1 WAZURI 16 - Biblia Ilagho Jiboie Kwa Wandu Wose

¹ BWANA ukaghora na mlodi Jehu mwana wa Hanani aighu ya Baasha ukighamba,

² “Nerekujosereghe oho kufuma terinyi, ngakubonya kilongozi wa wandu wapo Israeli, ela korenughieghe kaung'a ra Jeroboamu, kukawishekeria wandu wapo Israeli kubonya kaung'a. Kwanibonyere nijoko ni machu kwa wundu ghwa kaung'a rawo.

³ Ela nichakumeria putu, na kivalwa chako chikaie sa kivalwa cha Jeroboamu mwana wa Nebati.

⁴ Mundu uo ose wa kivalwa chako uchafuya andenyi mzinyi uchajighwa ni koshi, na uo uchafuya mlambenyi, uchajighwa ni nyonyi ra mbeonyi.”

⁵ Mabonyo ghose gha Baasha ghaandikilo andenyi ya Chuo cha Malagho gha Ngelo cha Wazuri wa Israeli.

⁶ Baasha ukafwa, ukarikwa aja Tirza; na mwana wake Ela ukabonya nguma wulalo ghwake.

⁷ BWANA oreghorieghe na mlodi Jehu mwana wa Hanani aighu ya Baasha na kivalwa chake, kwa wundu ghwa kaung'a oreribonyereghe imbiri ya BWANA. Ukam'bonya BWANA kujokwa ni machu kwa wundu ghwa kubonya kaung'a sa Jeroboamu, na wokoni kwa kuitotesha nyumba ya Jeroboamu.

Mzuri Ela wa Israeli

⁸ Mwaka ghwa mirongo iwi na irandadu ghwa kubonya nguma kwa Asa mzuri wa Juda, Ela mwana wa Baasha orewurieghe mzuri wa Israeli. Ukabonya nguma Tirza kwa miaka iwi.

⁹ Zimri, umu wa wabaa wake wa Serikali, uo orekoghe mzighaniri wa magare ghake, ukabonya sheshe aighu yake. Nao iji Ela orekoghe Tirza, ukinywa chofi nyumbenyi kwa Arza mzighaniri wa ngome ya mzuri.

¹⁰ Zimri ukangia, ukamkaba na kum'bwagha; ukawuya mzuri wulalo ghwake. Maza iro rerebonyekieghe mwaka ghwa mirongo iwi na mfungade ghwa kubonya nguma kwa Asa mzuri wa Juda.

¹¹ Zimri uendawuya mzuri woruwu, ukabwagha wandu wa kinyumba chose cha Baasha. Nderesighieghe mndungi wa womi ukaiagha wa kichuku chake, angu mghenyi wake.

¹² Zimri ukaitotesha nyumba yose ya Baasha kunughana na ilagho ja BWANA orejighorieghe aighu ya Baasha kwa momu ghwa mlodi Jehu.

¹³ Kwa kukaia Baasha na mwana wake Ela werebonyereghe iro kaung'a rose, sena wikawishekeria wandu wa Israeli kubonya kaung'a, wam'bonyere BWANA kujokwa ni machu kwa wundu ghotasa milimu yawo.

¹⁴ Mabonyo mazima ghose gha Ela ghaandikilo andenyi ya Chuo cha Malagho gha Ngelo cha Wazuri wa Israeli.

Mzuri Zimri wa Israeli

¹⁵ Mwaka ghwa mirongo iwi na mfungade ghwa kubonya nguma kwa Asa mzuri wa Juda, Zimri orewurieghe mzuri wa Israeli; ukabonya nguma kwa matuku mfungade. Majeshi gha Israeli gherekoghe ghikirughaia Gibethoni muzi ghwa Wafilisti.

¹⁶ Hata iji wasikira kukaia Zimri wabonya sheshe aighu ya mzuri na kum'bwagha, Waisraeli wose wikam'bonya Omri m'baa wa majeshi, ukaie mzuri aighu ya Israeli ahoeni kambinyi ituku jija jeni.

¹⁷ Nao Omri ukafuma Gibethoni chiaimweri na majeshi ghake, wikaghurughaia muzi ghwa Tirza.

¹⁸ Zimri uendawona kukaia muzi ghwameria kuwadwa, ukaghenda ngomenyi kwa mzuri, ukaiwasira modo, ukahianya nayo ukafwa.

¹⁹ Agho gherebonyekieghe kwa wundu ghwa kaung'a rake oreribonyereghe imbiri ya BWANA. Ukam'bonya BWANA uzamilo kwa kunugha kaung'a ra Jeroboamu; kwa iro orewishekerieghe wandu wa Israeli kubonya kaung'a.

²⁰ Mabonyo mazima gha Zimri, na iro sheshe oreribonyereghe, raandikilo andenyi ya Chuo cha Malagho gha Ngelo cha Wazuri wa Israeli.

Mzuri Omri wa Israeli

²¹ Wandu wa Israeli werekoghe wawaghika mafungu awi. Wamu wikamnugha Tibni mwana wa Ginathi wipate kum'bonya mzuri, na wamu wikamnugha Omri.

²² Wandu waremnughieghe Omri wikawisima awo weremnughieghe Tibni mwana wa Ginathi. Niko Tibni ukafwa na Omri ukawuya mzuri.

²³ Mwaka ghwa mirongo idadu na imweri ghwa kubonya nguma kwa Asa mzuri wa Juda, Omri ukawuya mzuri wa Israeli. Ukabonya nguma kwa miaka ikumi na iwi. Orebonyereghe nguma Tirza kwa miaka irandadu.

²⁴ Ukaghua mghondi ghwa Samaria kwa Shemeri kwa vibelele va feza elfu irandadu. Omri ukaagha ngome aighu yaro; ukaghuwanga Samaria kunughana na irina ja Shemeri, mundu wa imbiri wa ugho mghondi.

²⁵ Omri ukam'bonyera BWANA kaung'a kuchumba wazuri wose werekoghe imbiri kwake.

²⁶ Ukam'bonya BWANA Mlungu wa Israeli ujoko ni machu kwa kunugha kaung'a ra Jeroboamu mwana wa Nebati. Kwa iro orewishekerieghe wandu wa Israeli kubonya kaung'a.

²⁷ Mabonyo mazima ghose gha Omri, na iro ndighi rake oreriwonyereghe, raandikilo andenyi ya Chuo cha malagho gha Ngelo cha Wazuri wa Israeli.

²⁸ Omri ukafwa, ukarikwa Samaria, na mwana wake Ahabu ukabonya nguma wulalo ghwake.

Mzuri Ahabu wa Israeli

²⁹ Mwaka ghwa mirongo idadu na wunyanya ghwa kubonya nguma kwa Asa mzuri wa Juda, Ahabu mwana wa Omri orewurieghe mzuri wa Israeli. Ukabonya nguma Samaria kwa miaka mirongo iwi na iwi.

³⁰ Ahabu mwana wa Omri ukabonya wuwiwi imbiri ya BWANA kuchumba wazuri wose werekoghe imbiri yake.

³¹ Nderekatoghe ni uko kunugha kaung'a ra Jeroboamu mwana wa Nebati; ukachuria, ukamlowua Jezebeli mwai wa Mzuri Ethbaali wa Sidoni; ukatasa Baali.

³² Ukaagha Hekalu ya Baali Samaria, ukabonya madhabahu kwa wundu ghwake.

³³ Ahabu ukabonya fwana ya mlungu ghwa waka Ashera, na mengi ghem'bonya BWANA Mlungu wa Israeli, ujoko ni machu kuchumba wazuri wa Israeli wose werekoghe imbiri yake.

³⁴ Matuku gha Mzuri Ahabu, Hieli wa isanga ja Betheli oreaghieghe sena muzi ghwa Jeriko. Na seji BWANA oremlaghirieghe Joshua mwana wa Nuni, Hieli uendaagha msingi ghwa ugho muzi, mwana wake wa imbiri Abiramu ukafwa. Sena uendaagha mbenge ra ugho muzi, mwana wake wa kutua ukafwa.