1 WAZURI 21 - Biblia Ilagho Jiboie Kwa Wandu Wose

Mbuwa ya mizabibu ya Nabothi

¹ Nabothi Mjezreeli orekoghe na mbuwa ya mizabibu kaavui na ngome ya Mzuri Ahabu.

² Ituku jimu Mzuri Ahabu ukamzera Nabothi, “Nakunde kunineke mbuwa yako angu iko kaavui na ngome yapo, nipate kuiwunja mbuwa ya mbogha, nani nichakuneka mbuwa zima iboie kuchumba ihi; angu kukawona nicha, neko tayari kulipa ighuri jaro kwa pesa.”

³ Nabothi ukamzera Ahabu, “BWANA ndeleghe nisekuneke ifwa ja weke aba.”

⁴ Ahabu ukaghenda nyumbenyi kwake wafwa ngolo, sena wazamilwa kwa wundu ghwa agho malagho wazerwa ni Nabothi Mjezreeli, wei ndemnekagha mbuwa ya ifwa ja weke ndee. Ahabu ukalala wulinyi ukalangaya noko, hata nderejieghe vindo anduangi.

⁵ Niko mkake Jezebeli ukacha ukamkotia, “Kwaki kwakaia na wasi huwu hata kusejagha vindo?”

⁶ Ukatumbulia, “Ni angu nadedanya na Nabothi Mjezreeli unineke mbuwa yake ya mizabibu niighuo, angu nimneke mbuwa zima, ela ukalegha.”

⁷ Mkake Jezebeli ukamzera, “Ado sena ni oho kumoni mzuri? Wuka kuje vindo, kuseke na wasi ghungi. Ini nikuneka iyo mbuwa ya Nabothi Mjezreeli.”

⁸ Niko ukaandika barua na kuringira sahihi ya Ahabu; ukarikaba mhuri ghwa Ahabu, na kuriduma kwa wabaa na vilongozi wikaianyagha na Nabothi mzinyi kwake.

⁹ Barua rereandikiloghe huwu: “Tangazenyi ituku jefunga tumu, muwikwanye wandu chiaimweri, na Nabothi mummbike andu kwa ighu kwa ishima.

¹⁰ Msaghuo wandu wandonyi wawi, muwiwike kaavui nao wipate kureda mashitaki aighu yake ghemzera, ‘Oho kwamsholia Mlungu na mzuri.’ Nao mumfunye shighadi, ulaso na magho hata ufo.”

¹¹ Niko wabaa wawo wa muzi na vilongozi werekoghe aho, wikabonya seji Jezebeli oreghorieghe.

¹² Wikatangaza ituku jefunga tumu, wikammbika Nabothi andu kwa ighu kwa ishima.

¹³ Wandu wa ndonyi wawi wikangia na kusea kidombo kaavui na Nabothi; wikareda mashitaki aighu yake imbiri ya wandu wikighamba, “Nabothi wamsholia Mlungu na mzuri.” Wikamfunya shighadi ya muzi na kumlasa na magho hata ukafwa.

¹⁴ Niko wikaduma momu kwa Jezebeli kughamba, “Nabothi walaswa na magho ukafwa.”

¹⁵ Jezebeli uendasikira kukaia Nabothi walaswa na magho ukafwa, ukamzera Ahabu, “Wuka kuiwuse ija mbuwa ya mizabibu ya Nabothi oreleghieghe kukuuzira, angu ndeuko moyo, wameria kufwa.”

¹⁶ Ahabu uendasikira kukaia Nabothi wafwa, ukawuka shwa wori, ukasea na kuiwusa ija mbuwa ya mizabibu ya Nabothi Mjezreeli.

¹⁷ BWANA ukamzera Elija Mtishbi,

¹⁸ “Wuka kusee kukwane na Ahabu mzuri wa Israeli ukaiagha Samaria; hoyu wangia mbuwa ya mizabibu ya Nabothi upate kuiwusa.

¹⁹ Kumzere kukaia ini BWANA naghamba huwu, ‘Kuabwagha mundu na mbuwa yake kuiwuse? Ola aeni aho koshi riletere bagha ya Nabothi, niko koni richaaleta bagha yako wori.’”

²⁰ Ahabu uendammbona Elija ukamzera, “Kwaniwada nga m'maiza wapo?” Elija ukatumbulia, “Ee, nakuwada; oho kwamerie kukufunya kubonya mawiwi imbiri ya BWANA.

²¹ BWANA wakuzera, ‘Ola nichareda mawiwi aighu yako. Nichakuinja putu, na wana wako wa womi nichawiinja putu, wikaiagha wa irika angu waghosi.

²² Nichaibonya nyumba yako sa nyumba ya Jeroboamu mwana wa Nebati, na sa nyumba ya Baasha mwana wa Ahija, kwa kunibonya nijoko ni machu, na kwa kuwishekeria wandu wa Israeli kubonya kaung'a.’

²³ Na kwa wundu ghwa Jezebeli BWANA waghamba kukaia koshi richaja nyama ya mumbi ghwake mpakenyi ghwa Jezreeli.

²⁴ Na kula mundu wa kichuku cha Ahabu ufwagha mzinyi, uchajighwa ni koshi, na uo uchaafuya mlambenyi, uchajighwa ni nderi.”

²⁵ (Ndekuwadie mndungi orekufunyireghe kubonya mawiwi imbiri ya BWANA sa Ahabu, ukilongozwa ni mkake Jezebeli.

²⁶ Orebonyereghe wuwiwi ghuzamie ghotasa milimu sa Waamori, awo BWANA orewiwingieghe imbiri ya wandu wa Israeli.)

²⁷ Ahabu uendasikira malagho agho, ukarashua nguwo rake na kurwa nguwo ra magunia; ukafunga tumu na kulala magunienyi ukikusera nandighi.

²⁸ BWANA ukamzera Elija Mtishbi,

²⁹ “Kwawuyammbona Ahabu seji wakusera imbiri kwapo? Angu wakusera huwo imbiri kwapo, sichaareda ugho wuwiwi matuku ghake, ela nichairedia nyumba yake agho mawiwi matuku gha mwana wake.”