1 WAZURI 8 - Biblia Ilagho Jiboie Kwa Wandu Wose

Kuredwa kwa Sanduku ya Ilaghano Hekalunyi

¹ Niko Mzuri Solomoni ukawikwanya Wabaa wose na waghosi wose wa mbari ya Israeli aho Jerusalemu, wipate kuifunya Sanduku ya Ilaghano mzinyi kwa Daudi aho Sioni, na kuighenja Hekalunyi.

² Wandu wose wa Israeli wikakwanyika kwa Mzuri Solomoni ngelo ya Ndima ya Viwanda mori ghwa Ethanimu, nagho ni mori ghwa mfungade.

³ Vilongozi vose va Israeli wiendacha, wakohani wikaiduka iyo Sanduku,

⁴ wikaireda Hekalunyi. Wokoni Walawi na wakohani wikaiduka Hema Ekwania chiaimweri na vilambo varo, wikavireda andenyi ya Hekalu.

⁵ Mzuri Solomoni andwamweri na wandu wose wa Israeli wikakwanyika imbiri ya Sanduku ya Ilaghano, wikafunya kizongona cha ng'ondi na ng'ombe nyingi risetalikagha kwa wungi ghwaro.

⁶ Niko wakohani wikaingira iyo Sanduku ya Ilaghano andu kwaro aho Andu kwa Wueli Kuchumbie, nandonyi ya mawawa gha agho makerubi.

⁷ Makerubi ghereghorueghe mawawa ghawo naighu ya iyo Sanduku na midi yaro eiduka.

⁸ Midi eduka Sanduku erekoghe milacha, hata mido yaro eredimagha kuwonwa ni mundu uko andenyi Hekalunyi kaavui na Andu kwa Wueli Kuchumbie, ela mundu uko cha shighadi nderedimagha kuiwona; nayo eko ahoeni hata limu.

⁹ Ndekorekoghe na kilambo chingi andenyi ya iyo Sanduku, ela ivo vishawalata va magho verengiriloghe ni Musa aho Mghondi ghwa Sinai, iji BWANA orebonyereghe ilaghano na wandu wa Israeli ngelo werefumieghe Misri.

¹⁰ Nao iji Wakohani werefumieghe aho Hekalunyi iwingu jikacha na kuichura iyo Hekalu,

¹¹ jikang'ala-ng'ala kwa wubaa ghwa BWANA, hata wakohani wikalemwa ni kungiabonya kazi rawo.

¹² Niko Solomoni ukaghamba, “BWANA kwawikie iruwa mawingunyi, ela sena kwaghambie kwadima kukaia andenyi ya iwingu jikambie.

¹³ Nakuaghie nyumba mbaa, andu kuchaakaia kwa kala na kala.”

Solomoni kughora na wandu

¹⁴ Nao Mzuri Solomoni ukawighalukia wandu wa Israeli werekoghe kimusi, ukawirasimia.

¹⁵ Ukighamba, “BWANA, uo Mlungu wa Israeli ndekaso. Wakatishire ijo ilaghiro jake oremlaghirieghe aba Daudi kwa momu ghwake ukighamba,

¹⁶ ‘Kufuma ituku jija nerewijosereghe wandu wapo Israeli kufuma isanga ja Misri, seresaghueghe muzi ghungi aghadi ya vichuku vose va Israeli nipate kuagha Hekalu enitasira; ela nerekusaghueghe oho Daudi, kupate kuwibonyera wandu wapo Israeli nguma.’”

¹⁷ Solomoni ukachuria kughora, “Aba Daudi orekoghe na mpango ghoagha Hekalu emtasira BWANA Mlungu wa Israeli.

¹⁸ Ela BWANA oremzerieghe aba Daudi, ‘Kwabonyere nicha kukaia na mpango ghoniaghia Hekalu,

¹⁹ elaima si oho ungi kuchaaiagha. Mwana wako moni nuo uchaaiagha iyo Hekalu enitasira.’

²⁰ “Idana BWANA wameria kujikatisha ilaghiro jake, kwa kukaia nawikilo nichiserie icho kifumbi cha nguma cha Israeli wulalo ghwa aba Daudi, sa iji koni BWANA orelaghirieghe. Idana nameria kuiagha Hekalu emtasira BWANA Mlungu wa Israeli.

²¹ Nameria kuiwika Sanduku ya Ilaghano aho, iyo iko na Ilaghano ja BWANA, ijo orebonyereghe na weke aba iji orewifunyireghe isanga ja Misri.”

Ilombi ja Solomoni

²² Niko Solomoni ukakaia kimusi imbiri ya madhabahu gha BWANA ikwanyiko jose ja Israeli jikiwona; ukaiwusira mikonu yake cha mlungunyi

²³ ukaghamba, “Ee BWANA Mlungu wa Israeli, ndekuwadie Mlungu ungi uko sa oho mlungunyi aighu, hata andoenyi na kosi uo ukatishagha ilaghano jake na lukundo lwake lukatie kwa wadumiki wake awo wimnughagha kwa ngolo rawo rose.

²⁴ Oho kwajimangishire ijo ilaghano korebonyereghe na mdumiki wako aba Daudi, sa iji koni koreghorieghe. Kwajilaghirie kwa momu ghwako, na idime kwajikatisha kumoni.

²⁵ Kwa huwo idana ee Mlungu wa Israeli, katisha ilaghiro jako ijo koremlaghirieghe mdumiki wako aba Daudi kukighamba, ‘Ikakaia wana wako wichaghenda kwa kunisikira sa iji koni oho koreghendieghe, na jingi ndekuchaasowa mundu oseria icho kifumbi cha nguma cha Israeli.’

²⁶ Idana ee Mlungu wa Israeli, kujimangishe ilagho jako ijo koremzerieghe mdumiki wako aba Daudi.

²⁷ “Ela loli Mlungu wadima kukaia ndoenyi? Zighana mlungunyi kwa ighu ndekukukatagha, ni kuchumba saki i Hekalu nakuaghia!

²⁸ BWANA Mlungu wapo, ini ne mdumiki wako. Sikira malombi ghapo, kunikatishire seji nilombagha.

²⁹ Kuizighane Hekalu ihi kio na dime, andu kukusaghue kutasoghe. Iji nalomba ngiilangaya Hekalu ihi, kunisikire.

³⁰ Iji ini mdumiki wako na wandu wako Israeli dalomba dikilangaya andu aha, kusikire aho mlungunyi kwako kukaiagha, kudifuye wughoma.

³¹ “Mndungi ukamkosera mmbao, na kuredwa madhabahunyi kwako andenyi ya Hekalu ihi upate kubonya ighemi seji usewadie ikosa,

³² kusikire aho kwako mlungunyi ee BWANA, kuwitanye wadumiki wako. Kumkabe mkosi seji imfwane, na kumlekeria uo usewadie ikosa.

³³ “Wandu wako Israeli wikasimwa ni wamaiza wawo kwa wundu ghokubonyera kaung'a, wikaghaluka na kukurumiria oho wikikulomba wughoma na kukuvoya andenyi ya Hekalu ihi,

³⁴ kusikire aho mlungunyi, kufuye wughoma kaung'a ya wandu wako Israeli, kuwiwunje isangenyi korewinekieghe weke wawae.

³⁵ “Kukaighiria vua isenye kwa wundu ghwa wandu wako kukubonyera kaung'a, wikahea na kukurumiria kwa kuvoya na kulomba angu kwawitirira, wikilangaya Hekalu ihi,

³⁶ kusikire aho mlungunyi, kufuye wughoma kaung'a ya wadumiki wako Israeli. Kuwifundishe kubonya agho ghiko gha hachi, kurede vua isangenyi korewinekieghe jiwuye ifwa jawo.

³⁷ “Njala ikakaia isangenyi, angu saka izamie angu makongo gha miwalwa, angu zighe, angu mwapazi, sena wamaiza wawo wikawirughaia wikawingiria na kuwada ghumu ghwa mizi yawo, ngera ni wukongo ghwa ngawawi, angu wukongo ugho ghose;

³⁸ ilombi ijo jose angu kuvoya kwabonywa ni mndungi angu wandu wose wa Israeli, kula umu ukiwawa ni ngolo kwa loli, na kuwusira mikonu yake nokoighu wikilangaya Hekalu ihi,

³⁹ kusikire aighu kwako mlungunyi kukaiagha, kufuye wughoma, kum'bonyere kula mundu kunughana na mabonyo ghake ghose, kwa kukaia kwaichi ngolo yake; (angu ni oho kuekeri kuichi ngolo ra wandu wose.)

⁴⁰ Niko aho wichaakuobua oho matuku ghose wichaakaia andenyi ya isanga korewinekieghe weke wawa.

⁴¹ “Wokoni mghenyi useko wa mbari ya wandu wako Israeli, ukacha kwa irina jako kufuma isanga ja kula,

⁴² (kwa kukaia wichasikira sare ya irina jako, na ndighi rako mbaa) ukacha kulomba ukiilangaya Hekalu ihi,

⁴³ kusikire aighu kwako mlungunyi kukaiagha; kumkatishire uo mghenyi malombi ghake, eri wandu wa mbari rose ra ndoenyi wikumanye oho na kukusikira sa wandu wako Israeli, wipate kumanya kukaia Hekalu ihi niiaghie ni kwa wundu ghokutasa oho.

⁴⁴ “Iji kwaduma wandu wako wiendelwa na wamaiza wawo, na iji wakulomba oho BWANA wikilangaya ughu muzi koreghusaghueghe, na Hekalu niiaghie ekutasira,

⁴⁵ kusikire malombi ghawo na kuvoya kwawo aho mlungunyi, kuwineke wusimi.

⁴⁶ “Wandu wako wikakubonyera kaung'a, (angu ndekuwadie mndungi usebonyagha kaung'a), na kwa wundu ghwa machu ghako kuwisighe wisimo ni wamaiza wawo, na kudwalwa wunyika cha isanga izima jiko kula,

⁴⁷ wikaghaluka na kuhea wikivoya kwa ngolo wiko ahoeni wikiwona seji wibonyere kaung'a na wuwiwi.

⁴⁸ Wikahea kwa akili rawo rose, na kwa ngolo rawo ahoeni isangenyi kwa wamaiza wawo werewidwaeghe wunyika, wikilomba kwa kulangaya isanga korewinekieghe weke wawae, na muzi ugho koreghusaghueghe, na Hekalu niiaghie ekutasira;

⁴⁹ kusikire malombi na kuvoya kwawo aighu kwako mlungunyi kukaiagha, kuwikatishire haja rawo.

⁵⁰ Kuwifuye wughoma wandu wako wikubonyere kaung'a, na wuwiwi, kuwineke kuwonelwa wughoma ni awo wandu wiwidwae wunyika.

⁵¹ Awo ni wandu wako na ifwa jako, korewifunyireghe Misri ghadi na ghadi ya iwiwi ja modo ghubirie.

⁵² “Kuzighane kuvoya kwa mdumiki wako mzuri, na kuvoya kwa wandu wako Israeli; kuwisikire iji wakulilia.

⁵³ Oho korewisaghueghe kufuma kwa wandu wa mbari rose ra ndoenyi wipate kuwuya ifwa jako, sa iji koni koreghorieghe kwa Musa mdumiki wako, iji korewifunyireghe weke wawa Misri, ee BWANA Mlungu.”

Malombi gha kutua

⁵⁴ Solomoni uendameria kulomba na kumvoya BWANA, ukawuka imbiri ya madhabahu ya BWANA aho oredungieghe ngokoro na mikonu yake yawusirwa nokoighu cha mlungunyi;

⁵⁵ ukawuka kimusi na kujirasimia ikwanyiko jose ja wandu wa Israeli kwa lwaka lubaa ukighamba,

⁵⁶ “BWANA ndekaso, uo uwinekie wandu wake Israeli sere sa iji koni orewilaghirieghe. Wakatishire malaghiro ghake ghose ghiboie oreghibonyereghe kwa mdumiki wake Musa.

⁵⁷ BWANA Mlungu odu ndekaie andwamweri nesi sa iji koni orekaieghe na weke wawa wedu; usakedisigha kuleghaditala.

⁵⁸ Ndedibonye dimsikireghe, eri diduo dikibonya seji ukunde; dikiriwadia sharia rake na memu yake iyo orewinekieghe weke wawa wedu.

⁵⁹ BWANA Mlungu odu ndekumbuke tuli tuli malombi na kuvoya nabonya kwake; unikatishire ini mdumiki wake, na wandu wake Israeli haja ra kula ituku,

⁶⁰ eri wandu wose wa ndoenyi wipate kumanya kukaia ndeuko Mlungu ungi mzima ela BWANA.

⁶¹ Kwa huwo mkaie waloli kwa BWANA Mlungu odu kwa kuwadia sharia rake na memu yake sa iji mwawuyabonya idime.”

Kuwikwa wakfu kwa Hekalu

⁶² Niko Mzuri Solomoni andwamweri na wandu wose wa Israeli wikamfunyira BWANA vizongona.

⁶³ Solomoni ukamfunyira BWANA kizongona cha mapatano ng'ombe elfu mirongo iwi na iwi, na ng'ondi elfu ighana na mirongo iwi. Kwa huwo Mzuri na wandu wose wa Israeli wikaiwika Hekalu wakfu.

⁶⁴ Ituku ijo jeni, ukawika waza ya ghadi na ghadi wakfu, iyo erekoghe naimbiri ya Hekalu. Ukafunya vizongona vekora aho, na vizongona va viro, na mavuda gha iro nyamandu kwa wundu ghwa vizongona va mapatano. Orebonyereghe huwo kwa kukaia madhabahu ya shaba edeeka ndini isedimagha kukata ivo vizongona vose.

⁶⁵ Solomoni ukabonya Ndima ya Viwanda chiaimweri na wandu wa Israeli wose ahoeni Hekalunyi kwa matuku mfungade. Korekoghe na ikwanyiko ja wandu ibaa na ndighi kufuma Mbenge ya Hamathi cha kaskazinyi hata mwano ghwa Misri cha kusinyi.

⁶⁶ Ituku ja wunyanya, ukalaghana na wandu wikaghala. Wandu wose wikamkuma mzuri na kughenda cha mizinyi kwawo kwa kuboilwa kubaa kwa wundu ghwa wucha ghose BWANA ughubonyere kwa mdumiki wake Daudi na kwa wandu wake Israeli.