oho nani?’ Ngamtumbulia, ‘Ini ne Muamaleki.’

⁹ Nao ukanizera, ‘Choo kaavui kunibwaghe; kwa kukaia nashoghonolwa nandighi, nani siwuefwa.’

¹⁰ Niko ngasoghoda kaavui nao ngam'bwagha; kwa kukaia nerekoghe na wuloli kukaia ukaghwa uchafwa. Nani ngawusa icho kirumbu cherekoghe chongonyi kwake, na izango jerekoghe kikotonyi kwake; navo hevi bwana wapo nakuredia.”

¹¹ Niko Daudi na wandu wose werekwanyeghe nao wikarashua nguwo rawo kuwonyera wasi.

¹² Wikalila na kudikwa ni mbori, wikafunga tumu hata luma lwa kenyi kwa wundu ghwa Sauli na mwana wake Jonathani, na kwa wundu ghwa ijeshi ja BWANA, na wandu wa Israeli wibwaghilo kwa lufu.

¹³ Niko Daudi ukamkotia uja mundu wa irika, “Kwafuma hao?” Ukatumbulia, “Ini ne mwana wa Muamaleki, mundu omara-mara.”

¹⁴ Daudi ukamzera, “Yakaia wada kusereobueghe kughorua mkonu ghwako na kumtotesha uo mshingwa mavuda wa Mlungu?”

¹⁵ Niko Daudi ukammbanga umu wa wadawana ukamzera, “Bwagha umundu.” Nao ukamkaba na kum'bwagha.

¹⁶ Daudi ukaghamba, “Bagha yako ndeikaie aighu kwako koni, kwa kukaia kwashuhudia kwa momu ghwako ghoni kukighamba, ‘Nam'bwagha mshingwa mavuda wa Mlungu.’”

Daudi kumlilia Sauli na Jonathani

¹⁷ Nao Daudi ukawililia Sauli na mwana wake Jonathani kwa lumbo,

¹⁸ ukalaghira lufundisho wandu wa Juda, nalo lwaandikilo andenyi ya chuo cha Jashari. Ukabora huwu:

¹⁹ “Mundu orekoghe wubaa ghwako ee Israeli, wabwaghilo aighu mighondinyi kwako Agha mang'oni ghaghue wada!

²⁰ Mseghorie wandu wa Gathi agha malagho, hata mseghighore chienyi ra Ashkeloni. Wai wa Wafilisti wicheboilwa; wai wa wandu wiseshamishiro wichekujosa.

²¹ “Inyo mighondi ya Gilboa, mami na vua isewoneke konyu, hata mbuwa renyu risebuke kindo chingi; kwa kukaia aho niko ngao ya ing'oni eredaghiloghe kwa lumenyo ngao ya Sauli ndeichaazugulwa na mavuda sena.

²² Ngelo ebwagha mang'oni gha wudenyi, ndana ya Jonathani jingi ndeighoshere; na lufu lwa Sauli ndeluwurie luduu.

²³ “Sauli na Jonathani werekoghe wakundwa wikundikie ndewitane jingi kufuma wiko moyo hata kifwa. Werekoghe wiangue kuchumba indu, werekoghe na ndighi kuchumba shimba.

²⁴ “Inyo wai wa Israeli, mlilienyi Sauli, uo oremrushireghe nguwo ra ngundu ra zoghori mbaa, na kumpamba na vilambo va dhahabu na lulu.

²⁵ “Agha mang'oni ghaghue wada aghadi ya wuda! Jonathani wabwaghilwa aighu mighondinyi kwako.

²⁶ “Kwaniwawa nandighi mwanidu Jonathani Koreniboiagha nandighi, lukundo lwako cha kwapo lodeeka lwa mashiniko; nalo lwachumbie lukundo lwa waka.

²⁷ “Agha mang'oni ghaghue wada na maswagha gha wuda kutota!”