1 WAZURI 19 - Biblia Ilagho Jiboie Kwa Wandu Wose

Elija aighu ya Mghondi gha Sinai

¹ Nao Ahabu ukamghoria Jezebeli iro maza rose Elija oreribonyereghe, na seji uwibwaghie walodi wa Baali kwa lufu.

² Niko Jezebeli ukaduma momu kwa Elija ukighamba, “Naghema milungu inibwaghe ngera kesho ngelo sa ihi nisekubonyere agho kuwibonyere walodi wa Baali.”

³ Elija ukaobua, ukakimbia kujikira irangi jake; ukaghendanya na mdumiki wake hata Beer-sheba aho Juda ukamsigha aho.

⁴ Ela uo ukaghenda charo cha ituku ilazi kireti. Ukasea kidombo aisi ya kiju cha mretemu, ukalomba kifwa kwa BWANA ukighamba, “Idana BWANA kazi yapo yakata; nalomba kujiinje irangi japo, kwa kukaia siboie kuwichumba weke aba anduangi.”

⁵ Ukalala aisi ya mretemu; nao malaika wa BWANA ukacha ukamuadada ukammbusira ukighamba, “Wuka kuje.”

⁶ Nao ukazighana, ukawona cha chongonyi andu orelalieghe, mkate ghuochelo na maka gha modo, na kiriba cha machi. Ukaja ukanywa, ukalala sena.

⁷ Malaika wa BWANA ukacha indo ja kawi ukammbusira ukamzera, “Wuka kuje, kwa kukaia ichi charo ni kibaa.”

⁸ Elija ukawuka ukaja na kunywa; ukaghenda kwa ndighi ra ivo vindo matuku mirongo ina kio na dime, hata ukavika Mghondi ghwa Mlungu ghwa Sinai.

⁹ Ukavika mbangenyi, ukalala aho. BWANA ukamzera, “Niki kubonyagha aha Elija?”

¹⁰ Ukatumbulia, “Naabwaghwa ni iriso jako BWANA Mlungu Uwadie-Ndighi-Rose; kwa kukaia wandu wa Israeli wasighie malaghiro ghako, wikachikanya madhabahu ghako, na kubwagha walodi wako kwa lufu. Idana naasighwa niekeri, nawo waawuyalola kunibwagha.”

¹¹ BWANA ukamzera, “Ghenda kukaie kimusi aighu mghondinyi imbiri kwapo.” BWANA ukaida; mbeo mbaa ikawaghanya mighondi, na kubara magho, ela BWANA nderekoghe andenyi ya mbeo. Nyuma ya iyo mbeo, ghukacha msughusiko ghwa ndoe, ela BWANA nderekoghe andenyi ya ugho msughusiko.

¹² Nyuma ya msughusiko ghwa ndoe, ghukacha modo, ela BWANA nderekoghe andenyi ya ghuja modo. Nyuma ya ghuja modo, lukacha lwaka luhorie lwa mboa.

¹³ Elija uendasikira ulo lwaka, ukafinikira wushu ghwake na shuka; ukafuma na kukaia kimusi mnyangonyi ghwa mbanga. Lukacha lwaka lukamzera, “Niki kubonyagha aha Elija?”

¹⁴ Ukatumbulia, “Naabwaghwa ni iriso jako BWANA Mlungu Uwadie-Ndighi-Rose, kwa kukaia wandu wa Israeli wasighie malaghiro ghako.”

¹⁵ BWANA ukamzera, “Wuya na ija chia ya kireti cha Dameshki; kukameria kungia mzinyi, kumdunge Hazaeli mavuda uwuye mzuri wa Siria,

¹⁶ na Jehu mwana wa Nimshi kumdunge mavuda uwuye mzuri wa Israeli, na Elisha mwana wa Shafati wa Abel-mehola, kumdunge mavuda uwuye mlodi wulalo ghwako.

¹⁷ Mundu uchaafufunuka usebwaghilo ni Hazaeli, uchabwaghwa ni Jehu; na uo uchaafufunuka usebwaghilo ni Jehu, uchabwaghwa ni Elisha.

¹⁸ Elaima sena, nichasigha wandu elfu mfungade andenyi ya Israeli, jingi wisedungie ngokoro kwa Baali, hata jingi wisemsusugha.”

Kuwangwa kwa Elisha

¹⁹ Nao Elija ukafuma aja ukaghenda; ukamkua Elisha mwana wa Shafati ukilima na mafungu ikumi na awi gha ng'ombe; ifungu ja ikumi na iwi nijo Elisha orekoghe najo. Elija ukaida kaavui nao, ukamkumbia shuka yake.

²⁰ Niko Elisha ukasigha rija ng'ombe, ukamkimbiria Elija ukighamba, “Nakulomba kunisighe nilaghane na aba na mao ima nichekunugha.” Elija ukamtumbulia, “Ghenda, sikughirie kungi.”

²¹ Elisha ukawuya; ukawada rija ng'ombe na kuribwagha. Ukadeka nyama raro na ija midi ya ghongolo rawo, ukawineka wandu wikaja. Ukawuka ukamnugha Elija na kumdumikia.