1 WAZURI 3 - Biblia Ilagho Jiboie Kwa Wandu Wose

Solomoni kulomba hikima

¹ Solomoni ukabonya mapatano aghadi yake na mzuri wa Misri kwa kumlowua mwai wake. Ukamreda mzinyi ghwa Daudi ukaieghe aho, hata wameria kuagha muzi ghwake ghoni, na Hekalu, na wurigha ghomara muzi ghwa Jerusalemu.

² Wandu werekoghe wikifunyira vizongona andu kuzima kuzima, kwa kukaia hekalu erekoghe iseaghilo kwa wundu ghwa BWANA.

³ Solomoni oremkundeghe BWANA, ukakaia ukighenda kwa kunugha sharia ra ndee Daudi, kasoro tu orekoghe ukifunya vizongona vake andu kotasira mighondinyi.

⁴ Ngelo imu, Solomoni ukaghenda Gibeoni kufunya kizongona, angu aho niko madhabahu yake mbaa erekoghe. Orekoghe wafunya maelfu gha vizongona vekora aighu ya agho madhabahu.

⁵ Nao ahoeni Gibeoni, BWANA ukamfutukia Solomoni ndodonyi nakio; Mlungu ukamzera, “Nilombe icho chose kukunde nikuneke.”

⁶ Solomoni ukaghamba, “Oho kwamerie kuwonyera lukundo lubaa lukatie kwa mdumiki wako aba Daudi, angu orekoghe ukighenda imbiri kwako kwa wuloli, na hachi, na kwa ngolo yose. Niko kukam'bonyera ulo lukundo lubaa, kukamneka mwana wa womi upate kuchiseria kifumbi chake cha nguma idime.

⁷ Idana ee BWANA Mlungu wapo, kwamerie kunibonya ini mdumiki wako nikaie mzuri wulalo ghwa aba Daudi niko mwanake huwu, nisemanyagha seji wandu wibonyerwagha nguma.

⁸ Na ini mdumiki wako neko aghadi ya wandu wako korewisaghueghe; wandu wengi wisetalikagha.

⁹ Kwa huwo, kunineke ini mdumiki wako hikima emanya kuwibonyera wandu wako nguma; nipate kutambua iro ndicha na iro riko mbiwi. Ngera kusenibonyeragha huwo, nichadima wada kuwibonyera nguma wandu wako wing'ane huwu?”

¹⁰ Nao BWANA ukaboilwa angu Solomoni orelombieghe huwo.

¹¹ Niko ukamzera, “Kwa kukaia kwalomba ilagho iji hata ndekulombie wei kuduo luma ndoenyi, angu mali, angu ndighi rebwagha wamaiza wako, ela kwaakulombia kumoni kuneko hikima emanya jiboie na jizamie,

¹² ola nichakubonyera kunughana na malombi ghako. Nichakuneka hikima na akili emanya, mndungi usekaie nayo hata usechaakaia nayo nyuma ya oho.

¹³ Sena nichakuneka agha kuselombie wori; mali na ishima, mzuri ungi usechaakatanishwa na oho matuku ghako ghose.

¹⁴ Na ikakaia kuchanisikira, na kumaziria sharia na memu yapo, seji ndeyo Daudi oreghendieghe, niko nichaakuchuria matuku ghedua moyo ndoenyi.”

¹⁵ Nao Solomoni ukawuka dilonyi, ukamanya angu Mlungu okoghe ukidedanya nao ndodonyi. Niko ukaghenda Jerusalemu, ukakaia kimusi imbiri ya Sanduku ya Ilaghano, ukafunya vizongona vekora na vizongona va mapatano; ukawibonyera karamu wabaa wose wa Serikali yake.

Solomoni Kutanya malagho ghikurie

¹⁶ Nao waka wawi wa kimalaya wikacha kwa mzuri, wikakaia kimusi imbiri kwake.

¹⁷ Muka umu ukaghamba, “Ee bwana wapo, dadakanya na umuka nyumba imweri, nani nerevaeghe mwana dikwanye nyumbenyi.

¹⁸ Ituku ja kadadu ja kukufungua kwapo, nao moni wori ukava, nesi derekoghe diekeri aho nyumbenyi, ndederekwanyeghe na mndungi anduangi.

¹⁹ Niko umuka ukamlalia mwana wake uko dilonyi, ukafwa.

²⁰ Ukawuka nakio, ukamshoa mwana wapo umoo, na kummbika laghenyi kwake ingelo ini mdumiki wako niko nilale; ukareda mwana wake ufue na kummbika laghenyi kwapo.

²¹ Iji nawuka luma lwa nakesho niongoshe mwana wapo, ngamkua ufue; ela iji nawoka kumzighana ngawona kila si mwana wapo ungi uo neremvaeghe.”

²² Ela uja muka mzima ukaghamba, “U mwana uko moyo nuo wapo uo mwana ufue ni wako.” Uja muka wa imbiri ukaghamba, “Aai hata! Mwana ufue ni wako, na wapo nuo uko moyo.” Huwo niko werekoghe wikighora imbiri ya mzuri.

²³ Niko mzuri ukaghamba, “Kula umu onyu uaghamba wei mwana uko moyo ni wake na uhu ufue ni wa mmbao.”

²⁴ Mzuri ukaghamba, “Niredienyi lufu.” Nao lufu lukaredwa imbiri ya mzuri.

²⁵ Mzuri ukaghamba, “Wiwaghienyi umwana umoo, kula umu upate kipande chake.”

²⁶ Nao umuka mwana wake orekoghe moyo, kwa kukaia ngolo yake erekoghe ikimmbonia mwana wake wughoma ukaghamba, “Ee bwana wapo, mneke uo mwana, kusem'bwaghe putu.” Ela uja umu ukaghamba, “Ndediwaghilo dimsowe diwose.”

²⁷ Nao mzuri ukaghamba, “Mnekenyi umuka wa imbiri mwana uko moyo, msem'bwaghe putu, uo nuo mae.”

²⁸ Israeli yose ikasikira seji mzuri watanya, wikaishinikia hikima ya mzuri; wikamanya kwa loli kukaia Mlungu wamnekie hikima upate kutanya kwa hachi.