1 WAZURI 6 - Biblia Ilagho Jiboie Kwa Wandu Wose

Solomoni kuiagha Hekalu

¹ Miaka maghana ana na mirongo wunyanya iendasia, nyuma ya wandu wa Israeli kufuma Misri, mwaka ghwa kana ghwa kubonya nguma kwake Solomoni aighu ya Israeli, mori ghwa kawi ghuwangwagha Zivu, Solomoni orezoeghe kuiagha Hekalu.

² Hekalu ereaghiloghe ni Solomoni kwa wundu ghwa BWANA, erekoghe na wulacha cha nandenyi ghwa meta mirongo iwi na mfungade, na wushapa ghwaro meta ikenda, na wuighu ghwa meta ikumi na idadu pointi isanu.

³ Lukumbi lwa Hekalu, loresighaneghe na iaghi kwa meta inya na pointi isanu, na wulacha ghwaro meta ikenda ghukatane na wushapa ghwa Hekalu.

⁴ Ukabonya madirisha gha iyo Hekalu, fremu raro rifungilo na chuzi ra chekecheke.

⁵ A wurighenyi ghwa shighadi orechurieghe vumba vimu va gorofa chuwarunyi na nanyuma ya Hekalu, kula chimu chiko na wuighu ghwa meta iwi na pointi iwi, kuimara chia rose.

⁶ Chumba cha nandonyi cherekoghe na wushapa ghwa meta iwi na pointi iwi, na cha ghadi na ghadi cherekoghe na wushapa ghwa meta iwi na pointi mfungade, na cha naighu cherekoghe na wushapa ghwa meta idadu na pointi imweri. Wurigha ghwa Hekalu ghorekoghe msuse kuchumba ghuja ghwa nandonyi kwa kula gorofa, eri vumba vimange veni aighu ya wurigha.

⁷ Magho gheretumiloghe kwa kuagha Hekalu, gherewachilo ahoeni ghikoterwagha, eri nyondo angu isoka angu chombo chingi cha chuma chisesikirike ngelo ya kuagha Hekalu.

⁸ Mnyango ghongia gorofa ya nandonyi ghorekoghe cha kusinyi, na aho korekoghe na viluwatiro vejoka nokoighu chumbenyi cha ghadi, na cha koighu.

⁹ Niko Mzuri Solomoni ukameria kuiagha ija Hekalu, ukangira dari kwa kutumia vilingo va mbau na mbau ra sida.

¹⁰ Ukaiagha ija nyumba aluwarunyi lwa Hekalu; kula gorofa erekoghe na wuighu ghwa meta iwi na pointi iwi ikawadanishwa na Hekalu kwa mbau ra sida.

¹¹ BWANA ukamzera Solomoni,

¹² “Kwa maza ra Hekalu ihi kwaiagha, iji kwaghenda kwa kusikira sharia rapo, na kusikira malaghiro ghapo ghewadia memu yapo na kuinugha, aho niko nichaajimangisha ilagho japo kwako, ijo neremghorighe ndeyo Daudi.

¹³ Nani nichakaia aghadi ya wandu wapo Israeli, hata sichaawida anduangi.”

¹⁴ Niko Solomoni ukameria kuiagha ija Hekalu.

Mapambo gha Hekalu gha nandenyi

¹⁵ Mawurigha gha nandenyi gha Hekalu ukaghikabiria mbau ra sida kufuma sakafunyi hata darinyi; ukafinikira sakafu na mbau ra msumbesu.

¹⁶ Sena ukaagha chumba cha nandenyi nanyuma ya Hekalu cha meta ikenda, kwa kutumia mbau ra sida kufuma sakafu hata darinyi, nacho chawangwa Andu kwa Wueli Kuchumbie.

¹⁷ Hekalu ya wulalo ghwa nandenyi isigharikie naimbiri ya Andu kwa Wueli Kuchumbie, erekoghe na wulacha ghwa meta ikumi na wunyanya.

¹⁸ Iro mbau ra sida reretumiloghe cha nandenyi rerewachiloghe fwana ra mbogha na maua ghisheghelukie; kula andu nandenyi kodeeka ni sida nduu, ndekorewonekieghe igho jingi.

¹⁹ Nanyuma ya Hekalu nandenyi Solomoni oreaghieghe chumba chewika iyo Sanduku ya Ilaghano ja BWANA.

²⁰ Icho chumba cha nandenyi cherekoghe na wulacha ghwa meta ikenda, na wushapa ghwa meta ikenda, na kwenda nokoighu meta ikenda. Chumba chose chereshingiloghe dhahabu. Wokoni Solomoni orebonyereghe madhabahu kwa mbau ra sida.

²¹ Hekalu yose oreishingieghe dhahabu nandenyi; ukabonya mnyororo ghwa dhahabu ghofunga andu kongiria kwa icho chumba cha ndenyi, na icho chumba wokoni chereshingiloghe dhahabu.

²² Hekalu yose oreishingieghe dhahabu nandenyi; na ija madhabahu erekoghe andenyi ya Andu kwa Wueli Kuchumbie, wokoni ukaishinga dhahabu.

²³ Orebonyereghe fwana ra makerubi awi kwa mudi ghwa mzeituni, kula imu iko na wulacha ghwa meta inya na pointi inya; ukariwika andenyi ya Andu kwa Wueli Kuchumbie.

²⁴ Mawawa gha agho makerubi gherekoghe na wulacha ghwa meta iwi na pointi iwi kula jimu; kipimo cha mawawa ghose kufuma mudo ghwa iwawa jimu hata mudo ghwa jija iwawa jimu ni meta inya na pointi inya.

²⁵ Wokoni jija ikerubi jimu jerekoghe na wulacha ghwa meta inya na pointi inya. Makerubi ghose awi ghedekatana sena ghedefwanana.

²⁶ Wulacha ghwa ikerubi jimu ghodeeka meta inya na pointi inya karakara na mmbao.

²⁷ Solomoni ukariwika iro fwana ra makerubi andenyi ya Andu kwa Wueli Kuchumbie, eri mawawa ghawo ghighorokie ghiadadane ghadi na ghadi, na kutuonyi kwa mawawa ghawo, ghiadade wurigha ghwa chumba ii chia na ii chia.

²⁸ Nao ukarishinga dhahabu.

²⁹ Mawurigha ghose gha iyo Hekalu oreghipambieghe kwa kukota fwana ra makerubi, na ra mitende, na ra maua ghisheghelukie, kula andu chumbenyi cha nandenyi, na icho kibaa cha shighadi wori.

³⁰ Na sakafu wori oreishingieghe dhahabu.

³¹ Sena orebonyereghe mnyango kwa mudi ghwa mzeituni ghorughuka andu kuwi, kwa wundu ghongia Andu kwa Wueli kuchumbie; ukawikiria achi naighu ya kizingiti cha mnyango.

³² Ukakota fwana ra makerubi, na mitende, na maua ghisheghelukie aighu ya iyo minyango iwi. Iyo minyango na iro fwana ukarishinga dhahabu.

³³ Ukabonya fremu ya mnyango ghongia cha Hekalunyi ghwa mbembe inya kwa mudi ghwa mzeituni,

³⁴ na minyango iwi ekucha ya msumbesu.

³⁵ Ukakota fwana ra makerubi aighu ya iyo minyango, na mitende, na maua ghisheghelukie; ukaghishinga dhahabu.

³⁶ Ukaagha waza ya nandenyi kwa magho ghiwachilo; kula laini idadu ra magho ghiwachilo ukaisa laini imweri ya mbau ra msida.

³⁷ Msingi ghwa Hekalu ghoreaghiloghe mori ghwa kawi ghuwangwaghwa Zivu, mwaka ghwa kana ghwa kubonya nguma kwa Solomoni.

³⁸ Mwaka ghwa ikumi na imweri ghwa kubonya nguma kwa Solomoni, mori ghwa wunyanya ghuwangwaghwa Buli, Hekalu yose ikamerelwa kuaghwa sa iji koni mpango ghwaro ghorekoghe. Ereaghiloghe kwa miaka mfungade.