1 WAZURI 9 - Biblia Ilagho Jiboie Kwa Wandu Wose

Mlungu kumfutukia Solomoni sena

¹ Mzuri Solomoni uendameria kuiagha Hekalu, na ngome ya nyumba ya mzuri, na ivo vose orekundieghe kuviagha,

² BWANA ukamfutukia Solomoni indo ja kawi, sa iji oremfutukieghe aja Gibeoni.

³ BWANA ukamzera, “Nameria kusikira malombi ghako na kuvoya kwako. Namerie kuiwika wakfu ihi Hekalu kuiaghie ikaie andu konitasira matuku ghose. Nichakaia ngiizighana, na kuilindia tulituli.

⁴ Na oho kukanidumikia kwa ngolo na wuloli sa ndeyo Daudi, na kubonya agho ghose nikulaghirie, kwa kuiwadia memu yapo na sharia rapo,

⁵ nichajikatisha ilaghiro japo neremlaghirieghe ndeyo Daudi ngighamba kukaia kivalwa chake chichawibonyera wandu wa Israeli nguma kwa kala na kala.

⁶ Ela oho angu kivalwa chako chikasigha kuninugha, na kulegha kusikira Sharia rapo na memu yapo nimnekie, na kuendatasa milungu mizima,

⁷ niko nichawiinja wandu wapo Israeli isangenyi ijo nerewinekieghe, na iyo Hekalu nereiwikieghe wakfu kwa wundu ghonitasira nichaiinja niseiwoneghe. Wandu wa Israeli wichamenyeka na kuwuya wesekwa ni wandu wose.

⁸ Hekalu ihi ichawuya kifungu cha ighacho. Kula mundu uchaaida chienyi uchaaturukia na kushinika ukikotia, ‘Kwaki BWANA ujibonyere iji isanga na ihi Hekalu huwu?’

⁹ Wandu wichatumbulia, ‘Ni angu wimsighie BWANA Mlungu wawo, uo orewifunyireghe weke wawae isanga ja Misri; wikawoka kuitasa milungu mizima na kuidumikia; kwa huwo niko wapatwa ni ughu wasi.’”

Mapatano gha Solomoni na Hiramu

¹⁰ Solomoni oreaghieghe Hekalu chiaimweri na ngome yake kwa miaka mirongo iwi.

¹¹ Mzuri Hiramu wa Tiro nuo oremnekieghe midi ya sida, na misumbesu, na dhahabu sa iji koni orekundieghe. Na Mzuri Solomoni ukamneka Hiramu mizi ikumi ya isanga ja Galilaya.

¹² Ela iji Hiramu orechieghe kuiwona iyo mizi orenekeloghe, ndeerem'boieghe.

¹³ Niko ukamzera Solomoni, “Ni miziki ihi kwanineka mwanidu?” Niko huwo andu aho kwadawangwa Kabuli hata idime.

¹⁴ Hiramu orekoghe wamneka Mzuri Solomoni dhahabu ichumbagha kilo elfu inya.

Kazi zima reremereloghe ni Solomoni

¹⁵ Mzuri Solomoni oretumieghe wandu wa kazi redumikishwa kuiagha Hekalu na ngome ya mzuri, na viluwatiro vemazira, na wurigha ghwa muzi ghwa Jerusalemu, na Hazori, na Megido, na Gezeri.

¹⁶ (Mzuri wa Misri orejokieghe ukaghungiria muzi ghwa Gezeri ukaghuwada na kughukora. Ukawibwagha Wakanaani werekoghe aho. Ugho muzi ukaghufunya malasi gha harusi kwa mwai wake orelowologhe ni Solomoni.

¹⁷ Niko Solomoni ukaghuagha ugho muzi ghwa Gezeri,) na Beth-horoni ya Isi,

¹⁸ na Baalathi, na Tamari ghuko kireti cha Juda;

¹⁹ chiaimweri na iro nganya rose ra mzinyi Solomoni orekoghe naro, na mizi ya magare ghake, na farasi rake, na icho chose Solomoni orekundieghe kuchiagha Jerusalemu na Lebanoni na kwa masanga ghose orekoghe ukighibonyera nguma.

²⁰ Solomoni ukawidumikisha wandu wose wiseko Waisraeli weresigharikieghe wa Waamori, na Wahiti, na Waperizi, na Wahivi, na Wajebusi;

²¹ werekoghe vivalwa va awo weresigharikieghe isangenyi wisetoteshero putu ni Waisraeli, nawo wadua wazumba hata idime.

²² Solomoni nderewibonyereghe wandu wa Israeli kukaia wazumba anduangi, ela orewibonyereghe wikaie masikari, na wabaa wa serikali, na wabaa wa kazi, na vilongozi va wuda, vilongozi va magare, na wajoki farasi.

²³ Korekoghe na wabaa wamu maghana masanu na mirongo misanu werewikiloghe ni Solomoni wezighana wambao weredumikiagha mipango ya maendeleo ghake.

²⁴ Mwai wa mzuri wa Misri, uo orelowologhe ni Solomoni, orefumieghe aho mzinyi kwa Daudi, ukaghenda kwa ngome yake moni iyo Solomoni oremuaghieghe; niko Solomoni ukaagha vija viluwatiro vemaziria.

²⁵ Solomoni orekoghe ukifunya vizongona vekora na va mapatano aighu ya agho madhabahu oremuaghieghe BWANA mando adadu kwa mwaka. Sena ukamfukiria BWANA marumba chiaimweri navo. Niko huwo oreimerieghe iyo Hekalu.

²⁶ Wokoni Mzuri Solomoni oreaghieghe meli nyingi aho Ezion-geberi kaavui na Elathi, pwani ya bahari ya Shamu, isanga ja Edomu.

²⁷ Mzuri Hiramu ukaduma mabaharia wake wiichi kudumika baharinyi widumike chiaimweri na wadumiki wa Solomoni.

²⁸ Wikaghenda Ofiri, wikamredia Solomoni dhahabu ichumbagha kilo elfu ikumi na inya.