1 WAZURI 17 - Biblia Ilagho Jiboie Kwa Wandu Wose

Elija na kusoweka kwa vua

¹ Mlodi uwangwaghwa Elija wa isanga ja Tishbi jiko Gileadi ukamzera Ahabu, “Kwa irina ja BWANA Mlungu wa Israeli ukaiagha moyo, uo Mlungu nimdumikiagha, vua ndeichaanya ndoenyi hata mami ghangi kuwoneka isaakaia kwa ilagho nichaajighora.”

² Niko BWANA ukamzera Elija,

³ “Fuma aha kughende cha mashariki, nao kukuvise aho kaavui na kamoda ka Kerithi kiko mashariki ya Jordani.

⁴ Kuchakaia kukinywa machi gha ako kamoda; nameria kulaghira ngorusa rikuredieghe vindo.”

⁵ Niko Elija ukamsikira BWANA ukaghenda na kukaia kaavui na ako kamoda ka Kerithi kiko mashariki ya Jordani.

⁶ Ngorusa rikamredia mkate na nyama nakesho na nakenyi, ukakaia ukinywa machi kufuma kwa ako kamoda.

⁷ Nyuma ya matuku matini, ako komoda kikaoma kwa wundu ghwa vua kusoweka.

Elija na mka-mkiwa wa isanga ja Zarefathi

⁸ Niko BWANA ukamzera Elija,

⁹ “Wuka kughende isanga ja Zarefathi jiko Sidoni, kukaie aho. Ola namlaghira muka-mkiwa ukaiagha aho ukunekeghe vindo.”

¹⁰ Nao Elija ukawuka ukaghenda Zarefathi; hata iji wavika mbengenyi ya muzi, ukammbona muka mkiwa ukishoa mbande, ukammbanga ukamzera, “Tafadhali kuniredie machi matini ninyo.”

¹¹ Iji wawoka kughendaonda machi, Elija ukamzera, “Kunidwae na kamkate.”

¹² Uja muka ukamzera, “Naghema kwa BWANA Mlungu wako uko moyo siwadie mkate. Neeka na kamufu katini mkoponyi, na mavuda matini chupenyi; nawuyashoa iri mbande eri nibonye mkate, dije na mwana wapo diwonebwaghwa ni njala.”

¹³ Elija ukamzera, “Kusakeobua, ghenda kubonye sa iji koni kwaghamba; ela kuzoye kunibonyere ini kamkate katini kuniredie, ima konyuma kukubonyere oho na mwana wako.

¹⁴ Kwa kukaia BWANA, uo Mlungu wa Israeli waghamba huwu, ‘Ugho mufu ghuko mkoponyi ndeghuchaasia, na agho mavuda ghiko chupenyi ndeghichaasia, hata ituku jija ini BWANA nichaareda vua ndoenyi.’”

¹⁵ Uja muka ukaghenda ukabonya seji uzerelo ni Elija; wikakaia na vindo va kuwikata wose kwa matuku mengi.

¹⁶ Na sa iji koni BWANA oreghorieghe kwa momu ghwa Elija, ghuja mufu ndeghoresirieghe mkoponyi, na ghaja mavuda ndegheresirieghe chupenyi anduangi.

¹⁷ Nyuma ya agho, mwana wa uja muka mkiwa ukawuya mkongo; wukongo ghwake ghukachurikia na kutua ukafwa.

¹⁸ Uja muka ukamzera Elija, “Kwaki kunibonyere huwu? Welee, koocha kwapo eri kumkumbuse Mlungu kaung'a yapo hata mwana wapo ufo?”

¹⁹ Elija ukamzera, “Nineke mwana wako.” Nao ukammbwada kufuma laghenyi kwake, ukamdwa cha chumbenyi cha ighu aho orekoghe ukikaia; ukamrarisha wulinyi ghwake ghoni.

²⁰ Nao ukamkemia BWANA ukighamba, “Ee BWANA Mlungu wapo, kwaki kwamredia u muka mkiwa wasi ingelo nawuyakaia kwake kiwughenyi, hata kukam'bwagha mwana wake?”

²¹ Ukakughorua aighu ya uja mwana mando adadu ukimkemia Bwana na kughamba, “Ee BWANA Mlungu wapo, mmbunjire u mwana roho yake.”

²² Nao BWANA ukasikira malombi gha Elija, na roho ya uja mwana ikammburia, ukazoya kusoda.

²³ Elija ukammbwada uja mwana kufuma chumba cha ighu, ukamreda kwa mae ukaghamba, “Wona mwana wako oko moyo.”

²⁴ Uja muka ukamzera Elija, “Idana namanya kukaia ko mundu wa Mlungu, hata malagho gha BWANA kwawuyadeda ni gha loli.”