1 WAZURI 15 - Biblia Ilagho Jiboie Kwa Wandu Wose

Mzuri Abijamu wa Juda

¹ Mwaka ghwa ikumi na wunyanya ghwa kubonya nguma kwa Mzuri Jeroboamu mwana wa Nebati, Abijamu orewurieghe mzuri wa Juda.

² Ukabonya nguma Jerusalemu kwa miaka idadu. Mae orewangwagha Maaka mwai wa Absalomu.

³ Ukabonya kaung'a rija reni ndee oreribonyereghe. Nderekoghe mloli putu kwa BWANA Mlungu wake seji wawae wa madafu Daudi orebonyereghe.

⁴ Ela sena kwa wundu ghwa Daudi, BWANA Mlungu wake oremnekieghe kivalwa chebonya nguma Jerusalemu; ukamneka mwana wa womi obonya nguma wulalo ghwake, na kuimangisha Jerusalemu.

⁵ BWANA orebonyereghe huwo, angu Daudi orebonyereghe hachi imbiri yake, hata ndereleghieghe kukatisha malaghiro ghake; ela ijo jeni orejibonyereghe kwa Uria Mhiti.

⁶ Korekoghe na wuda ghadi ya Abijamu na Jeroboamu ngelo rose Abijamu orekoghe ukibonya nguma.

⁷ Mabonyo mazima ghose gha Abija ghaandikilo andenyi ya Chuo cha Malagho gha Ngelo cha Wazuri wa Juda.

⁸ Abijamu ukafwa; ukarikwa mzinyi ghwa Daudi. Mwana wake Asa ukabonya nguma wulalo ghwake.

Mzuri Asa wa Juda

⁹ Mwaka ghwa mirongo iwi ghwa kubonya nguma kwa Jeroboamu, mzuri wa Israeli, Asa orewurieghe mzuri wa Juda.

¹⁰ Ukabonya nguma Jerusalemu kwa miaka mirongo ina na ghumweri. Wawae orewangwagha Maaka mwai wa Absalomu.

¹¹ Asa ukabonya malagho gha hachi imbiri ya BWANA kara kara na wawae wa madafu Daudi.

¹² Ukawinga ghaja malaya gha womi na gha waka isangenyi; ukainja milimu yose erewikiloghe ni weke wawae.

¹³ Ukamwinja wawae Maaka usekaia mae Malkia, angu orebonyereghe wuwiwi ghowika ugho mlimu kwa wundu ghwa mlungu ghwa waka Ashera. Asa ukaghudema ghuja mlimu na kughukora aho Vololo ya Kidroni.

¹⁴ Hata ngera Asa ndererinonieghe rija nyumba retasira milimu rereaghiloghe mghondinyi, ela orekaieghe mloli putu cha kwa BWANA irangi jake jose.

¹⁵ Ukavireda Hekalunyi vija vilambo vose va feza na dhahabu verewikiloghe wakfu kwa Mlungu ni ndee chiaimweri na ivo vake veni.

¹⁶ Korekoghe na wuda aghadi ya Mzuri Asa wa Juda na Mzuri Baasha wa Israeli ngelo rose werekoghe wikibonya nguma.

¹⁷ Baasha mzuri wa Israeli ukajoka kulwa na Juda. Ukaagha ngome rake Rama, eri upate kughiria mndungi usefume angu kungia isanga ja Asa mzuri wa Juda.

¹⁸ Niko Asa ukawada feza na dhahabu eresigharikieghe Hekalunyi na ngomenyi ya mzuri, ukaduma wadumiki wiighenje kwa Ben-hadadi mwana wa Tabrimoni, wawae Hezioni mzuri wa Siria, uo orekoghe ukibonya nguma Dameshki, na wudumwa ughu:

¹⁹ “Ndedibonye mapatano aghadi yedu, sa iji gherekoghe aghadi ya weke aba wedu. Nakuredia manosi gha feza na dhahabu, kupate kunona agho mapatano korebonyereghe na Baasha mzuri wa Israeli; eri uinjike kwapo.”

²⁰ Ben-hadadi ukamsikira Mzuri Asa; ukaduma wabaa wake wa majeshi wikabe mizi ya Israeli. Wikasima mizi ya Ijoni, na Dani, na Abel-beth-maaka, na Kinerothi yose, na isanga jose ja Naftali.

²¹ Baasha uendasikira malagho agho, ukasigha kuagha aja Rama, ukaghenda Tirza.

²² Niko mzuri Asa ukafunya momu kwa wandu wose wa Juda, kuseko na kusigha mndungi; wiinje magho na mbau rose rerekoghe Rama, iro reretumilwagha ni Baasha kuagha ngome rake. Asa ukaritumia kwa kuagha ngome ra Geba ya Benjamini, na Mispa.

²³ Mabonyo ghose gha Mzuri Asa, ndighi rake na iro ngome oreriaghieghe ghaandikilo andenyi ya Chuo cha Malagho gha Ngelo cha Wazuri wa Juda. Ela matuku gha wughosi ghwake, ukapatwa ni wukongo ghwa maghu.

²⁴ Asa ukafwa; ukarikwa makaburinyi gha weke ndee, Mzinyi ghwa wawae Daudi; mwana wake Jehoshafati ukabonya nguma wulalo ghwake.

Mzuri Nadabu wa Israeli

²⁵ Mwaka ghwa kawi ghwa kubonya nguma kwa Mzuri Asa wa Juda, Nadabu mwana wa Mzuri Jeroboamu, ukawuya mzuri wa Israeli. Ukawibonyera Israeli nguma kwa miaka iwi.

²⁶ Ukabonya mawiwi imbiri ya BWANA, ukinugha chia ra ndee, na kaung'a rake iro rerewishekerieghe Waisraeli kubonya kaung'a.

²⁷ Baasha mwana wa Ahija, kichuku cha Isakari, ukam'bonyera Nadabu sheshe na kum'bwagha iji uo na masikari ghake werekoghe wikighulaliria muzi ghwa Gibethoni, ugho ghorekoghe ghwa Wafilisti.

²⁸ Maza iro rerebonyekieghe mwaka ghwa kadadu ghwa kubonya nguma kwa Asa mzuri wa Juda. Niko Baasha ukawuya mzuri wa Israeli wulalo ghwa Nadabu.

²⁹ Shwa wori nyuma ya kuwuya mzuri ukabwagha wandu wose wa kinyumba cha Jeroboamu. Ukawitotesha wose kuseko na kusigha ungi wawo uko moyo, kunughana na ilagho ja BWANA orejighorieghe kwa momu ghwa mdumiki wake mlodi Ahija Mshiloni.

³⁰ Maza iri rerebonyeroghe kwa kukaia Jeroboamu orem'bonyereghe BWANA uo Mlungu wa Israeli kujokwa ni machu kwa wundu ghwa kaung'a rake oreribonyereghe na kuwishekeria wandu wa Israeli kubonya kaung'a.

³¹ Mabonyo ghose gha Nadabu ghaandikilo andenyi ya Chuo cha Malagho gha Ngelo cha Wazuri wa Israeli.

³² Korekoghe na wuda aghadi ya Asa na Baasha mzuri wa Israeli matuku ghawo ghose.

Mzuri Baasha wa Israeli

³³ Mwaka ghwa kadadu ghwa kubonya nguma kwa Asa mzuri wa Juda, Baasha mwana wa Ahija orewurieghe mzuri aighu ya Israeli yose. Ukabonya nguma Tirza kwa miaka mirongo iwi na inya.

³⁴ Ukabonya mawiwi imbiri ya BWANA kwa kunugha kaung'a ra Jeroboamu, uo orewishekerieghe wandu wa Israeli kubonya kaung'a.