1 WAZURI 5 - Biblia Ilagho Jiboie Kwa Wandu Wose

Solomoni kukutumbanya kuagha Hekalu

¹ Hiramu mzuri wa Tiro orekundaneghe na Daudi. Hata iji wasikira kukaia Solomoni washingilo mavuda ukaie mzuri wulalo ghwa ndee, ukaduma Wadumwa wake wabaa kwa Solomoni.

² Solomoni ukamdumia Hiramu malagho ukighamba,

³ “Oho kwamanya kukaia aba Daudi nderedimieghe kuagha Hekalu emtasira BWANA Mlungu wake, angu orekoghe ukilwa na wamaiza wake weremmarieghe chia rose, hata BWANA ukamtesia kuwisima wamaiza wake.

⁴ Ela idana BWANA Mlungu wapo waninekie sere kula andu; sina wamaiza hata ndengwa engirilwa.

⁵ Kwa huwo, nawuyakaia na nia eagha Hekalu emtasira BWANA Mlungu wapo, sa iji koni BWANA oremlaghirieghe aba Daudi ukighamba, ‘Mwana wako, uo nichaamseresha kidombo aighu ya kifumbi chako cha nguma wulalo ghwako, nuo uchaaniaghia Hekalu enitasira.’

⁶ Kwa wundu ugho kuwilaghire wadumiki wako winidemie misida ya Lebanoni. Wadumiki wapo wichabonyanya kazi na wako, nani nichakulipa mafungu kuchaalomba kwa wundu ghwa wadumiki wako. Kwa kukaia oho kwamanya ndediwadie mndungi uichi kudema midi nicha sa Wasidoni.”

⁷ Hiramu uendasikira malagho gha Solomoni; ukaboilwa na ndighi ukaghamba, “BWANA ndekaso idime, kwa kukaia wamneka Daudi mwana uko na hikima upate kuibonyera nguma mbari ihi mbaa.”

⁸ Niko Hiramu ukaduma malagho kwa Solomoni ukighamba, “Napata malagho kwanidumia, nani narumiria kukupatira misida na misumbesu seji kwalomba.

⁹ Wadumiki wapo wichaireda kufuma Lebanoni hata baharinyi, nani nichaifunga chiaimweri ikaie mario gheidambisha kwa chia ya baharinyi andu uko kose kuchaaghora; aho nichaitasanya eri kuiduke. Ini neekunda tu kuneke wandu wapo vindo.”

¹⁰ Niko Hiramu ukamneka Solomoni misida na misumbesu sa iji koni orekundieghe.

¹¹ Solomoni ukamneka Hiramu pishi elfu ighana ra ngano, na lita elfu maghana ana ra mavuda, kwa wundu ghwa vindo va wandu wake mwaka kwa mwaka.

¹² BWANA ukamneka Solomoni hikima sa iji koni oremlaghirieghe; kukakaia na sere aghadi ya Hiramu na Solomoni, na awo wawi wikabonyerana ilaghano.

¹³ Mzuri Solomoni ukawada wandu elfu mirongo idadu kufuma kwa Israeli yose wipate kubonya kazi edumikishwa.

¹⁴ Ukaduma wandu elfu ikumi wighende Lebanoni kula mori kwa kusighariana. Mori ghumweri wibonye kazi Lebanoni, na meri iwi, wikaie mzinyi. Mnyapara wawo orekoghe Adoniramu.

¹⁵ Wokoni Solomoni orekoghe na wandu weduka misigo elfu mirongo mfungade, na wandu elfu mirongo wunyanya wekota na kuwacha magho isanga ja mighondinyi.

¹⁶ Solomoni ukawika wanyapara elfu idadu na maghana adadu wezighana iyo kazi.

¹⁷ Kwa nguma ya Mzuri Solomoni wikawacha magho mabaa ghiboie na kughiduka kwa wundu ghwa msingi ghwa Hekalu.

¹⁸ Mafundi gheagha gha Solomoni na gha Hiramu, na wandu wa Gebali wikaghiwacha agho magho; wikaboisa mbau na magho kwa kuagha iyo Hekalu.